როგორ ამაღლდა უფალი მიწიდან ზეცად? ეს კითხვა გაწუხებს? ასე თქვი: უფალი თავისი მიწიერი სამეფოდან ზეციურ სამეფოში ღვთიური ძალით ამაღლდა და ამით დამშვიდდი. რადგანაც, თუკი შენ უფლის ყველა საიდუმლოს განცდას დაიწყებ, სხვა მრავალი კითხვა შეგაწუხებს: როგორ იშვა იგი? როგორ დადიოდა წყლის ზედაპირზე? როგორ განდევნიდა ეშმაკეულს და ჰკურნავდა ადამიანებს? როგორ იცვალა ფერი, როგორ აღადგენდა მკვდრებს? როგორ აღსდგა თვით? პასუხი ყველა ამ კითხვაზე ერთია: ეს ყოველივე მისი საღვთო ძალით იყო შესაძლებელი. მშვიდობა შენ და სიხარული!

ღვთის განგების იმედი არასოდეს დაჰკარგო!

* "ზღვები დაშრება, მთები დაიშლება, ქრისტეს დიდება არ მოიშლება".

შევიცნოთ, ძმებო, ჩვენი თავები; ნუ ვიქნებით პირმოთნენი ნურასოდეს, ნურც ჩვენი თავების და ნურც სხვების წინაშე. არამედ გულწრფელად ვაღიაროთ ღმერთის წინაშე ჩვენი ნაკლოვანებები. ვევედროთ ღმერთს, რომ თავისი მადლით განაქარვოს და აღმოფხვრას ყოველი ფარისევლობა ჩვენს გულებში და მოგვცეს სული წრფელი და მართალი. ამინ.

* ძმანო ჩემნო საყვარელნო, საშინელია ცოდვა ფარისევლობისა. რატომ? იმიტომ, რომ ფარისეველი, თავისი ცხოვრებით, თითქმის ბილწავს სათნოებებს. იგი ზოგჯერ სხვებს აძულებს ღვთისმსახურებას; აუქმებს ღვთის მოყვარეობას და მრავალ ადამიანს აბრკოლებს სულის ცხონების გზაზე. "ვაი თქვენდა, მწიგნობარნო და ფარისეველნო, ორგულნო, რამეთუ დაჰხშავთ სასუფეველსა ცათასა წინაშე კაცთა, თქვენ შე-არა-ხუალთ და შემავალთა არა უტევებთ შესვლად" (მთ. 24.14). რა სახით? იმ სახით, რომ გულწრფელი ადამიანი, ფარისევლური ყოფა-ქცევის შემხედვარე, ხშირად ემიჯნება ღვთისმსახურებას.