დღეს შევიკრიბეთ ჟიჩაში, რომელიც წმინდა საბას მცნებებზე დაფუძნებული სერბი ხალხის რწმენის ცენტრი და ფოკუსია, რათა გავხსნათ ჩვენი გულები უზენაესი უფლის წინაშე, აღვიაროთ და მოვინანიოთ. მოდით, ჯერ ჩვენი მონანიება მოვიტანოთ, შემდეგ კი მთელი ხალხისთვის მოვინანიოთ.

ჯერ ვინანიებთ საკუთარ თავს ყველაფერში, რითიც შევცოდეთ და ღვთის კანონი დავარღვიეთ და პატიოსნება შევბღალეთ: ტყუილით ან ქურდობით, გარყვნილებით ან ძარცვით, ლოთობით და ღორმუცელობით ან მოტყუებითა და აზარტული თამაშებით, გინებით და წმინდათა შეურაცხყოფით ან ცილისწამებითა და მეგობრებზე ჭორის გავრცელებით, მცირერწმენით ან მოყვასთა ცდუნებით; ვინანიებთ ჩვენს მრავალ ცოდვას, ცნობილსა და უცნობს, ნებაყოფლობითსა და უნებლიეს, სიტყვით, საქმით თუ აზრით ჩადენილს, აშკარასა და ფარულს, ვინანიებთ და ვთხოვთ ღმერთს, შეგვინდოს ჩვენი ცოდვები და არ დასაჯოს ჩვენს გამო მთელი ჩვენი ხალხი და მთელი ჩვენი სახელმწიფო. გულწრფელად ვინანიებთ, შეგვინდე, უფალო!

ახლა ვინანიებთ ყველა იმ სასულიერო პირისა და მღვდლის ცოდვებს, რომლებმაც რაიმეთი შესცოდეს უფალი ღმერთისა და წმინდა საბას წინაშე: ან რწმენაში შესუსტდნენ ან ღვთის შიშში, ან დაუდევრები იყვნენ უფლის საქმეში ან ძმურ სიყვარულში შესუსტდნენ. თუ მათ არ მოინანიეს, ჩვენ ვინანიებთ ყველაფერს, რაც ბოროტებაა ღმერთის წინაშე მათ გულში, ენაზე ან საქმეებში. გულწრფელად ვინანიებთ, შეუნდე მათ, უფალო!

ვინანიებთ იმ ჩვენი ხალხის წინამძღოლთა ცოდვებს, რომლებმაც დაივიწყეს, რომ ჩვენი სახელმწიფო დააფუძნეს სერბი ხალხის წმინდა შვილებმა, რომ ჩვენი მიწა წმინდაა; რომლებმაც დაივიწყეს, რომ არჩეულნი არიან წმინდა წამებული ხალხის წინამძღოლებად, და ღვთის შიშისა და ხალხის სიყვარულის გარეშე გამოიყენეს თავიანთი ძალაუფლება ბოროტად, ხალხი უბედურებაში ჩააგდეს დროებით, მაგრამ სამუდამოდ განწირეს საკუთარი თავი და შვილები დაღუპვისთვის. გულწრფელად ვინანიებთ, შეუნდე მათ, უფალო!

ვინანიებთ იმ მასწავლებლების, მწერლებისა და მთარგმნელების ცოდვებს, რომლებმაც ჩვენს ახალგაზრდობას უჩვენეს მთელი მსოფლიოს ფრაზიორებისა და ფანტაზიორების სრიალა გზა, რომელიც ხალხებს სისხლიან დანაშაულებსა და დაღუპვისკენ მიუძღვის სატანისა და ჯოჯოხეთის ძალების სასიხარულოდ. გულწრფელად ვინანიებთ, შეუნდე მათ, უფალო!

ვინანიებთ სერბი ხალხის ყველა იმ ვაჟისა და ასულის ცოდვებს, რომლებმაც უგულებელყვეს თავიანთი ხალხის სული, გამოცდილება, მეხსიერება და წმინდა რწმენა, პატივისცემა და სიკეთე, უცხოური სიგიჟე გადმოიღეს და იაფფასიან საქონელზე გაცვალეს თავიანთი ხალხის მემკვიდრეობის სუფთა ოქრო, რომელიც ათას ცეცხლშია გამოცდილი. გულწრფელად ვინანიებთ, შეუნდე მათ, უფალო!

ვინანიებთ ყველა უსამართლო მოსამართლისა და უხუცესის, გადასახადების ამკრეფებისა და ყველანაირი კონტროლიორების, გამყიდველებისა და გადამყიდველების, იმპორტიორებისა და ექსპორტიორების ცოდვებს; ვინანიებთ ყველა დამნაშავის ბოროტებას, მანკიერთა მანკიერებას, შეპყრობილთა ვნებებს, მკვლელთა მკვლელობებს, მოძალადეთა ძალადობას, შვილების მიერ მშობლების შეურაცხყოფას; ვინანიებთ ძმებს შორის ჩხუბსა და კამათს, ძლიერის მიერ სუსტზე ძალადობას, და მდიდართა მთელ გულქვაობას ღარიბთა მიმართ, და ვულგარულობასა და გარყვნილებას, რომელიც ხდება რესტორნებში, თეატრების სცენებზე და მსგავს ადგილებში მთელს ჩვენს მიწაზე, რომლის წიაღშიც განისვენებენ მილიონობით გმირისა და წამებულის ნეშტები, რომლებმაც თავი გასწირეს პატიოსანი ჯვრისა და ოქროს თავისუფლებისთვის. გულწრფელად ვინანიებთ, შეუნდე მათ, უფალო!

ვინანიებთ ყველა იმათ ცოდვებს, ვისი სულიც გაყოფილია და ხასიათი მერყევი: რომლებიც წმინდანებს ადიდებენ, მაგრამ ამავე დროს წმინდანებს ლანძღავენ; ჯვარს ეთაყვანებიან, მაგრამ ჯვარს აგინებენ; მარხვას იცავენ, მაგრამ წყევლიან კიდეც; ღმერთს ლოცულობენ, მაგრამ ღმერთს გმობენ; ეკლესიით ტრაბახობენ, მაგრამ ეკლესიაში არ დადიან; სერბულ იდეას ადიდებენ, მაგრამ სერბებს შორის განხეთქილებას თესავენ; სახელმწიფოთი ამაყობენ, მაგრამ მასვე ძარცვავენ. ჰოი, დიდო და ყოვლისშემძლე ღმერთო, ყველა მათგანისთვის მოგართმევთ გულწრფელ ცრემლიან მონანიებას. თუ ჩვენი მონანიება არ არის საკმარისი ჩვენი ძმებისთვის, აიძულე, უფალო ყოვლადმოწყალეო, მოინანიონ თავად. და ნუ დაუშვებ, მეფეთა მეფევ და ცისა და მიწის შემოქმედო, რომ შენი მართალი რისხვის მათრახი, რომლითაც ამ დღეებში სცემ ამპარტავნებსა და ურწმუნოებს, დაეცეს შენი მონის, წმინდა საბასა და შენი წამებულის, თავადი ლაზარეს ხალხის თავზე. დიდება შენდა, ღმერთო ჩვენო, დიდება შენდა, შემოქმედო და მხსნელო ჩვენო უკუნითი უკუნისამდე. ამინ.