წმინდა გუტლაკი გახლდათ მერსიის სამეფო იკლინგების დინასტიის თავადის პენვალდისა და მისი მეუღლის ტეტას შვილი,. ბავშვობაში იყო სერიოზული და გაურბოდა ბიჭურ ცელქობებს. თუმცა, 15 წლის ასაკში გადაწყვიტა დაქირავებული მეომარი გამხდარიყო. შემოიკრიბაა მრავალი მიმდევარი, დაიწყო ძარცვა, ძალადობა და გარშემო სოფლების განადგურება. ასე იცხოვრა გუთლაკმა ცხრა წელი. მისი მიმდევრები, სავარაუდოდ, ჩაირიცხნენ ეთელრედ მერსიელის ჯარში.
ერთხელაც საოცარი სიზმარი ნახა, რომელმაც მოყვასისადმი სიყვარულით და თანაგრძნობით აავსო. მან დაიფიცა, რომ ამიერიდან მხოლოდ ღვთისთვის იცოცხლებდა. დილით დაემშვიდობა მეგობრებს, დატოვა სიმდიდრე, ქონება (ის დიდგვაროვანი იყო) და რეპტონის მონასტერში აღიკვეცა მონაზვნად. გუტლაკის და პეგაც მონაზვნად აღიკვეცა და განდეგილის ცხოვრება ირჩია.
მონასტერში გატარებული ორი წლის შემდეგ გუტლაკმაც განდეგილობა ისურვა. მონასტრის ბერდიდებისგან კურთხევა აიღო და კემბრიჯის ჩრდილოეთით ლინკონშირის დიდ ჭაობებში განმარტოვდა. იქ ადგილობრივმა მცხოვრებმა ერთი კუნძული მიასწავლა, რომელიც სრულიად უკაცური იყო. აქ ბევრმა სცადა დასახლება, მაგრამ ვერავინ შეძლო. ოცდაექვსი წლის გუტლაკი ნავით მივიდა კუნძულამდე, რომელსაც "ყვავების მიწას" ეძახდნენ. მან დაათვალიერა მიწა, მერე საკვებისთვის, სამშენებლო მასალისთვის რეპტონში დაბრუნდა. წმინდა გუტლაკმა კუნძულზე ძველი ყორღანი ნახა და იქვე ააშენა თავისი სავანე.
გუტლაკს ტანთ მხოლოდ ტყავის სამოსი ეცვა, დღეში ერთხელ მხოლოდ ქერის პურს და წყალს იღებდა. ერთხანობა ადგილობრივი ბრიტები ესხმოდნენ, ჭაობში აგდებდნენ და სცემდნენ. ეშმაკებიც ცალკე აშინებდენ მოსაგრეს. ერთხელ გუტლაკის მსახურს, ბეკელს, ბატონის მოკვლის სურვილიც კი ჩაუდეს. წმინდანმა შეიტყო მსახურის ფიქრები და საყვედურით სინანულში მოიყვანა. გუტლაკი იყო მაღალი, გამხდარი, მშვიდი, რბილი, სასიამოვნო, მდაბალი და მომთმენი. მთელი ოლქის ჩიტები მისი ხელიდან იკვებებოდნენ. კუნძულზე თხუთმეტწლიანი მოსაგრეობის შემდეგ ერთხელ ის ეკვდერში ლოცვისას გაიყინა. რვა დღის ავადმყოფობის შემდეგ გარდაიცვალა. მან მსახურს უბრძანა, თავის დის, პეგის გვერდით დაეკრძალა. ღირსი გუტლაკი 714 წლის 11 აპრილს გარდაიცვალა. მისი განმარტოების ადგილი შემდგომში კროულენდის მონასტრად გადაკეთდა, სადაც რეფორმაციამდე უამრავი მომლოცველი იკრიბებოდა.
წმინდა გუთლაკის ილუსტრირებული ცხოვრება მოცემულია ე.წ. გუთლაკის გრაგნილში (XII საუკუნე, ინახება ბრიტანეთის ბიბლიოთეკაში). ამ გრაგნილის ასლები შეიძლება იხილოთ კროულენდის სააბატოს გამოფენაზე დღემდე.
აქვე წაიკითხეთ:
ღირსი გუთლაკ კროულენდელი, სასწაულმოქმედი
ხატის წყარო
