ღვთის ეს რჩეული წარმოშობით ახალი ეფესოდან (თანამედროვე კუშადასი, თურქეთი) იყო, ოჯახი ჰყავდა, მაგრამ უწესო ცხოვრებით ცხოვრობდა და ლოთობდა.
ღვთის დაშვებით,42 წლის ასაკში, ღვინით გონდაკარგულმა თურქ მსაჯულთა თანდასწრებით ქრისტე უარყო, მაგრამ გონს რომ მოვიდა, კუნძულ სამოსზე გაიქცა და როგორც ქრისტიანი ცხოვრობდა.
ამ დროს ახალ ეფესოში მართლმადიდებლებმა სულთნისგან მიიღეს ნებართვა ახალი ეკლესიის აშენებაზე. მათ ხელის შესაშლელად, თურქებმა გაავრცელეს ჭორი, რომ თითქოს ქრისტიანებმა გიორგი მოკლეს როგორც განდგომილი და მისი სხეული მშენებარე ტაძრის საძირკველში დამარხეს. მაშინ ქრისტიანებმა მიუთითეს გიორგის ადგილსამყოფელზე. თურქებმა ის იპოვეს,ახალ ეფესოში დააბრუნეს, წინადაცვითეს და მეჩეთის ზედამხედველად დაადგინეს.
შემდეგ გიორგი გაიქცა სამოსზე, იქიდან კი პატმოსზე, სადაც აღსარება თქვა ერთ მოხუც ბერთან, მიიღო ცოდვების მიტევება და მთლიანად შეცვალა თავისი ცხოვრება. როდესაც ის სამოსზე დაბრუნდა, დააპატიმრეს და ციხეში ჩასვეს, სადაც ფეხებზე ათასი ჯოხის დარტყმა მიიღო. მიუხედავად იმისა, რომ ქრისტიანული თემების უხუცესებმა გიორგი ციხიდან გამოისყიდეს, მან გადაწყვიტა ნებაყოფლობით მიეღო წამება.ხოლო იმ ძელის ხილვის შემდგომ, რომელზეც მცირე ხნის წინ წმინდა მოწამე პოლიდორი ჩამოახრჩვეს, გადაწყვეტილება გაუმყარა.
შინ მიბრუნებულმა ოჯახს, ახლობლებს თუ მეგობრებს შენდობა სთხოვა, ადგილობრივ მსაჯულს წარუდგა, თავიდან ფესი მოიხადა და მიწაზე დაანარცხა.
ქალაქის ხელისუფალნი, როგორც კი დარწმუნდნენ, - გიორგი სრულ ჭკუაზეა და ფხიზელიო, საპყრობილეს უკრეს თავი, კისერზე ჯაჭვი შეაბეს, ფეხები შეუკრეს, ხან ლიქნით შესთავაზეს, - გონს მოდი და თავი იხსენიო, ხან - მუქარით სცადეს მოდრეკა, ხან - გვემეს, მაგრამ პასუხი უცვლელი იყო:
- ქრისტიანი ვარ და ქრისტიანად მოვკვდებიო!
1801 წლის 5 აპრილს გიორგის თავი წარჰკვეთეს, მისი მარტვილობის შემსწრე ქრისტიანებმაც და მუსულიმანებმაც იხილეს, თუ როგორ სარკისებრ იელვა მისმა სხეულმა, თითქოს მზე აირეკლაო.
წმინდა მოწამე გიორგი წმინდა პოლიდორის სამუდამო განსასვენებელთან დაკრძალეს.
"ახალ ლიმონარიონსა" და "ახალ ეკლოგიონში" შესულია პაროსელი ბერი ათანასე (პარიზის) მიერ დაწერილი წმინდა გიორგის ცხოვრება; მისდამი მსახურება შეადგინა ქიოსელმა ბერმა ნიკიფორემ.
ხატის წყარო
