გვესაუბრება წმინდა დიდმოწამე ეკატერინეს სახელობის ტაძრის წინამძღვარი და წმინდა ეკატერინეს სათნოების სავანის დირექტორი, დეკანოზი შიო პაიჭაძე:
- სათნოების სახლში 115 კაცი ცხოვრობს. მინდა პასუხი გავცე იმ ადამიანებს, რომელთაც აინტერესებთ, თუ სად იხარჯება ეკლესიისთვის მიცემული თანხა. უმძიმეს მდგომარეობაში მყოფმა მოხუცებმა, რომელთაც არ ჰქონდათ საარსებო პირობები, მკურნალობის საშუალება, თბილი საჭმელი, საწოლიც კი, თავის მისადრეკი ჰპოვეს ჩვენს სავანეში. რამდენიმე თვის წინ ერთი ქალბატონი მოვიყვანე, რომელსაც მძიმე ინსულტი დაემართა და არავინ ჰყავდა მომვლელი. ღუმელსაც ვერ ანთებდა. სავანის თანამშრომლების მუშა ჯგუფი ყოველდღე აკითხავდა შინ ამ ქალბატონს და ყველანაირად ეხმარებოდა საკვებით, პრეპარატებით. რადგან სავანეში ადგილი არ გვქონდა, თავიდან ოჯახში ვუვლიდით. შემდგომ უკვე მოვიყვანეთ სათნოების სახლში და დღეს საგრძნობლად გამოჯანმრთელდა, ფეხზე დავაყენეთ და სიცოცხლით ტკბება. ასეთი არაერთი შემთხვევაა. ხუთი დღის წინ ქუჩაში დარჩენილი მომღერალი ზურაბ ჩიქოვანი მოვიყვანე, რომელიც მანქანის მისაბმელში ცხოვრობდა. ისიც სიკვდილს ებრძოდა და მდგომარეობიდან გამოვიყვანეთ. ორ დღეში ბათუმის ცირკის სცენაზე გამოვიდა და იმღერა კიდეც.
***
შენდობას ვითხოვ, იმისათვის, რომ ჩვენი სავანის ქველმოქმედებაზე ვსაუბრობ, მაგრამ საჭირო გახდა ეს... გულდასაწყვეტია, როცა ამბობენ, - რას აკეთებს ეკლესია გაჭირვებულთა დასახმარებლადო. ჩვენს სავანეში ყოველდღე ხუთი მძიმედ შეჭირვებული ოჯახი მოდის და დამატებით იკვებება. ვინც ამბობს ძვირს ეკლესიაზე, სიყვარულით ვუპასუხებ, ბათუმის სავანის კარი ღიაა მათთვის - მოვიდნენ და ნახონ, რა კეთდება და როგორ კეთდება უდიდესი საქმე. თქვენი ჟურნალის საშუალებით მადლობას ვუხდი სავანის 70 თანამშრომელს, რომლებიც პროფესიულ დონეზე არიან მომზადებულნი მოხუცთა მოვლის გერმანულ მეთოდურ პროფესიულ საქმიანობაში. აუცილებელია შეიქმნას ჰოსპისები, სადაც უამრავი შეჭირვებული იცხოვრებს და სიცოცხლეს გაიხანგრძლივებს. ჩვენთან ონკოლოგიური პრობლემით შეჭირვებული ბევრი ადამიანი ცხოვრობს. სად მიიდრეკდა ეს ხალხი თავს? 
სათნოების სახლში გვაქვს სახელოსნო შეზღუდული შესაძლებლობის პირთათვის, სადაც ისინი თიხაზე მუშაობენ. მათი ნამუშევრების გამოფენა-გაყიდვებს ვმართავთ ხოლმე. ჩამოვაყალიბეთ მომღერალთა ანსამბლი, ვატარებთ გასვლით კონცერტებსაც. ***
სავანე სტაციონარული ტიპის დაწესებულებაა, სადაც ცხრა ექთანი, ორი ექიმი და ორმოცდახუთი მოწყალების და მუშაობს. ასევე გვაქვს სამეურნეო განყოფილება, სატრაპეზოს მომსახურება, დაცვის შიდა სამსახური. მეუფე დიმიტრის ლოცვა-კურთხევითა და დახმარებით ჩვენი სავანე მყარად დგას და აგრძელებს მადლიანი საქმის კეთებას. ახლო მომავალში დაგეგმილი გვაქვს სათნოების სახლის გაფართოება. გახსნილი ურთიერთობა გვაქვს საზოგადოებასთან, ჩაკეტილი ტიპის დაწესებულება არ არის, რაც ხელს უწყობს საზოგადოებასთან მოხუცების ინტეგრაციას. საკმაოდ კარგი ურთიერთობა გვაქვს იტალიის სოციალურ სამსახურთან "თეთრი ჯვარი", მის ხელმძღვანელთან, ბატონ ფრანჩესკოსთან. ჩვენს სავანეს ბატონმა ფრანჩესკომ სამი წლის წინ სასიცოცხლოდ საჭირო რეანომობილი აჩუქა.სავანეში სამედიცინო ფაკულტეტის სტუდენტები პრაქტიკას გადიან და თავიანთ საქმიანობაში წარმატებებს აღწევენ. მათ ცოცხალი შეხება აქვთ შეზღუდული შესაძლებლობის მქონე პირებთან.
ღვთის მადლით, მალე დაიბეჭდება ჩემი წიგნი "სავანის დღიურები", სადაც ყველა მოხუცისა და მობინადრის შეჭირვებული ცხოვრება და სახეები იქნება წარმოდგენილი. წიგნი იმიტომ დაიწერა, რომ არ დაიკარგოს ჩვენი მობინადრეების ისტორია და მძიმე გზა, რომელიც ამ ხალხმა გაიარა. ეს საქმე საკმაოდ შრომატევადია, მაგრამ საინტერესო და დიდებული.
ბათუმისა და ლაზეთის ეპარქიაში 14 დიდი საქველმოქმედო დაწესებულებაა.
ბუნება და ფუნქცია ეკლესიისა მქადაგებლობაა და გლახაკთა დაპურება, მოყვასის გვერდით დგომა. საქართველოს ეკლესია ამას ასრულებს და ყოველთვის შეასრულებს, რადგანაც ეს ჩვენი ეროვნული ფასეულობაცაა და სარწმუნოებრივიც, რომელიც აგრე დიდებულად შეერწყა ურთიერთს.
