წმინდა ვირინი დაიბადა დაახლოებით 600 წელს. სავარაუდოდ, ეპისკოპოსად ხელი დაასხა მთავარეპისკოპოსმა ასტერიუსმა გენუაში. 634 წელს ვირინი რომის პაპმა ჰონორიუსმა გაგზავნა საქადაგებლად მერსიის წარმართებს შორის. ის გადმოვიდა პორტჩესტერში, ჰემპშირში, და გაემართა ქრისტიანი კელტების მიწების გავლით ჰემპშირში სილჩესტერისკენ.

სანამ ვირინი მერსიას მიაღწევდა, ის შეხვდა წარმართ საქსებს თემზის ველზე. აღმოაჩინა რა, რომ მათ ძალიან სჭირდებოდათ ქრისტიანული მზრუნველობა, მან გადაწყვიტა დარჩენილიყო და გაემგზავრა სამეფო მამულებში ბერკშირის დაბლობებზე, სავარაუდოდ ჩოლსიში. აქ მან შეხვდა უესექსის მეფე სინეგილსს ჩერნ კნობში, რომელიც ბლუბერშია, ბერკშირში, იქ სადაც წმინდანმა პირველად იქადაგა. მეფე, ალბათ, ფიქრობდა, რომ ეს ძველი წარმართული სამლოცველო იქნებოდა შესანიშნავი ადგილი ახლად ჩამოსულის შესაშინებლად. თუმცა ვირინი იყო აუღელვებელი და მან შეძლო კიდეც მეფის დარწმუნება ქრისტიანობის ღირსებებში. სინეგილსმა ვირინს მისცა ნება ექადაგა მთელს მის სამეფოში. მაგრამ დასჭირდა დრო, სანამ თავად სრულად მოიქცეოდა უფლისკენ.

მეფე იმ დროს სასოწარკვეთით ეძებდა კავშირს ძლიერ ნორთუმბრიის მეფე ოსვალდთან. იმედი ჰქონდა, რომ ერთად შეძლებდნენ საძულველი მერსიელების დამარცხებას. სინეგილსმა მოაწყო მოლაპარაკებები თავის სასახლეში ისთჰემპსთედში, ბერკშირში, და ნორთუმბრიის მეფე გაემართა მასთან შესახვედრად.

სამეფო მოლაპარაკებებში ერთადერთი დაბრკოლება იყო ის, რომ ოსვალდი იყო ქრისტიანი და არ გაერთიანდებოდა არც ერთ წარმართთან. ასე რომ უესექსის მეფემ გადაწყვიტა, რომ დრო იყო მონათლულიყო ქრისტეს რწმენაზე. ოსვალდი დაეთანხმა იმასაც, რომ ეს კავშირი შეიძლებოდა გამყარებულიყო მისი ქალიშვილის და სამხრეთელი მეფის ქორწინებით. ვირინი გაგზავნეს ამისთვის, და ახლომდებარე გართის წყაროსთან, ბრექნელში, ბერკშირში, სინეგილსი დაუყოვნებლივ მონათლეს.

ეპისკოპოსს მისცეს ძველი რომაული ქალაქი დორსიჩი, ან დორჩესტერ-ონ-თემზი, ოქსფორდშირში, რათა იქ აეშენებინა თავისი საკათედრო ტაძარი, და სამეფო ჯგუფი გაემართა ჩრდილოეთით ტერიტორიის შესასწავლად. გზაზე მეფის კარის ბევრმა წევრმა ასევე გამოთქვა სურვილი გამხდარიყო ქრისტიანი. ასე რომ ბრაიტველში, ბერკშირში, რომელიც მდებარეობს თემზის გადასასვლელთან დორჩესტერთან ახლოს, ვირინმა მონათლა მისი კარის უმეტესი ნაწილი.

მეფის ვაჟმა, სვიხელმმა, თავდაპირველად უარი თქვა მონათვლაზე, მაგრამ საბოლოოდ მოექცა უფლისკენ მომდევნო წელს. მეფე სინეგილსი გარდაიცვალა 643 წელს, და დაახლოებით ხუთი წლის შემდეგ ახალმა მეფემ, სენვალჰმა, მოიწვია ვირინი, რათა აეგო მნიშვნელოვანი ეკლესია უინჩესტერში. სხვა ეკლესიები უესექსში ასევე უკავშირდება ვირინის შრომებს:

* წმინდა მარიამისა რიდინგში, ბერკშირში,
* წმინდა ელენესი აბინგდონში, ბერკშირში,
* ტაპლოუს ოლქი, ბაკინგემშირში, სადაც წმინდანმა, როგორც ითვლება, მონათლა ადგილობრივი საქსები ბაპსის ტბორში. ეს იყო უესექსის ეპარქიის დასაწყისი.

წმინდა ვირინი გარდაიცვალა დორჩესტერში 649 ან 650 წლის 3 დეკემბერს.

მისი საფლავი დორჩესტერში გახდა დიდი მომლოცველობის ადგილი. მოგვიანებით ადგილობრივმა ეპისკოპოსმა გადაიტანა კათედრა უინჩესტერში და თან წაიღო წმინდა ვირინის სხეული. უინჩესტერის საკათედრო ტაძარში დღემდე ინახება მისი წმინდა ნაწილები.

ვირინს ჰქონდა განსაკუთრებული დამოკიდებულება წმინდა ზიარებისადმი, რასაც აჩვენებს მისი მოგზაურობა "ზღვის გაღმა", რათა მიეღო ოდიკი რომის პაპ ჰონორიუსისგან, რომელსაც ის ყველგან თან ატარებდა წმინდა ევქარისტიის აღსასრულებლად. ბევრი სასწაული მოხდა ვირინის წმინდა ნაწილების გახსნისას.

სტატიის წყარო: ВИРИН ДОРЧЕСТЕРСКИЙ