სლავთა განმანათლებლების და სლავური ანბანის შემქმნელების, წმინდა კირილესა და მეთოდეს ქანდაკება უკრაინაში ბევრგან შეგხვდებათ.  კიევ-პეჩორის ლავრის მოლოცვის დროს უფრო ნათლად დავინახე, თუ როგორ დიდ პატივს მიაგებენ მათ სახელს.  ლავრის ეზოში წმინდა კირილესა და მეთოდეს საკმაოდ მოზრდილი ქადგაკებაა აღმართული. მათი ცხოვრება და მოღვაწეობა უფრო საფუძვლიანად კიევში ყოფნის დროს ჩემმა მეგობარმა, სალომე ვაშალომიძემ გამაცნო:

-კირილე და მეთოდე საბერძნეთში, ქალაქ თესალონიკში დაიბადნენ და გაიზარდნენ. ისინი ხორციელი ძმები იყვნენ.  რვა ძმათა შორის, მეთოდე  ყველაზე უფროსი ძმა იყო. მან ერისკაცობაში მოიხადა სამხედრო სამსახური. ათი წლის განმავლობაში იყო გუბერნატორი. შემდეგ გადადგა თანამდებობიდან და ცხოვრება სასულიერო გზით წარმართა. წმინდა მეთოდემ პატარა მონასტერში, პოლიხრონში იღუმენის ხარისხი მიიღო. 

სწავლის დამთავრების შემდეგ კირილემაც სასულიერო გზა აირჩია. კირილე ძმათა შორის  ყველაზე უმცროსი იყო. მას ბავშვობიდანვე აღმოაჩნდა უმაღლესი გონებრივი შესაძლებლობები. კირილე 15 წლისაც არ იყო, როცა წმინდა გრიგოლი ღვთისმეტყველის ღრმა შინაარსის წიგნებს კითხულობდა. კირილე მიწვეული იყო მიქაელ II-ის შვილის მასწავლებლად.



იმპერატორმა  ორივე ძმა თავისთან მიიწვია და გაგზავნა თურქულენოვან მომთაბარე ხალხთან სახარების საქადაგებლად და შესასწავლად. გზად ისინი საქადაგებლად ქალაქ კორსუნში შეჩერდნენ, სადაც წმინდა მამებმა სასწაულებრივად იპოვეს წმინდა მღვდელმოწამე კირილეს, რომის პაპის სხეული ( ხსენების დღე 25 ნოემბერი-8დეკემბერი). იქვე, კორსუნში წმინდა კონსტანტინემ (ბერობაში კირილემ) რუსულ ენაზე დაწერილი სახარება და ფსალმუნი იპოვა.  შემდეგ მოძებნა ისეთი ადამიანი, რომელიც  რუსულს ფლობდა და მას სლავური ენა შეასწავლა. ამის შემდეგ წმინდა ძმები თურქებთან შეჩერდნენ, რათა  იუდეველებისთვის და მუსლიმანებისთვის სახარება ექადაგათ და ესწავლებინათ.


***
მეთოდეს დახმარებით მისმა ძმამ, კირილემ სლავურ ენაზე თარგმნა საღვთისმსახურო წიგნები - სახარება, სამოციქულო, ფსალმუნები, რის გარეშეც შეუძლებელი იქნებოდა მსახურების სლავურ ენაზე ჩატარება. იტალიაში, რომში ყოფნის დროს კირილემ სასწაულებრივად იხილა უფალი და გაიგო თავისი აღსრულების დრო. ის აღიკვეცა სქემაში კირილეს სახელით. სქემის მიღებიდან 50 დღეში 869 წლის 14 თებერვალს მოციქულთასწორი კირილე 42 წლის ასაკში გარდაიცვალა. წმინდა კირილემ მის ძმას - მეთოდეს გადააბარა მათი ერთობლივი საქმის გაგრძელება.

მეთოდემ მრავალი შრომისა და ღვაწლის შემდეგ  იგრძნო აღსასრულის მოახლოება. შეატყობინა მოსწავლეთაგან ერთ-ერთს და გაანდო აღსრულების დღე. წმინდანი 885 წლის 6 აპრილს, დაახლოებით 60 წლის ასაკში გარდაიცვალა. მან გარდაცვალებამდე სამ ენაზე იგალობა: სლავურ, ბერძნულ და ლათინერ ენებზე. უფალი ადიდა  და თავისი წმინდა სული უფალს შეავედრა. ის დაასაფლავეს ვალეგრადის მთავარ ტაძარში.

დიდია წმინდა მოციქულთასწორი ძმების -კირილესა და მეთოდეს ღვაწლი სლავი ხალხის წინაშე. შეგვეწიოს მათი წმინდა ლოცვა სრულიად მართლმადიდებელი ეკლესიის შვილებს. ამინ!