წმინდა ადრიანე, ღირსი ბედას თანახმად წარმოშობით აფრიკიდან იყო. ადრიანი გახდა ნერიდას მონასტრის იღუმენი, ნეაპოლთან ახლოს იტალიაში, როდესაც ჯერ კიდევ ძალიან ახალგაზრდა იყო. მას პაპმა ვიტალიანმა ორჯერ შესთავაზა კენტერბერიის არქიეპისკოპოსის ვაკანტური თანამდებობა, მაგრამ მან თავმდაბლად უარი განაცხადა დანიშვნაზე. მან თავდაპირველად რეკომენდაცია გაუწია ენდრიუს, ახლომდებარე მონასტრის ბერს, რომელმაც ასევე უარი თქვა ასაკის გამო. შემდეგ, როდესაც ეპისკოპოსობა კვლავ შესთავაზეს ადრიანეს, მან პონტიფიკოსს წარუდგინა თავისი მეგობარი თეოდორე ტარსელი, რომელიც მაშინ რომში იმყოფებოდა და რომელმაც თანხმობა განაცხადა ამ პასუხისმგებლობის აღებაზე. თუმცა, ვიტალიანმა პირობად დაუდო, რომ ადრიანე უნდა გაჰყოლოდა ახალ არქიეპისკოპოსს ბრიტანეთში. მან მიზეზად დაასახელა, რომ ადრიანეს, რომელაც მანამდე ორჯერ იმოგზაურა გალიაში, იცოდა გზა და მოგზაურობის წესი.

ისინი რომიდან გაემგზავრნენ 668 წლის 27 მაისს და ზღვით მიაღწიეს მარსელს, გადაკვეთეს ქვეყანა არლამდე, სადაც დარჩნენ არქიეპისკოპოს იოანესთან,მაგრამ ადრიანი საფრანგეთში მაჟორდომმა ებრუანმა დააკავა, რომელსაც ეჭვი ჰქონდა, რომ ის ინგლისის მეფეებთან იმპერატორ კონსტანტე II-ის საიდუმლო მისიით მიემგზავრებოდა. მხოლოდ ორი წლის შემდეგ მაჟორდომმა აღმოაჩინა, რომ მისი ეჭვი უსაფუძვლო იყო და ადრიანს ინგლისში გამგზავრების ნება დართო.

ინგლისში ჩასვლისთანავე, არქიეპისკოპოსმა თეოდორემ ის წმინდა მოციქულების პეტრესა და პავლეს მონასტრის იღუმენად დანიშნა კენტერბერიში. ადრიანი თეოდორეს თან ახლდა მის სამოციქულო მოგზაურობებში ინგლისში და ეხმარებოდა მას გონივრული რჩევებით ადგილობრივი საეკლესიო წეს-ჩვეულებებისა და წესების რომაულთან შესაბამისობაში მოყვანის საქმეში. ასე, ადრიანმა შემოიღო რომაული გრიგორიანული გალობის ტრადიცია ინგლისურ ეკლესიებში.


იმ ეპოქის დასავლეთის ერთ-ერთი ყველაზე განათლებული ადამიანი, ადრიანმა ბევრი გააკეთა ინგლისში მეცნიერების განვითარებისთვის, ასწავლიდა ბერძნულ და ლათინურ ენებს, თარგმნიდა ძველ ინგლისურზე. მისი ხელმძღვანელობით კენტერბერიის სკოლა გახდა განათლების ცენტრი ინგლისში, ბევრი სხვა სკოლა დაარსდა ქვეყნის სხვადასხვა ნაწილში. ამ სკოლებში განათლება მიიღეს მრავალმა წმინდანმა, მეცნიერმა და მქადაგებელმა, რომლებმაც მომდევნო საუკუნის განმავლობაში რწმენისა და სწავლების შუქი შეინარჩუნეს საფრანგეთსა და გერმანიაში. მისი ერთ-ერთი მოწაფე იყო წმინდა ალდჰელმი.

ინგლისში ოცდაცხრამეტი წლის მოღვაწეობის შემდეგ ადრიანი უფალთან მიიცვალა 709 წლის 9 იანვარს  და დაკრძალულ იქნა კენტერბერიში.

ადრიანის მემკვიდრე გახდა მისი მოწაფე ალბინი.

1091 წელს აღმოჩენილ იქნა წმინდანის უხრწნელი და კეთილსურნელოვანი წმინდა ნაწილები.

წმინდა ანდრიანეს ხსენების დღეა 9 იანვარი (კელტ. და ბრიტ., ბერძ. [2]), 30 იანვარი (იტალ.)