ღირს იოანეს უკრაინის მართლმადიდებელი ეკლესია კურსკელ წმინდანთა შორის მოიხსენიებს. ერისკაცობაში ივანე კრიუკოვი, დაიბადა 1795 წელს კურსკში. წმინდა სერაფიმე საროველის გავლენით, ყრმობიდანვე შეიყვარა მონაზვნობა და მხოლოდ 38 წლისამ მოახერხა კურსკში, გლინის უდაბნოში მორჩილად შედგომა, შვიდი წლის შემდეგ მანტიით შემოსეს, იოანიკეს სახელით. 11 წელი გაატარა მან ამ სავანეში და წარემატა სულიერად.შემდეგ ის წინამძღვრის მიწვევით ხარკოვის ეპარქიაში, მთაწმინდის მიძინების სახელობის უდაბნოში გადავიდა, სადაც იკონომოსად დაადგინეს და ბევრი იღვაწა ამ სავანის აღშენებისთვის. მოგვიანებით მას მღვდელ-მონაზვნად ხელი დაასხეს. იგი 1850 წელს ერთ-ერთ მღვიმეში დაეყუდა და ორი წლის შემდეგ სქემა შეიმოსა იოანეს სახელით, სადაც უდიდეს ღვაწლში, 17 წელი გაატარა, მხოლოდ თვეში ერთხელ ტოვებდა მღვიმეს, მონასტრის ეკლესიაში, რომ ზიარებოდა. უფალმა მოსაგრე ცხოვრების, ღვთისა და მოყვასის თავდაუზოგავი სიყვარულის გამო მას უბოძა მადლი მოუკლებელი ლოცვისა, ნიჭი განსჯისა, დაფარულმცოდნელობისა, კურნებისა, სასწაულმოქმედებისა. მუდმივად ბნელ მღვიმეში ყოფნის გამო ღირსი მამა დაბრმავდა და სიცოცხლის ბოლოს მხოლოდ იესოს ლოცვას იმეორებდა. ღირსი მამა 1867 წლის 11 აგვისტოს გარდაიცვალა. მის საფლავზე მრავალი სასწაული აღესრულა. 1995 წელს უკრაინის მართლმადიდებელმა ეკლესიამ იოანე მთაწმინდელი წმინდანად შერაცხა.