წარმოშობით იყო არტას მიდამოებიდან, რომელიც ეპირშია. თავდაპირველად ეკუთვნოდა მართლმადიდებელ ეკლესიას, მაგრამ ახალგაზრდა ასაკში ერთ-ერთი ნათესავის გავლენით მიიღო ისლამი. შემდგომში გადასახლდა ქალაქ პატრაში, პელოპონესზე, სადაც თავს ჭონების გაკეთებით ირჩენდა. თუმცა თავის სახლში ჩუმად ინახავდა აღაპი კრეტელის წიგნს "ცოდვილთა ცხონებას". ის ყოველდღიურად კითხულობდა წიგნს, უხვად ღვრიდა ცრემლებს და შესთხოვდა ქრისტეს, მისთვის სინანულის გზა ეჩვენებინა. ბოლოს, ვეღარ გაუძლო სინდისის ქენჯნას, მივიდა ერთ ღვთისმოსავ მღვდელთან, მის წინაშე ღვთის ღალატი აღიარა. უთხრა, - ქრისტეს აღმსარებლობა მსურსო. მღვდელმა სიფრთხილის გამოჩენა ურჩია, უთხრა, განმარტოებით ორმოცი დღე იმარხულე და ილოცე და ამით გამოსცადე შენი გადაწყვეტილება. ოცი დღის შემდეგ ზქარიამ ვეღარ შესძლო იმ ღვთაებრივი სიყვარულის დათმენა, რომელიც მის გულში ღვიოდა, და შეევედრა მღვდელს, ნება მიეცა, წასულიყო და ქრისტესთვის წამებულიყო. ის წარსდგა ყადის წინაშე და მშვიდი პატივისცემის ტონით აუწყა თავისი ქრისტიანობა. მასზე ვერც მუქარამ და ვერც ალერსიანმა დაპირებებმა ვერ იმოქმედეს. მაშინ ზაქარია დილეგში ჩააგდეს და დღეში სამჯერ გამათრახება მიუსაჯეს. მოწამე სიხარულით შეხვდა განაჩენს და ყოველი მათრახის დარტყმისას იესო ქრისტეს შეწყალებას სთხოვდა. როცა ტკივილი გაძლიერდებოდა მდუმარედ თვალებს ზეცისკენ აღაპყრობდა. ერთ ღამეს ჯალათმა მისი სიკვდილი გადაწყვიტა და მარწუხებით ფეხები გადაამტვრია, თვითონ კი სავახშომოდ წავიდა. როდესაც წმინდა ზაქარია გარდაიცვალა, საპყრობილე კეთილსურნელებით აივსო. თურქებმა მოწამის სხეული ჩააგდეს გამომშრალ ჭაში აია-ტრიადას უბანში, და ღამით ქრისტიანებმა დაინახეს ნათელი ჭის თავზე. ახალმოწამის ნაწილები არ შემონახულა. წმინდა ზაქარია 1782 წელს ეწამა.

წმინდა ზაქარიას ცხოვრება შეტანილ იქნა ღირსი ნიკოდიმოს ათონელის "ახალ მარტვილოლოგიაში". მისი საგალობელი შეადგინა 1969 წელს ბერმა გერასიმე მიკრაიანნანიტმა. მოწამე ზაქარიას უძველესი ცნობილი ხატი დაიწერა 1881 წელს კონსტანტის, კატო-პანაგიას მონასტრის (ქვემო ყოვლადწმინდა ღვთისმშობლის მონასტრის) წინამძღვრის დაკვეთით, არტას მახლობლად. 1989-1990 წლებში ამ მონასტერში აღიმართა ნეობიზანტიური სტილის გუმბათოვანი ჯვრის ტაძარი ახალმოწამე ზაქარიას სახელზე.