ღირსმოწამე მალაქია როდოსელი, იერუსალიმელი (ბერძნულად: Μαλαχίας; 1500 - 1534 წლის შემდეგ), ხსენების დღე: 29 სექტემბერი (ბერძნული კალენდრით), დოდეკანესის (ბერძნული) და როდოსის (ბერძნული) წმინდანთა კრებულში და კონსტანტინოპოლის აღების შემდეგ წამებულ ახალმოწამეთა კრებულში (ბერძნული).

დაიბადა 1500 წელს როდოსის კუნძულზე, ლინდოსში, მღვდელ გიორგისა და მისი მეუღლის ქრისტინეს ოჯახში. ასკეტური ცხოვრების სურვილით, 22 წლის ასაკში მან დატოვა მშობლების სახლი, უარი თქვა საკუთრებაზე და გაემგზავრა კოლოსში, შემდეგ კი ლამფსაკში. იგი იმყოფებოდა ეგეოსის ზღვის მრავალ კუნძულზე, ფინიკიაში, სინაიზე, ეგვიპტესა და ლიბიაში. მოგზაურობის დროს ის ბერად აღიკვეცა.

იერუსალიმში ჩასვლის შემდეგ, მალაქია უფლის საფლავის ტაძრის მსახური გახდა. ერთხელ თურქებმა ცილი დასწამეს მას მუსულმანური რწმენის შეურაცხყოფაში და ქალაქის მმართველთან მიიყვანეს, რომელმაც წმინდანს ისლამის მიღება მოსთხოვა. მალაქიამ თავისი კატეგორიული უარი შეურაცხმყოფელი ჟესტით გამოხატა: მან მმართველს სახეში ფეხსაცმელი ესროლა. გაცოფებულმა თურქებმა არა მხოლოდ სცემეს მალაქიას, არამედ ცხენზე მიაბეს და ქალაქის გარეთ ქუჩებში ათრიეს. წამების შემდეგ წმინდა მალაქია ქალაქის კედლებს გარეთ დაწვეს (სხვა ცნობებით, სარზე წამოაგეს). ქრისტიანებმა გამოისყიდეს მისი სხეული და დაკრძალეს.

წმინდა მალაქიას მოწამეობრივი აღსასრული მოხდა იერუსალიმის პატრიარქ გერმანეს (1534-1579) პატრიარქობის წლებში, ანუ წმინდანი ეწამა არა უადრეს 1534 წლისა. დუკაკისის "ახალი მარტიროლოგია" შეცდომით ათარიღებს წმინდანის გარდაცვალებას 1500 წლით.

ღირსი მოწამე მალაქიას ცხოვრება შემონახულია ხელნაწერში Ath. Vatop. 780. Fol. 232-235. იგი არ იყო შეტანილი არც ღირსი ნიკოდიმოს ათონელის "ახალ მარტიროლოგიაში", არც წმინდა მაკარი (ნოტარას), კორინთოს მთავარეპისკოპოსის "ახალ ლიმონარში". მისი მოკლე გადმოცემა შევიდა კ. დუკაკისის მიერ შედგენილ "ახალ მარტიროლოგიაში". მსახურება, სავედრებელი კანონი და აკათისტო წმინდანისადმი დაიწერა XXI საუკუნის დასაწყისში როდოსის მიტროპოლიტ კირილეს (კოგერაკისის) მიერ და შეტანილია "როდოსის ლიმონარში".