დაიბადა 1662 წელს სოფელ ზაგორაში, პელიონში. მისი მშობლები იყვნენ ღვთისმოსავნი და ადრეული ბავშვობიდან ასწავლიდნენ თავიანთ შვილს ღმერთის რწმენას და მისი ნების მიხედვით ცხოვრებას. ახალგაზრდობიდანვე ტრიანდაფილე სიხარულით დადიოდა სოფლის ეკლესიაში, სადაც ეხმარებოდა მღვდელს და სოფლის მგალობელს. განსაკუთრებულ მოწიწებას გამოხატავდა ყოვლადწმინდა ღვთისმშობლისა და წმინდა გიორგის მიმართ და ამიტომ ხშირად მიმართავდა მათ ლოცვით.

მალე მისი მშობლები გარდაიცვალნენ. გადარჩენის მიზნით, მან დაიწყო სამსახურის ძებნა. მოხდა ისე, რომ ვიღაც კაპიტანმა აიყვანა იგი თავის გემზე მეზღვაურად. ეს გემი მოგზაურობდა ეგეოსის ზღვის ჩრდილოეთ ნაწილში და ტვირთები გადაჰქონდა. დროდადრო მეზღვაურები, რომელთაგან ბევრი თურქი იყო, კარგად ეპყრობოდნენ წმინდანს, მაგრამ ზოგჯერ უხეშად იქცეოდნენ, დასცინოდნენ და აბუჩად იგდებდნენ მას, რადგან ის იყო ძალიან ღვთისმოსავი ადამიანი. მაგრამ ტრიანდაფილე არ კარგავდა სიმამაცეს და განაგრძობდა ლოცვას კიდევ უფრო მეტი მგზნებარებით, ყველა თავისი იმედი მხოლოდ ღმერთზე ჰქონდა დამყარებული.

ერთხელაც გემი კონსტანტინოპოლის პორტში შევიდა. მაშინ თურქებმა სხვადასხვა საბაბით დაუწყეს ჩაგვრა წმინდანს. მოძულეები მივიდნენ სულთნის რწმუნებულთან და დაიწყეს ტრიანდაფილეს ცილისწამება, ამბობდნენ, რომ მან თითქოს გადაწყვიტა ისლამის მიღება, შემდეგ კი გადაიფიქრა, არ შეასრულა თავისი სიტყვა და ამგვარად შეურაცხყო მუჰამედ წინასწარმეტყველის რწმენა. ტრიანდაფილე დააპატიმრეს. მას არწმუნებდნენ უარეყო ქრისტიანული რწმენა, რათა თავიდან აეცილებინა მოსალოდნელი სასჯელი. მაგრამ წმინდანმა მამაცურად განაცხადა: "მე არასოდეს უარვყოფ ჭეშმარიტ ღმერთსა და ჩემს მაცხოვარს იესო ქრისტეს!"

მაშინ თურქებმა სცემეს წმინდანს და საშინლად აწამეს. მისი სიმამაცისა და რწმენაში სიმტკიცის დანახვისას, მათ მალე გააცნობიერეს, რომ ვერ შეძლებდნენ მის მუსულმანად ქცევას. ამიტომ ის წაიყვანეს იგი კონსტანტინოპოლის იპოდრომზე, სადაც ათასობით ქრისტიანი იქნა მოკლული და მანაც იქ დაღვარა თავისი სისხლი უფლის სადიდებლად. როცა თავი მოჰკვეთეს წმინდანს, მაშინ ის მხოლოდ 18 წლის იყო. ეს მოხდა 1680 წლის აგვისტოში.

სამი საუკუნის შემდეგ სოფელ ზაგორაში აღიმართა ტაძარი, აგებული მოწამე ტრიანდაფილის პატივსაცემად.

ხსენების დღეა 8 აგვისტო (ბერძნული, რუსეთის საზღვარგარეთული მართლმადიდებლური ეკლესია) და კონსტანტინოპოლის დაცემის შემდეგ წამებულ ახალმოწამეთა კრებული (ბერძნული)

ხატის წყარო