წმინდა მოწამე ელიკონიდა III საუკუნეში ქრისტიანთა დევნას შეეწირა და მოწამის გვირგვინი დაიდგა. უფალმა ქრისტიანობის საქადაგებლად კორინთოში ჩასული ქალწული ჯერ გახურებული ღუმლის ცეცხლისაგან, შემდეგ კი მშიერი ლომის ხახისგან იხსნა, თუმცა ბოლოს კორინთოს წარმართმა მმართველმა მას თავი მოჰკვეთა. წმინდა მოწამე ელიკონიდა ცხოვრობდა ქალაქ თესალონიკში III საუკუნეში. ქრისტიანთა დევნის დროს წმინდანი კორინთოში ჩავიდა წარმართთა შორის ქრისტიანობის ქადაგება დაიწყო. როდესაც კორინთოში ჩასულმა ელიკონიდამ დაინახა როგორ სწირავდნენ იქაურები უსულო კერპებს მსხვერპლს, მაღალ ადგილზე ავიდა და შესძახა:

- უაზრო და უგულო კორინთელნო! მარადიულ ღმერთს აქციეთ ზურგი და უსულო კერპებს სცემთ თაყვანს. შეხედეთ მაღლა ზეცას და დაბლა მიწას. დაფიქრდით, ვინ შექმნა ის?! ვინ შექმნა მიწისგან ადამიანი და შთაჰბერა მას უკვდავი სული?! ერთადერთი ჭეშმარიტი ღმერთი ზეცაში მკვიდრობს. დავით წინასწარმეტყველი ბრძანებს: "რადგან ხალხთა ყველა ღმერთი კერპებია, ხოლო უფალმა შეჰქმნა ცანი" (ფს.95.5).

წარმართმა კორინთელებმა ელიკონიდა შეიპყრეს და ქალაქის მმართველ პერინიუსს მიჰგვარეს. ის შეეცადა, ტკბილი სიტყვით დაეყოლიებინა ქალწული მსხვერპლი შეეწირა კერპებისთვის და ზურგი ექცია ქრისტესთვის. რომ არაფერი გამოუვიდა, ბრძანა, სასტიკად ეცემათ. ვერც ცემამ გატეხა წმინდა ქალწული. მაშინ ის კორინთოს მმართველის ბრძანებით გახურებულ ღუმელში ჩააგდეს, მაგრამ ცეცხლიდან უვნებელი გამოვიდა. ამის მხილველმა მმართველმა ჯადოქრობა დასწამა წმინდანს და კვლავ სატანჯველად გადასცა ჯალათებს, შემდეგ ბრძანა, შეეწყვიტათ წამება და ელიკონიდას პატივსა და ქურუმების წოდებას დაჰპირდა, თუ კერპთაყვანისცემის რიტუალს აღასრულებდა. მოულოდნელად წმინდანი დათანხმდა. გახარებულმა ქურუმებმა და ხალხმა ყიჟინით წაიყვანეს მოწამე სამსხვერპლოში და მისივე თხოვნით მარტო დატოვეს. ღვთის ნებით ელიკონიდა უეცრად გოლიათური ძალით აღივსო და ყველა კერპი დალეწა. შეძრწუნებულმა ქურუბიმებმა მისი სიკვდილით დასჯა მოითხოვეს. სასჯელის მოლოდინში საპყრობილეში გამომწყვდეულ წმინდა აღმსარებელს მაცხოვარი გამოეცხადა წმინდა მიქაელ და გაბრიელ მთავარანგელოზების თანხლებით და წყლულებისაგან განკურნა. ხუთი დღის შემდეგ ელიკონიდასთან სამი დამშეული ლომი შეუშვეს, მაგრამ მხეცები მორჩილად მიუახლოვდნენ მას და ფეხები აულოკეს. გამხეცებული წარმართთა ბრბო მოითხოვდა, მოეკვდინებინათ წმინდანი. ლომები გამოცვივდნენ საკნიდან და ხალხს დაერივნენ. პერინიუსის ბრძანებით, წმინდანს თავი მოჰკვეთეს. ეს მოხდა 244 წელს. ქრისტიანებმა პატივით დაკრძალეს მოწამის ნეშტი.
......................................

წმინდა მოწამენი: კრისკენტი, პავლე და დიოსკორიდე (+326)

წმინდა მოწამენი: კრისკენტი, პავლე და დიოსკორიდე რომში ეწამნენ ქრისტესთვის 326 წელს.