წმინდა პატრიკიოსის სამღვდელმთავრო კათედრა მდებარეობდა ბითვინიაში (ქვეყანა მცირე აზიაში, ზღვის პირას) ქალაქ პრუსიადაში. ის უშიშრად ამხელდა წარმართთა ცდომილებას და ქადაგებდა ქრისტეს რწმენას; მისმა ქადაგებამ მრავალი წარმართი მოაქცია ქრისტესკენ, რისთვისაც შეიპყრეს წარმართებმა სამ ხუცესთან - აკაკის, მენანდრესა და პოლიენოსთან ერთად და დასაკითხად მიიყვანეს ბითვინიის მხარის მმართველ იულიუსთან, რომელიც კერპთა გულმხურვალე მსახური იყო. ეს უკანასკნელი სამკურნალოდ თბილ წყლებზე გაემგზავრა და ბორკილდადებული ეპისკოპოსისა და ხუცესების თან წაყვანა ბრძანა. იულიუსი ჩავიდა წყლებზე, განიბანა, მსხვერპლი შესწირა მკურნალობის ღვთაება ასკლეპიოსს და ქალღმერთ სოტერს, მერე კი სამსჯავროში წმინდა პატრიკიოსისა და ხუცესების მოყვანა ბრძანა და მიმართა წმინდანს:

- უგუნურო, ქრისტეს მოუწოდებ და ცარიელი ზღაპრების გჯერა! შეხედე, რაოდენ დიდია ჩვენი ღმერთების ყოვლისშემძლეობა. ხედავ, როგორი სამკურნალო ძალა მისცეს წყლებს ჩვენს სასიკეთოდ. უპირველესად, გულისხმაჰყავ ჩვენი მამის, ასკლეპიოსის ძალა და მოწყალება! თუ გსურს წამებას თავი დააღწიო და მშვიდობიანად დაბრუნდე სამშობლოში, დაემხე, ლოცვით თაყვანი ეცი და მსხვერპლი შესწირე მას.

წმინდა პატრიკიოსმა უპასუხა:

- რამდენი ბოროტება თქვი შენს მცირე სიტყვაში, მმართველო!

მმართველი განრისხდა:

- განა ასეთი რა გითხარი? ან რაში უნდა მამხილო, უბედურო! შენ თვითონვე უნდა აღიარო ის, რაც აშკარაა, ცხადია: განა არ იხილე ჩვენი ყოვლისშემძლე ღმერთების მიერ თბილი წყლების ძალით განკურნებული ხალხი?

რაზეც წმინდა პატრიკიოსმა უპასუხა:

- ბრწყინვალე მმართველო, თუ გსურს გაიგო, როგორ გამოედინება, ანდა საიდან აქვს სამკურნალო ძალა თბილ წყლებს, მომისმინე მშვიდად და გეტყვი.

- თუმცა ზღაპრების გარდა, არაფერს მომიყვები, მაგრამ მაინც თქვი, რათა გავიგო, რისი თქმა გსურს.

- მე ზღაპრების კი არა, ჭეშმარიტების თქმა მსურს.

- მაშინ აბა, მითხარი, ჩვენი ღმერთების ძალის გარდა, სხვა რა ძალა აქვს თბილ წყლებს?

- მე ქრისტიანი ვარ და ყველა, ვინც აღიარებს ქრისტიანობის სიწმინდეებს და თაყვანის სცემს ერთადერთ ჭეშმარიტ ღმერთს, შეუძლიათ შეიცნოს საღმრთო საიდუმლოებანი. თუმცა ცოდვილი ვარ, მაგრამ ქრისტეს მონა ვარ, ვიცი და შემიძლია სიმართლე გითხრა ამ წყლების შესახებ.

- ნუთუ იმდენად უგუნური ხარ, რომ ჩვენს ბრძენ ფილოსოფოსებზე ჭკვიანი გგონია თავი?

- რამეთუ სიბრძნე ამის სოფლისაჲ სიცოფე არს წინაშე ღმრთისა, რამეთუ წერილ არს: რომელმან შეიპყრნის ბრძენნი სივერაგითა მათითა. უფალი ჩვენი იესო ქრისტე განადიდებდა ზეციურ მამას, თქვა: "აღგიარებ შენ, მამაო, უფალო ცისა და ქუეყანისო, რამეთუ დაჰფარე ესე ბრძენთაგან და მეცნიერთა და გამოუცხადე ესე ჩჩჳლთა. ჰე, მამაო, რამეთუ ესრეთ სათნო-იყო შენ წინაშე".

- გაუგებრად ჰყვები. შენ ის მითხარი, როგორ მოედინება ეს სამკურნალო წყლები?

წმინდა პატრიკიოსმა უთხრა, რომ ყოველი ქმნილების შემოქმედი ქრისტეა. და აღუწერა, თუ როგორ გამოედინება ცხელი წყლები.

მოისმინა რა მმართველმა, ჰკითხა:

- მაშ, ქრისტეს უწოდებ ზეცის შემოქმედს.

წმინდა პატრიკიოსმა დაუდასტურა.

- თუ მე შენ ცხელ წყალში ჩაგაგდებ, რომლის შემოქმედადაც შენ ქრისტეს მიიჩნევ, მაშინ მან გადაგარჩინოს.

- მე ვიცი ძალა ჩემი ქრისტესი, მას, თუ მოისურვებს, შეუძლია საღსალამათი და უვნებელი გამომიყვანოს მაგ წყლებიდან. მე კი მინდა, რომ მაგ წყლების საშუალებით გავთავისუფლდე ამ წუთისოფლიდან და საუკუნოდ ვიცხოვრო ქრისტესთან; მიუხედავად ამისა, აღსრულდეს ჩემზე უფლის წმინდა ნება. დაე, იცოდეს ყველამ, ვინც ახლა მისმენს, ყველა, ვინც ეთაყვანება როგორც ღმერთს, უსულო ქვებს, ჯოჯოხეთის საუკუნო ცეცხლი ელის.

მმართველი განრისხდა და ბრძანა, გაშიშვლებული წმინდანი ცხელ წყალში ჩაეგდოთ. წმინდანმა ზეცას მიაპყრო თვალნი და უფალს შეწევნა სთხოვა. როცა წმინდა პატრი¬კიოსი წყალში ჩააგდეს, შხეფები იქ მყოფთ შეესხათ და საშინლად დასწვა. წმინდანი კი, თითქოს ცივი წყალი ყოფილიყო, უვნებელი დარჩა და ადიდებდა ღმერთს. ამან უარესად განარისხა მმართველი, ბრძანა, წყლიდან ამოეყვანათ და თავი მოეკვეთათ წმინდა პატრიკიოსისთვის. წმინდა პატრიკიოსმა უკანასკნელი ლოცვა წართქვა, ქედი წარუპყრა მახვილს და მოწამებრივად აღესრულა. მასთან ერთად თავები მოჰკვეთეს მის სამ ხუცესსაც. წმინდა მოწამეები ქრისტეს შობიდან 100 წელს აღესრულნენ ქრისტესთვის.

კონდაკი

ვითარცა რა ნათელი ბრწყინვალე მღვდელობისა შუენიერებითა და წამებისა სისხლითა ყოვლად განშუენებული, სდგა შენ წინაშე ქრისტესა თანა მოღუაწითურთ შენით, პატრიკი, მოგვიხსენენ ჩუენცა შემსხმელნი თქუენი, ვითარცა რა პატიოსანთა მოწამეთა.