წმინდა კრისკენტი ლიკიის ქალაქ მირონში დიდგვაროვანთა ოჯახში დაიბადა და თვითონაც ძალზედ ცნობილი კაცი იყო. ხედავდა რა რომ მრავალნი ეთაყვანებოდნენ კერპებს, ის ერთხელ კერპთაყვანისმცემელთა შორის შევიდა და მათ მოუწოდა დაეტოვებინათ შეცთომილება, ეწამათ ქრისტე და გადარჩენილიყვნენ. როცა ამის შესახებ ოლქის მმართველმა შეიტყო, ბრძანა, იგი შეეპყრათ და მასთან სამსჯავროზე მიეყვანათ. სასამართლოზე მსაჯული წმინდანს ეკითხებოდა, თუ ვინ იყო, რა ერქვა მამამისს, მაგრამ კრისკენტი საკუთარ თავს ქრისტიანს უწოდებდა და სხვას არაფერს პასუხობდა. მაშინ მმართველმა მას უთხრა:

- მხოლოდ გარეგნულად შესწირე კერპებს მსხვერპლი, სულით კი შენს ღმერთს ეცი თაყვანი.
მაგრამ წმინდანმა გაბრაზებულმა უარყო ასეთი წინადადება და ყველას წინაშე აღიარა ჭეშმარიტება, ხოლო მმართველს უთხრა:

- შეუძლებელია, სხეულმა გააკეთოს ის, რასაც სული არ ფიქრობს, ასე რომ, სული ამოძრავებს და მართავს სხეულს. ამის შემდეგ წმინდა კრისკენტი ჩამოკიდეს და სხეული ბასრი რკინებით დაუსერეს, შემდეგ კი გააცხელეს ღუმელი, როცა ის გავარვარდა, წმინდანი მასში ჩააგდეს და ასე ჩააბარა მან სული თვისი უფალს.


ასევე შეგიძლიათ წაიკითხოთ:

მოწამე კრისკენტი