წმინდა თამარ მეფის სამრევლო
წმინდა თამარის ეკლესია არის ერთ-ერთი ადგილი, სადაც ქართველებმა ერთმანეთი გაიცნეს, ერთმანეთის სიყვარული ისწავლეს.
ცენტრალურ იტალიაში, ტოსკანის რეგიონში, არის ქალაქი ემპოლი. ქართველებისთვის აქაურობა იმით არის მნიშვნელოვანი, რომ აქ დასავლეთ ევროპის მიტროპოლიტის, აბრაამის (გარმელია) ლოცვა-კურთხევით, 2010 წელს დაარსდა წმინდა მეფე თამარის სახელობის სამრევლო, რომელსაც იღუმენი ანდრია (თურმანიძე) წინამძღვრობს. როგორც მამა ანდრიამ ბრძანა, ემპოლში 500 ქართველი ემიგრანტი ცხოვრობს და მათთვის სამრევლოს დაარსებას და ქართულად წირვა-ლოცვის მოსმენას უდიდესი მნიშვნელობა აქვს. აქ წირვა-ლოცვა ხუთშაბათობით აღევლინება. ასევე ტარდება სავედრებელი პარაკლისები წმინდა თამარის სახელზე და ქართველ მრევლს საშუალება აქვს აღსარებისა და წმინდა ზიარების მიღებისა. ფუნქციონირებს მგალობელ ქალთა გუნდი.
სამრევლოს დაარსების მისია
სამრევლოს დაარსების მიზანია, ქართველები არ მოაკლდნენ წირვა-ლოცვის მადლს, დედა ეკლესიის წიაღს, შეინარჩუნონ ქართველობა და საკუთარი ფესვები. ადამიანებს უღვივდებათ სამშობლოს მონატრების სურვილი. სამრევლო ახერხებს იმას, რომ ადამიანებმა შეძლონ სამშობლოში დაბრუნება. წმინდა თამარის ეკლესია არის ერთ-ერთი ადგილი, სადაც ქართველებმა ერთმანეთი გაიცნეს, ერთმანეთის სიყვარული ისწავლეს. წმინდა თამარის ტაძარი დაქირავებულ შენობაშია განთავსებული. ქართველი მრევლის დიდი სურვილი იყო, ჰყოლოდათ ქართველი მოძღვარი, მოესმინათ ქართული წირვა-ლოცვა, გალობა. ტაძრისთვის დაიწერა წმინდა თამარის ხატი, ასევე სხვა ხატებიც - მაცხოვრის, ღვთისმშობლისა და მათ წინაშე ვლოცულობთ. წმინდა თამარის დიდ ძალას და მეოხებას ვგრძნობთ. ჩვენს ტაძარში რამდენიმე ახალშობილის ნათლობა ჩატარდა და მათ თამარი დავარქვით..
ჩვენი ძირითადი მიზანია, ვისწავლოთ ღვთისა და ერთმანეთის სიყვარული, რაც აქ მცხოვრებ ადამიანებს ძალიან გვჭირდება. ეკლესიის მისიაც ეს არის, ვასწავლოთ ერთმანეთს მეგობრობა, სიყვარული. თითქმის ყოველი დღე ერთმანეთის გვერდით ვდგავართ. უცხოეთში სასულიერო პირის მისია და პასუხისმგებლობაც დიდია. აქ მოღვაწე მამებს უფალი ამ ჯვარს გვიმსუბუქებს.
***
წმინდა თამარის სამრევლოს სახელით ვთხოვ ქართველ ემიგრანტებს, არ გააცდინონ წირვა-ლოცვები და ვისწავლოთ, რაც უმთავრესია - უფრო ახლოს მივიდეთ ღმერთთან და ერთმანეთს გვერდით დავუდგეთ. მჯერა, რომ მალე დავბრუნდებით ჩვენ-ჩვენს სახლებში.