წმინდა გრიგოლი იყო წარჩინებული ქრისტიანი ოჯახის შთამომავალი დღევანდელი მისტრას რეგიონიდან და ცხოვრობდა მე-11 საუკუნეში. ბავშვობიდანვე სწავლობდა წმინდა წერილებს და გამოავლინა მონაზვნური ცხოვრებისადმი მონდომება. 16 წლის ასაკში გადაწყვიტა მიეტოვებინა მიწიერი ცხოვრება და მონასტერში წასულიყო, თუმცა მშობლებმა ნება არ დართეს. მოგვიანებით, იგი შეუერთდა მისტრაში მყოფ მონაზონთა ჯგუფს, რათა მათთან ერთად წმინდა მიწაზე მოელოცა. თუმცა, მოულოდნელი მიზეზების გამო, ისინი რომში აღმოჩნდნენ. იქ ახალგაზრდა გრიგოლი ბერად აღიკვეცა ადგილობრივ მონასტერში. შემდგომ ის წმინდა მიწაზე გაემგზავრა, შემდეგ მცირე აზიის ნიკეაში ჩავიდა, იქიდან თრაკიასა და მაკედონიაში გადავიდა და საბოლოოდ ევბეაზე დასახლდა.

ღვთის მადლით აღვსილი გრიგოლის ყოფნამ პატარა ქალაქ ორეოსში საყოველთაო მღელვარება გამოიწვია. ეკლესია, სადაც ის ცხოვრობდა, ყოველდღიურად ივსებოდა მორწმუნეებით, რომლებიც მოდიოდნენ წმინდანის ქადაგების მოსასმენად და ღრმააზროვანი რჩევების მისაღებად. თუმცა, მალევე, ადამიანების მხრიდან პატივისცემის თავიდან ასაცილებლად და სასურველი სიმშვიდის მოსაპოვებლად, ის ტოვებს ორეოსს და სახლდება პატარა კუნძულზე სახელად სტრონგილი, რომელიც ლიხადონისის არქიპელაგს ეკუთვნის ევბეას ჩრდილო-დასავლეთ ნაწილში.

თუმცა, წმინდა გრიგოლის ეს ახალი თავშესაფარიც მალე გახდა ცნობილი და მასთან მოდიოდნენ მდიდრები და ღარიბები, მღვდლები, ეპისკოპოსები და ბერები, რათა ესწავლათ მისგან მონანიების გზა და მიჰყოლოდნენ მის მაგალითს. წმინდა გრიგოლი, "მისტრადან წარმოშობილი", გამოირჩეოდა სათნოების ყველა სფეროში და ხანგრძლივი სიცოცხლის შემდეგ გადავიდა ზეციურ ნეტარებაში, შეხვდა რა თავის მამასა და შემოქმედს. მისი ხსენება ჩვენი ეკლესიის მიერ აღინიშნება ყოველწლიურად ყველა წმინდანის კვირას.

დღეს, სტრონგილის ჩრდილო-აღმოსავლეთ სანაპიროზე არსებობს წმინდა გრიგოლის სავანის ნანგრევები. შენობათა კომპლექსში დღესდღეობით შეიძლება გავარჩიოთ ღვთისმშობლის ტაძარი, წმინდა გრიგოლის საფლავი, სენაკები, შესასვლელი, უზარმაზარი კედლები და სხვა ნაგებობები. სავანის ნანგრევების გარშემო არის უამრავი კრამიტის ნატეხი, ლოდები და ბევრი ქვიშაქვა სავანის შენობებიდან. ძეგლი განსაკუთრებულ ყურადღებას იმსახურებს. წმინდა გრიგოლი არის სპარტის მუნიციპალიტეტის ისტორიული ცენტრის მფარველი და მისტრაში არის ახლად აშენებული ეკლესია მისდამი მიძღვნილი.