წმინდა ბრუნო (მას ხშირად უწოდებენ ბრუნს, ზოგჯერ საქსონელსაც) დაიბადა 925 წლის მაისში ჰენრიხ პირველის და მატილდა ვესტფალიელის სამეფო ოჯახში. ის უმცროსი ვაჟი გახლდათ და სამეფო ტახტის კანდიდატი ვერ გახდებოდა. მისი აღზრდა მშობლებმა ეპისკოპოს ბალდერიხ უტრეხტელს მიანდეს. 939 წელს სწავლის გასაგრძელებლად სამეფო კარზე ირლანდიის ეპისკოპოსი ისრაელი მოიწვიეს. ამის მერე თვითონ ბრუნოს ავალებენ სამეფო კარის სამღვდელოების განსწავლას. 15 წლის ბრუნო იმპერიის კანცლერად დანიშნეს. 950 წელს წმინდანს მღვდლად დაასხეს ხელი. ერთი წლის შემდეგ ის თავისი ძმის, დიდად წოდებული ოტონ I-ის სამეფო კარის არქიკანცლერი ხდება. ხოლო 953 წელს კიოლნის მთავარეპისკოპოსობა იმავე დროს ლოთარინგიის ჰერცოგობა უბოძეს. სწორედ აქ გამოჩნდა მისი გონიერება, შორსმჭვრეტელობა, იგი საიმედო თანამოღვაწე იყო იმპერატორისა და დიდებულად აღმსრულებელი მისი საკლესიო პოლიტიკისა. ბრუნოს აზრი ყველასთვის ერთნაირად მნიშვვნელოვანი იყო და ხშირად ოსტატურად აცხრობდა საოჯახო კონფლიქტებს.

ბრუნო კიოლნის პირველი მთავარეპიკოპოსი იყო, რომლის ხელშიც საერო და სასულიერო ხელისუფლება გაერთიანდა. იცოდა განათლების ფასი. ის მთელი იმპერიიდან საუკეთესო მოწაფეებს იღებდა თავის სამონასტრო სკოლებში და ამ ყმაწვილებს ეპარქიაში სასულიერო მსახურებისთვის ამზადებდა. წმინდა ბრუნო დიდის აქტიური მონაწილეობით გაგრძელდა კიოლნის ტაძრის მშენებლობა და დაიწყო წმინდა ანდრია მოციქულის სახელობის ეკლესიის შენება. ხოლო კიოლნში ჩამოაბრძანეს წმინდა პეტრეს კვერთხი და მისი ჯაჭვის ნაწილი. თანამედროვენი წმინდა ბრუნოს დიდად აფასებდნენ ერუდიციისა და ღვთისმოშიშებისთვის. წმინდა ბრუნომ კიოლნში რამდენიმე სააბატო დააარსა.

გარდაიცვალა 11 ოქტომბერს რეიმსში. წმინდა ბრუნოს უკანასკნელი სურვილით მისი ნეშტი კიოლნში გადაასვენეს და წმინდა დიდმოწამე პანტელეიმონის ტაძრის კრიპტში დაკრძალეს.