წმინდა ტიმოთე 1510 წელს ატიკაში, სოფელ კალამოსში, მღვდლის ოჯახში დაიბადა. ის ყრმობიდანვე ღვთისმოშიშებით გამოირჩეოდა და ამიტომ ოროპიის ეპისკოპოსმა ათენში სასწავლებლად გაგზავნა. წლების შემდეგ თავის მფარველს განსწავლული დაუბრუნდა, მღვდელმთავარმა ჯერ დიაკვნად და შემდეგ მღვდლად აკურთხა. ეპისკოპოსის გარდაცვალების შემდეგ წმინდა ტიმოთე ერთხმად აირჩიეს მის ნაცვლად. შემდეგ კი ევრიპიის (ანუ ევბეას) მთავარეპისკოპოსად დაადგინეს. წმინდა მღვდელმთავარი დიდად ანუგეშებდა ოსმალეთის იმპერიის ტყვეობაში ჩავარდნილ ბერძენ ხალხს. როცა სულთან სელიმ II-ს ზეწოლით პატრიარქმა იერემია II-მ დაადგინა, რომ საბერძნეთის ამ ოლქის ყველა ტაძარი მეჩეთად უნდა გადაკეთებულიყო, მორწმუნეებმა მთებს შეაფარეს თავი და იქ დაიწყეს ეკლესიების მშენებლობა. წმინდა ტიმოთემ გაბედულად გამოხატა პროტეს¬ტი. თურქების რეაქციამ არ დააყოვნა და მის შესაპყრობად ხალხი გამოგზავნეს. თურქი მმართველის ცოლმა, ფარულმა ქრისტიანმა წმინდა ტიმოთეს საფრთხის შესახებ შეატყობი¬ნა და მანაც შეძლო გაქცევა. ის ატიკაში პენტელიკის მთაზე დასახლდა, რომელსაც უბიწოთა მთასაც ეძახდნენ და მრავალი ღირსი მამა მოღვაწეობდა.

ერთხელაც წმინდა ტიმოთემ ღვთისმშობელი იხილა. ამის მერე ერთ ქოხში შევიდა, სადაც ოთხი ჩონჩხადქცეული მამის ნეშტი დახვდა. ერთ-ერთ მათგანს ხელთ ღვთისმშობლის ხატი ჰქონდა (სხვა წყაროთი ხატი მან ზეთისხილის ხეზე იპოვა). ამ ადგილას მან პენტელიის მონასტერი დააარსა, სადაც უამრავი მონაზონი შეუერთდა (1578 წ.).

მონასტერი ფეხზე რომ დააყენა, განმარტოებით მოისურვა ცხოვრება, მაგრამ ეშმაკმა არ მოასვენა. მაშინ წმინდანი უბრალო ნავში ჩაჯდა, თავის მწყემსმთავრის კვერთხზე მანტია იალქნად დაამაგრა და გაცურა. ღვთის შეწევნით ასე მიაღწია კილკადის არქიპელაგის კუნძულ კიას. ჩასვლიდან რამდენიმე დღეში თურქი მმართველის უმცროსი ვაჟი მეკობრეებმა მოიტაცეს. საბრალო დედამისმა ღირს მამას სთხოვა, მისი შვილისთვის ელოცა. წმინდა ტიმოთეს ლოცვის შემდეგ ზღვაზე ამოვარდნილმა ქარიშხალმა აიძულა მეკობრეები, კუნძულზე დაბრუნებულიყვნენ და ტყვე გაეთავისუფლებინათ. ბავშვის დედამ სამადლობლად ღირს მამას დიდი თანხა აჩუქა, რომლითაც მან წმინდა პანტელეიმონის ეკლესია დააარსა, ის შემდგომში მონასტრად გადაკეთდა. წმინდა ტიმოთე იქ ცხოვრობდა სიცოცხლის ბოლომდე და 1590 წელს გარდაიცვალა. წმინდანის სხეული პენტელიის მონასტერში გადაასვენეს, სადაც უამრავი სასწაული მოახდინა, მათ შორის ათენი და შემდეგ ეგინა ჭირისაგან დაიხსნა.

წმინდა ტიმოთეს პატივს მიაგებს საბერძნეთის მართლმადიდებელი ეკლესია.