წმინდა აღაპიტე ღირსი თეოდოსის მოწაფე გახლდათ. ის პეჩორელი უვერცხლო მკურნალია, რომელიც ლოცვით შეგვეწევა სამშობლოს ერთიანობისა და მშვიდობისათვის მლოცველთ.

წმინდა აღაპიტეს სხეულთან რწმენით მიახლებულნი დღესაც ჰპოვებენ კურნებას.

ეს ღირსი მამა XI საუკუნეში კიევის პეჩორის ლავრაში იღვწოდა, წმინდა ანტონი პეჩორელის მოწაფე იყო და უფალს უწყვეტი ლოცვით ეზრახვოდა.

თუ მონასტრის საძმოდან ვინმე ავად შეიქნებოდა, წმინდანი მიდიოდა, უვლიდა და საკუთარი ხელით დამზადებული ბალახეული წამლებით და, უპირველესად, ლოცვით განამრთელებდა.

სწორედ ამ დროს კიევში ცხოვრობდა ერთი სომეხი ექიმი, რომელიც ერთი შეხედვით სვამდა უტყუარ დიაგნოზს და სნეულთ გარდაცვალების ჟამსაც კი ამცნობდა.

ერთხელ ერთ-ერთი ავადმყოფი მივიდა წმინდა აღაპიტესთან. წმინდანმა საკუთარი ხელით დამზადებული საკურნებელი მისცა, ილოცა და სნეულიც განიკურნა.

ამ ამბავმა სომეხი ექიმი ფრიადი შურით აღძრა, წმინდა მამას ლიქნით მიეახლა და მოწამვლა დაუპირა.

მაგრამ, უფალმა აღაპიტეს სიკვდილი არ დაუშვა, მომაკვდინებელმა შხამმა ძალა დაკარგა და წმინდანი გადარჩა.

სწორედ წმინდა აღაპიტემ განკურნა ვლადიმერ მონომახი - მომავალში კიევის დიდი მთავარი. მადლიერი მონომახი სავანეში თავად ეახლა მკურნალს, მაგრამ აღაპიტე დაიმალა და საჩუქრებიც იუარა.

მცირე ხანში თავად წმინდა აღაპიტე დასნეულდა, მასთან სომეხი ექიმი მივიდა, დახედა და უთხრა: - სამ დღეში მოკვდებიო და აქვე პირობა დადო, რომ თუ მისი ნათქვამი არ აღსრულდებოდა, მართლმადიდებელი ბერი გახდებოდა.

აღაპიტემ უპასუხა, რომ მას უფალმა განუცხადა, კიდევ სამ თვეს იცოცხლებდა.

მართლაც, წმინდანმა სამი თვე იცოცხლა და 1095 წლის 1/14 ივნისს აღესრულა.

სომეხი ექიმი მონასტრის იღუმენთან მივიდა, თავისი აღთქმის შესახებ უამბო, მოინათლა და წარმოთქვა:

- მჯერა, რომ წმინდა აღაპიტე უფლის წმინდანია, მე კარგად ვიცოდი, მისი ავადმყოფობა სამ დღეზე მეტს ვერ გასტანდა და უფალმა მისცა მას კიდევ სამი თვე.

ასე განკურნა და მოაბრუნა ღვთისკენ წმინდანმა სომეხი ექიმი და იხსნა დაღუპვისაგან.

წმინდა აღაპიტეს ლოცვით მისი გარდაცვალების შემდგომაც მრავალი განმრთელდა, ის დღესაც კურნავს იმათ, ვინც რწმენით მიეახლება მის წმინდა და უხრწნელ ნაწილებს.

წმინდა აღაპიტეს უხრწნელი სხეული კიევ-პეჩორის ლავრის ახლო მღვიმეში განისვენებს
.
წმინდა მამაო აღაპიტე, ევედრე ღმერთსა ჩვენთვის!

* * *

ხსენება მღვდელმოწამისა ვასილისა, პრეობრაჟენსკისა, პრესვიტერისა და მოწამისა ვერასი, სამსონოვასი (+1940)