ღირსი თეოდორე დაიბადა კონსტანტინოპოლში, მდიდარ ოჯახში. მან ღვთისთვის დაუტევა მშობლებიც, სიმდიდრეც, პატივიც და ერთ უდაბნოს მონასტერში ბერად აღიკვეცა . ის იმდენად ასკეტურად ცხოვრობდა, იმდენად მოაუძლურა საკუთარი სხეული, რომ მკვდარს მიემსგავსა. მთელი ღამე ლოცულობდა, მიუხედავად სიცხისა, თუ სიცივისა, თავზე არასოდეს იხურავდა, ტანთ კი უხეში სამოსელი ეცვა, რისთვისაც შეარქვეს "სამოსელბალნიანი", ანუ ტრიქვინა. შემდეგ მისი სახელი მისსავე მონასტერს ეწოდა, სადაც ის მოსაგრეობდა. სიცოცხლეშივე აღასრულებდა სასწაულებს და კურნებებს, ეშმაკს განასხმიდა. სიკვდილის შემდეგ მისი წმინდა ნაწილებიდან გადმოდინდა მირონი, რომელიც სნეულებს კურნავდა და ბოროტ სულებს განასხმიდა. იგი IV-V საუკუნეებს შორის ცხოვრობდა. ქართულად არსებობს მისი "ცხოვრების" მეტაფრასული რედაქცია: "მამათა შორის დიდისა და ცხორება-განთქმულისა და საკვირველებათა მიერ მიმოგანსმენილისა თეოდორე ტრიქინაისი, ესე იგი არს სამოსელთბალნიანისაჲ ".

ხატის წყარო