წმინდა ენსვიტა ედბალდ კენტელის და მისი მეუღლის, ემა გალიელის ქალიშვილი იყო, შვილიშვილი - მეფე ეტელბერტ (ალბერტ) კენტელისა (616 წ. 25 თებერვალი), რომელიც ქრისტეს რწმენაზე მოაქცია თვით წმინდა ავგუსტინემ, ინგლისელების განმანათლებელმა. ახალგაზრდობაში წმინდა ენსვიტზე დიდი გავლენა მოახდინა ინგლისელმა მისიონერებმა წმინდა მღვდელმთავრებმა ლავრენტი კენტერბერიელმა, მელეტი ლონდონელმა, იუსტი როჩესტერელმა და უდავოდ მისმა დეიდამ წმინდა დედოფალმა ეტელბურგამ. წმინდა ენსვიტას ცხოვრება მოგვითხრობს, რომ ყოველთვის ისწრაფოდა ღვთის სამსახურისთვის. "მას ვერ წარიტაცებდა ამსოფლიური სიმდიდრე, გულით სწვდებოდა წმინდა წერილს, და მთელი სულით სწყუროდა ცათა სასუფეველი". უარი უთხრა მამას, როდესაც მან წარმართ მეფე ნორტუმბრიზე დაქორწინება შესთავაზა. ამის ნაცვლად ის გალიაში წავიდა, ფარმუტის მონასტერში, რათა მონაზვნური ცხოვრების ანბანი შეესწავლა. დაახლოებით, 630 წელს დაბრუნდა და მღვდელმთავრის ონორე კენტერბერიელის კურთხევით, დაბა ფოლკსტონის თეთრ ფრიალო კლდეებზე, დღევანდელ კენტის საგრაფოში ინგლისში პირველი დედათა მონასტერი დააარსა. ამ მონასტრის მთავარი ტაძარი მოციქულთა პეტრესი და პავლეს სახელობისა იყო. მონასტრის პირველი წინამძღვარი დედა ენსვიტა გახდა. შესაძლოა მას მხარს უჭერდნენ თავიანთი დარიგებებით გალიელი მონაზვნები. მონაზვნები მოუკლებლად აკურთხებდნენ და მადლობდნენ ღმერთს წმინდა სარწმუნოებისათვის, რომელიც წმინდა ავგუსტინე მოციქულმა მიიტანა. წინამძღვარი ენსვიტა დედობრივად ზრუნავდა თავის მონაზვნებზე. მან რამდენიმე სასწაული მოახდინა: ერთხელ კლდეს მსუბუქად დაჰკრა კვერთხი და იმწამსვე წყარო წამოადინა, სხვა დროს კი ბრმა ქალი განკურნა, შეპყრობილისგან ეშმაკი განდევნა. წმინდა ენსვიტა შედარებით ახალგაზრდა ასაკში აღესრულა, 640 წლის 31 აგვისტოს. მისი ხსენება აღესრულება 31 აგვისტოს (13 სექტემბერს) და ადგილობრივად 12/25 სექტემბერს. წმინდანი თხზავდა საეკლესიო კანონებს და ლოცვებს. დაახლოებით 865 წელს მისი მონასტერი დაანგრიეს დანიელმა დამპყრობელებმა. 927 წელს ეკლესია აღადგინა ეტელსტანმა, რომელიც 1052 წელს დაანგრია გრაფმა გოდვინმა. 1095 წელს ამ ადგილას ააშენეს ნორმანული მონასტერი, მაგრამ ის ფრიალო, სადაც მონასტერი იდგა მალე ზღვამ დაჰფარა. თუმცა 1138 წელს კუნძულის სიღრმეში აშენდა ახალი ეკლესია, წმინდა მარიამის და წმინდა ენსვიტას სახელობისა. იმავე წლის 12 სექტემბერს წმინდა ენსვიტას წმინდა ნაწილები ამ ეკლესიაში გადაასვენეს. მას მერე 12 სექტემბერს აქ წმინდანის ხსენების დღეს აღნიშნავენ ხოლმე. ქალაქ ფოლკსტონის მფარველის წმინდა ენსვიტას თაყვანისსაცემად შუა საუკუნეებში უამრავი მომლოცველი მოდიოდა ხოლმე, მაგრამ ინგლისური რეფორმაციის დროს წმინდანის სხეული გადამალეს, და დროთა განმავლობაში მივიწყებული იქნა მისი ადგილსამყოფელი. მაგრამ ღვთის წყალობით XII საუკუნის ტყვიის ლუსკუმა, რომელშიც წმინდა ენსვიტას წმინდა ნაწილებია ჩასვენებული, აღმოაჩინეს 1885 წლის 17 ივლისს, აღდგენითი სამუშაოების დროს - ტაძრის ჩრდილოეთ კედელში იპოვეს. წმინდანის სხეული ახლა იმავე ლუსკუმაშია ჩასვენებული და ფოლკსტონში ინახება. მის თაყვანისსაცემად მრავალი მართლმადიდებელი მიდის.