არქიმანდრიტი მაკარი (აბესაძე):
მესამე წინასწარმეტყველება ვნებისა და აღდგომის შესახებ
"წამოვიდა იქიდან იესო, გალილეა გაიარა და არ უნდოდა ვინმეს გაეგო, რა მოიმოქმედა; ვინაიდან ასწავლიდა თავის მოწაფეებს და უთხრა მათ: ყურად იღეთ ეს სიტყვები: ძე კაცისა მიეცემა კაცთა ხელში, მოკლავენ მას და მესამე დღეს აღდგება მკვდრეთით, მაგრამ მათ ვერ გაიგეს ეს სიტყვა და დაფარული დარჩა მათთვის; ასე რომ, ვერაფერს მიხვდნენ; იმისა კი შეეშინდათ, რომ ეკითხათ, თუ რას ნიშნავდა ეს" (მათე 17, 22-23; მარკოზი 9, 30-32; ლუკა 9, 43-45)ეს ხდება მაცხოვრის ფერისცვალების შემდგომ. ფერისცვალების შემდეგ უფალი მთელ გალილეაში ქადაგებდა, სწორედ ამ პერიოდში ეუბნება მოწაფეებს, რომ იუდეველები გასცემენ მას, ჯვარს აცვამენ და მესამე დღეს აღდგება. იმის შესახებ, რომ მესამე დღეს აღდგებოდა, ფერიცვალებისასაც უთხრა უფალმა თაბორის მთაზე მასთან ერთად მყოფ სამ მოციქულს, თან გააფრთხილა, რაც იხილეთ, არავის უთხრათ, ვიდრე ძე კაცისაი აღდგესო. ამ დროს კი ყველა მოციქულს ეუბნება, - ძე კაცისაი იუდეველთაგან გაეცემა, ჯვარს ეცმება და მესამე დღეს აღდგება, ანუ უკვე კონკრეტულად ეუბნება, როგორ მოხდება ეს ყველაფერი, მიუხედავად ამისა, არა მარტო ხალხი, მოციქულებიც კი "უმეცარ იყვნენ სიტყვისა ამის" - ვერ იგებდნენ, როგორ უნდა მომხდარიყო ეს ყველაფერი, როგორ შეიძლებოდა ადამიანი ჯვარზე ცმულიყო, მომკვდარიყო და მესამე დღეს აღმდგარიყო. ძველ აღთქმაში ხდებოდა წინასწარმეტყველთაგან მკვდრეთით აღდგინების სასწაულები, მაგრამ უფალი აქ არ ამბობს, რომ მე ვინმე აღმადგენსო, არამედ ამბობს, - "აღდგეს", ანუ თავად აღვდგებიო, სწორედ ამ საიდუმლოს ვერ სწვდებოდნენ მოციქულები, თუ მოკვდებოდა თავის თავს როგორღა აღადგენდა. როგორი სიწმინდეც უნდა ჰქონდეს ადამიანს, რა თქმა უნდა, არამც და არამც არ შეუძლია სიკვდილის შემდეგ თვითონ აღადგინოს თავი. უფალი აქ სწორედ იმას ასწავლის მოციქულებს, თავიდან რა თქმა უნდა, დაფარულად, რომ მათი მოძღვარი არ არის უბრალო კაცი, არამედ განკაცებული ღმერთი, სწორედ ღმრთაება აღადგენს ხორცს, თორემ თავად ადამიანს არ შეუძლია სიკვდილის შემდეგ საკუთარი თავი აღადგინოს. კიდევ ვიმეორებ, - მაცხოვარი აქ დაფარულად განუცხადებს თავის მოციქულებს, რომ ის არის სრულყოფილი ღმერთი და სრულყოფილი კაცი და ამის გამო ძალუძს, რომ თავადვე აღიდგინოს თავი.
- თუკი მოციქულები ამ პერიოდში ვერ სწვდებოდნენ მაცხოვრის ნათქვამს, რატომღა იყო საჭირო მათთვის ამ ყველაფრის სწავლება, ამ საიდუმლოს განცხადება?
- მოციქულები ამ პერიოდში ვერ მიიღებდნენ, რადგან მათი გონება არ იყო ღვთისმეტყველების სიმაღლეებზე ასული, მაგრამ მაინც ეუბნებოდა იმიტომ, რომ ამ ყველაფრის აღსრულების მერე მათ აზრებში დარჩენილი სწავლებები, ქადაგებები, ის სასწაულები, რაც მაცხოვარმა იქადაგა და აღასრულა, უკვე ამოტივტივებულიყო მათ გონებაში, რათა უფრო ადვილად მიეღოთ ქრისტეს სწავლება და უფრო გულმოდგინედ შესდგომოდნენ ღვთის სიტყვის ქადაგებას. თუ უფალი მანამდე არ ეტყოდა ამას მოციქულებს, რა თქმა უნდა, შემდეგ თავად აღდგომილი მაცხოვარიც რომ ენახათ, იფიქრებდნენ, მოჩვენება ვიხილეთო. მართალია, იმ დროს მოციქულები ვერ იგებდნენ, ვერც წარმოედგინათ, ეს როგორ შეიძლება მომხდარიყო, მაგრამ რა ნახეს აღდგომილი მაცხოვარი, მიხვდნენ, რომ ეს ყველაფერი ჭეშმარიტებაა.
