"ის ორგზის მოწამეა... ამისთვის ორმაგ ჯილდოს მიიღებს"
"ის ორგზის მოწამეა... ამისთვის ორმაგ ჯილდოს მიიღებს"
ახალმოწამე მღვდელმონაზვნის ვასილ ფირცხალავას მშობლიური სოფელ ზუმიდან (ჩხოროწყუს რაიონი) ბეთანიის მონასტერში ჩამოვიდნენ ადგილობრივი საჯარო სკოლის მოსწავლეები და მათი პედაგოგები. რადგან მამა ვასილის ცხოვრება მჭიდროდ უკავშირდება ბეთანიას, მოსწავლეების სურვილი სწორედ მისი მოლოცვა იყო.

მამა ვასილის ბეთანიაში ყოფნის ჟამს მონასტერი სულიერების დიდ სავანეს წარმოადგენდა, რადგანაც იქ მოღვაწეობდნენ უდიდესი წმინდანები - წმინდა გიორგი-იოანე (მხეიძე) და წმინდა იოანე (მაისურაძე). მონასტერს ხშირად სტუმრობდა XX საუკუნის უდიდესი ბერი გაბრიელი (ურგებაძე). მამა გაბრიელსა და მამა ვასილს ერთი სულიერი მოძღვარი ჰყავდათ - წმინდა მამა გიორგი-იოანე (მხეიძე). დიდი მოძღვრის მორჩილებაში მამა ვასილი სწრაფად ჩამოყალიბდა დიდი სულიერების მქონე ბერად. მის მონაზვნურ ღვაწლზე საუბრობენ ეკლესიის თანამედროვე მამები, არქიმანდრიტები: გაგი (მოსეშვილი), რაფაელი (კარელინი), იღუმენი ფილარეტი (გუდინოვი). ასევე შემონახულია მამა გაბრიელის სიტყვები: "მამა ვასილი წმინდანი იყო, ანგელოზი იყო, იგი შეუწყვეტელი ლოცვის ძალას ფლობდაო". ხელისუფლების წარმომადგენლები ძალზე ავიწროებდნენ ახალგაზრდა სასულიერო პირს, აიძულებდნენ, დაეტოვებინა მონასტერი, რაზეც მამა ვასილი მტკიცედ პასუხობდა: "მე მონასტერს არ დავტოვებო!" როდესაც არც მუქარამ, არც დაშინებამ არ გაჭრა, იგი სიცოცხლეს გამოასალმეს, რასაც აღნიშნავდა ამერიკაში გამოცემული ჟურნალი "მართლმადიდებლური სიტყვა".

მამა ვასილის ანდერძი იყო, ბეთანიაში დაეკრძალათ მამა იოანეს გვერდით, მაგრამ იგი ნათესავებმა და თანასოფლელებმა ძალით გადაასვენეს სამეგრელოში. ამ მოვლენების გამო წმინდა მამა გიორგი (მხეიძე) მოწამებრივად აღსრულებულ თავის საყვარელ სულიერ შვილზე, ახალგაზრდა მამა ვასილზე ამბობდა: "ის ორგზის მოწამეა... ამისთვის ორმაგ ჯილდოს მიიღებს; სადაც არ უნდა იყოს მისი სხეული, სულით ის ჩვენთანაა!"

მამა ვასილის ცხოვრებისა და მოღვაწეობის შესწავლისა და წარმოჩენის მიზნით ზუმის საჯარო სკოლაში განხორციელდა მეტად საინტერესო სასწავლო პროექტი (მიზნობრივი ჯგუფი - IX კლასი, ხელმძღვანელი - გულნარა ლემონჯავა, ფილოლოგი). მოსწავლეებმა მოიძიეს ღირსი მამის ცხოვრებასთან დაკავშირებული ფაქტობრივი მასალა (ზეპირი, წერილობითი) და საპრეზენტაციოდ წარმოადგინეს დაგეგმილ გაკვეთილებზე. გამოსცეს გაზეთი "ამბიონი", რომლის პირველი ნომერი მამა ვასილს მიეძღვნა. შემაჯამებელი ღონისძიება ჩატარდა ახალმოწამის დაბადების დღეს, 16 იანვარს, რომელზეც მოიწვიეს სტუმრები: სამღვდელოება, ბერის ნათესავები და მეგობრები. ამ საღამოზე გამოითქვა გულისტკივილი იმაზე, რომ ღირსი მამის ანდერძი ჯერ კიდევ შეუსრულებელია.

ბეთანიის მოლოცვასთან ერთად პროექტი ითვალისწინებდა შეხვედრას უწმინდესთან და უნეტარესთან, სრულიად საქართველოს კათოლიკოს-პატრიარქთან, ილია II-სთან, რაც შედგა კიდეც ამა წლის 29 მაისს. პატრიარქმა გულთბილად მიიღო ბავშვები, დალოცა ისინი და დაასაჩუქრა. დაისვა მამა ვასილის ანდერძის შესრულების საკითხი. უწმინდესმა იკითხა, ნათესავები ხომ არ არიან წინააღმდეგნიო, და როცა დადებითი პასუხი მიიღო, ბრძანა: "მისი სული გაიხარებს, როცა გადმოსვენება მოხდებაო".

დაისახა სამომავლო გეგმები: კათოლიკოს-პატრიარქის ლოცვა-კურთხევით უნდა მომზადდეს დოკუმენტური ფილმი მამა ვასილის ცხოვრება-მოღვაწეობაზე, ასევე ჩატარდეს მოსამზადებელი ღონისძიებები ამ ისტორიულ მოვლენასთან - ახალმოწამის გადმოსვენებასთან დაკავშირებით.

მოამზადა
ლევან ფირცხალავამ
ბეჭდვაელფოსტა
კომენტარი არ გაკეთებულა
სხვა სიახლეები
04.06.2020
წმინდა პავლე დაიბადა XVIII საუკუნის ბოლოს ღარიბ ოჯახში პელოპონესში. მეწაღის ხელოვნების სასწავლებლად სხვა ქალაქში წავიდა.
04.06.2020
სერბეთის მთავარი ვლადიმერი ცხოვრობდა და მოღვაწეობდა X-XI საუკუნეების მიჯნაზე. იგი ბრძნულად მართავდა თავის სამფლობელოებს, ილირიასა და დალმაციას. ვლადიმერი ბავშვობიდან გამოირჩეოდა სიმშვიდით, მოკრძალებით, სიბრძნით, კეთილგონიერებით.
04.06.2020
წმინდა მოწამე ვასილისკო წმინდა დიდმოწამე თეოდორე ტირონის ძმისწული იყო. იგი მეოთხე საუკუნეში იმპერატორ მაქსიმიანე გალერიუსის დროს მოწამებრივად აღესრულა ქრისტესთვის.
28.05.2020
ერთი გარდამოცემით, წმინდა ბარბაროსი IV საუკუნეში ცხოვრობდა, იგი რომის არმიის მეომარი იყო. მან უარი განაცხადა კერპებისთვის მსხვერპლი შეეწირა, რისთვისაც ის აწამეს.
28.05.2020
წმინდა დიმიტრი იოანე მრისხანეს ვაჟი იყო. ის 1582 წელს დაიბადა. თეოდორე ივანეს ძის მეფობისას სახელმწიფოს ფაქტიურად მისი ცოლისძმა ბორის გოდუნოვი მართავდა. მან უფლისწული დიმიტრი დედასთან ერთად სამეფო კარიდან ქალაქ უგლიჩში გადაასახლა.
28.05.2020
წმინდა დიმფნა ირლანდიის წარმართი მეფის ასული იყო, რომელიც ქრისტიანმა დედამ ჩუმად მონათლა. ქალიშვილმა მთელი გულით შეიყვარა ქრისტე და უმანკოების აღთქმა დადო.
10.05.2020
ლაზეთი კოლხური წიაღის განუყოფელი ნაწილია. იგი საქართველოს სახელმწიფოებრიობის განმსაზღვრელი ერთ-ერთი მთავარი ძარღვი და ჩვენი კულტურის უძველესი კერაა. წმიდა ანდრია მოციქულმა, ღვთისმშობლის წილხვედრი, ქართველი ერის მოქცევა სწორედ აქედან დაიწყო.
20.02.2020
ნიკომიდიაში აღსრულებული ეს წმინდა მოწამენი ავადსახსენებელი დიოკლეტიანეს (284-305 წლები) ზეობისას ეწამნენ. ისინი ქრისტესთვის წამებულ დიდებულთა: _ ვასის, ევესტის, ევტიქისა და ვასილიდის (ხსენება 20 იანვარს) მსახურნი იყვნენ.
03.01.2020
ძველი სტილით 22 დეკემბერს (ახ. სტ. 4 იანვარს) მართლმადიდებელი ეკლესია იხსენებს დიდმოწამე ანასტასია მკურნალს და ბორკილთდამხსნელს და მოწამეების ქრისოგონეს, თეოდოტიას, ებოდის, ევტიქიანეს და სხვებს.
17.11.2019
ფინიკიის ქალაქ ემესაში ცხოვრობდნენ მდიდარი და დიდებული, მაგრამ უშვილო კლიტოფონი და ლევკიპია. ყოველი სიკეთის პატრონნი იყვნენ, მაგრამ მათ გულს დიდი დარდი ტანჯავდა-შვილი არ ეძლეოდათ...
მუდმივი კალენდარი
წელი
დღესასწაული:
ყველა დღესასწაული
გამოთვლა
განულება
საეკლესიო კალენდარი
ძველი სტილით
ახალი სტილით
ორ სა ოთ ხუ პა შა კვ
1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30 31
ჟურნალი
ჟურნალის ბოლო ნომრები:
მართლმადიდებელი ეკლესია 12 ივლისს პეტრეპავლობის დღესასწაულს აღნიშნავს.