იმ ღამეს ღმერთმა ეკლესიის ლოცვა შეისმინა: "ლოცვაჲ გულს-მოდგინედ იყოფოდა ეკლესიათა მიერ ღმრთისა მიმართ მისთჳს". და აი, მოხდა სასწაული: "ანგელოზი უფლისაჲ ზედა მოადგა და ნათელი გამობრწყინდა სახლსა მას შინა, და სცა გუერდსა პეტრჱსსა, და განაღჳძა იგი და ჰრქუა მას: "აღდეგ ადრე და დასცუეს ჯაჭუნი იგი ჴელთაგან მისთა". ანგელოზმა დახშულ კარში გაატარა და სამშვიდობოს გამოიყვანა მოციქული (საქმე, 12,11-11).
ქრისტიანებმა მოიპოვეს ეს ჯაჭვები და თაობიდან თაობებს გადასცემდნენ, როგორც სიწმინდეს. მათთან რწმენით მიახლოებული სნეულები იკურნებოდნენ სხვადასხვა სალმობათაგან. ასე გადაეცა ეს სიწმინდე პატრიარქ იუბენალს და იერუსალიმში 439 წლამდე ინახებოდა.
როცა ღვთისმოსავმა დედოფალმა ევდოკიამ იერუსალიმში ყოფნისას, მრავალი ტაძარი ააშენა და განამშვენა წმინდა ადგილები - მაშინ პატრიარქმა იუბენალმა წმინდა პეტრეს ბორკილები ევდოკიას აჩუქა.
ევდოკიამ სიწმინდე კონსტანტინოპოლში ჩაიტანა, შემდეგ კი ერთი ჯაჭვი წმინდა სოფიის ტაძრის შიგნით მდებარე წმინდა პეტრე მოციქულის ტაძარში დაასვენა, ხოლო მეორე თავის ასულს, ევდოკიას გაუგზავნა რომში, რომელიც რომის იმპერატორ ვალენტიანეზე იყო გათხოვილი. ევდოკიამ რომში, ექსკვილიის მთაზე პეტრე მოციქულის სახელზე ტაძარი ააგო და ეს სიწმინდე, წმინდა პეტრეს სხვა ბორკილთან ერთად, რომელიც მას ნერონმა დაადო, იქ დაასვენა.
ყოველი წლის 16 იანვარს ამ სიწმინდეებს გამოაბრძანებდნენ ხოლმე თაყვანსაცემად.
თბილისის შემოსასვლელთან, ავჭალის მთაზე, წმინდა პეტრე მოციქულის ჯაჭვთა თაყვანისცემის სახელობის მცირე ზომის ტაძარი დგას.
იგი 1742 წელს აუგია გაბრიელ ბერს და თავადაც იქვე განისვენებს. გადმოცემით როგორც კი აშენდა ეს ტაძარი, მაშინვე სასწაულებრივად აღმოცენებულა მკურნალი წყალი, რომელსაც ჯაჭვის წყარო დარქმევია. აქ ძველად ჯაჭვის სახელით ცნობილი სოფელი ყოფილა. ჩანს, ეს მთიანი ადგილი დასახლებული იყო და საქარავნო გზაც გადიოდა.
ტროპარი:
რომი არა დაუტევე, და ჩვენდა მოიწიე ჯაჭვთა მათ მიერ, რომელნიცა შეგმოსნეს შენ, თავო მოციქულთაო პეტრე, რომელთაცა თაყვანს ვსცემთ და გევედრებით: მეოხებითა შენითა მოგვფინე ჩუენ დიდი წყალობაი.
კონდაკი:
კლდესა ქრისტესსა და კლდესა სარწმუნოებისასა ვაქებდეთ, ერნო, სიხარულით პირველ ქრისტეს მოსაყდრესა, რამეთუ მოუწოდს ყოველთა დღესასწაულობად ხსენებასა საკვირველსა პატიოსანთა ჯაჭვთა მისთასა და მისცემს ბრალთა შენდობასა.
სხვა კონდაკი:
თავსა მოციქულთასა და პირველსა ჭეშმარიტებისა საღმრთოსა მოწაფესა პეტრეს დიდსა ვაქებდით და მისთა მათ ჯაჭვთა სარწმუნოებით ამბორს უყოფდეთ, ცოდვათა განხსნისა მომღებელნი.
....................
ხატის წყარო
.............................
აქვე წაიკითხეთ:
წმინდა პეტრე მოციქულის ჯაჭვები
29 იანვარს დედა ეკლესია წმინდა პეტრე მოციქულის ჯაჭვთა თაყვანისცემის დღესასწაულს აღნიშნავს
პეტრე მოციქულის ჩრდილიც კი კურნავდა სნეულთ
შეგვეწიოს წმინდა მოციქულთა მადლი!
