გილოცავთ ამაღლებას, ნინოობას და სულთმოფენობას "კარიბჭის" ყველა თანამშრომელს, ღმერთმა დაგლოცოთ და არ მოგაკლოთ ზეციური სიხარული, მოგცეთ ძალა, რომ ბოლომდე ემსახუროთ თქვენი კეთილი საქმეებით

წმინდანთა ცხოვრება სამაგალითოა ჩვენნაირი, სოფლის საცდურს აყოლილი ადამიანებისთვის. უამრავი რამ გვაქვს გასახსენებელი ქართველებს - თუნდაც ის, რომ საქართველოს "წმინდანთა დედას" უწოდებენ, თუნდაც ის, რომ მაღალი წრის წარმომადგენლებმა ყველაფერზე უარი თქვეს და ღმერთს შესწირეს თავი ქვეყნის საკეთილდღეოდ.

ჩვენს ერში დამკვიდრებული სტუმრის პატივისცემა და პურ-ღვინით დახვედრა, სწორედ ქრისტე ღმერთის პატივისცემად აღიქმებოდა. ქართველ კაცს თუ შინ პური და ღვინო ჰქონდა, ღარიბად არ იხსენიებოდა და ისიც... რუდუნებით უვლიდა ვენახს, საგალობლებსა და ლექსებს ქმნიდა მასზე, ხორბალს სიყვარულით თესდა და მკიდა - ოფლსა და სისხლს აპკურებდა და შედეგსაც მადლიანს იღებდა.

მართლმადიდებლობაზე ძალიან ბევრი რამ გავიგე თქვენი ჟურნალის დახმარებით. გავიგე, რომ თუ გვინდა, უფალმა დახმარების ხელი გამოგვიწოდოს, აუცილებელია ყველამ ღვთის სიყვარულით ვიცხოვროთ. ძალიან მომეწონა მეუფე კალისტრატეს (მარგალიტაშვილს) პასუხი:

ქრისტიანს, ჭეშმარიტ მორწმუნეს, არ სჭირდება სიტყვა "მადლის" განმარტება - იცის, რომ მადლის კეთება ისევე აუცილებელია, როგორც ლოცვა, მეტიც, ლოცვა, თვინიერ საქმისა, მკვდარია. მადლია, როცა ჭეშმარიტების გზიდან გადამდგარს უფლის წიაღს დაუბრუნებ, მადლია, როცა მოყვასის ტკივილს გაითავისებ, მადლია სიტყვა, რომლითაც უნუგეშოს სასოებას მოჰგვრი.

ამ წერილს ბაღდათის მეორე საშუალო სკოლის მერვე კლასის მოსწავლეები გწერთ. ჩვენს რაიონს მრავალი შესანიშნავი, განათლებული და სპეტაკი მოძღვარი ჰყავს. ჩვენი კლასის მოწაფეთა უმრავლესობა მათი მრევლია. წმინდა მამებთან ხშირი ურთიერთობა გვაქვს, დავდივართ რეზიდენციაში, ვხვდებით ეპისკოპოსს.

ტაძარი ღვთის სახლია და ბედნიერებაა, როცა ადამიანი ღვთის სახლს უვლის, წმენდს, ასუფთავებს, სანთლებს ყიდის... რაც მეტ ერთგულებას იჩენს ტაძრის მსახური თავისი მოვალეობისადმი, მით მეტ სიყვარულს ამჟღავნებს უფლისას.

დიდი მადლობა თქვენს ჟურნალს, რომელსაც დიდი წვლილი მიუძღვის ჩემი ტაძრისკენ მიმავალი გზის გაკვალვაში. ახლოვდება საქართველოში ანდრია პირველწოდებულის შემობრძანების დღე, 12 მაისი - ჩემი მეორედ დაბადების დღე.

ცოდვათა შორის ფარისევლობა ერთ-ერთი მთავარია, რადგან მას მოჰყვება ცრუმედიდურობა, საკუთარი ნიჭითა და სილამაზით ტკბობა, სხვათა უგულებელყოფა... თითქოს არაფერია, როცა გაქებენ, მაგრამ ყველამ განვჩხრიკოთ საკუთარი სული და მივხვდებით, როგორი ტკბობა გვეუფლება, როცა შემპარავი ხმითა და ქლესა ღიმილით საკუთარ ღირსებაზე მიგვანიშნებენ.