კითხვა: ჩემი ეკლესიურობის გამო დაძაბული ურთიერთობა მაქვს ოჯახის დანარჩენ წევრებთან. როგორ მოვიქცე მამაო?

პასუხი: ეს ახალი არ არის!.. მე გეტყვი, რომ ზომიერება და კეთილგონიერება გაკლია! ანგარიში გაუწიე ოჯახში დანარჩენების არსებობას!.. შენ ეკლესიაში ვერავის ვერ მიიყვან, თუ ისინი ღმერთმა არ შეამზადა! შენ ჯიბრში კი ნუ უდგები მათ, რომ მარხულობ და ისინი კი - არა!.. გაიხსენე, ადრე არც შენ მარხულობდი, მაგრამ ამის გამო ღმერთს კი არ მოუკლიხარ! ჰოდა, არც მათ მოუვათ რამე. ნუ ცდილობ ქვეყნიერების შეცვლას!... შენ შენს თავს მოუარე!.. შენი მაგალითით გახდი მისაბაძი. მათ მორწმუნის ნამდვილი სახე დაანახე!.. მათ თვითონ უნდა განისაზღვრონ და დაინახონ მორწმუნის უპირატესობა და თავიანთი ნებით მიიღონ გადაწყვეტილება, იმარხულონ თუ არა!..

მარხვა ნებაყოფლობითია და არა იძულებითი! იძულებას აუცილებლად მოჰყვება პროტესტი, გაღიზიანება. შენ თუ მარხულობ, იმათ კი ნუ "შეჭამ!"... მათ კი თუ უნდათ, იმარხულონ, თუ უნდათ - არა! მარხვა კი არაა მთავარი!... მთავარი არის გული და სული!... ის, რომ მარხვა საჭიროა, განა მათ არ ესმით?!... ანგელოზი მათაც მისცა ღმერთმა და ის სულ შეაგონებს მათ!.. მათ შენ სიყვარული უნდა ანახო!... შენ კი შენი "მოშურნეობით" განიკითხავ მათ და ისინი ამას გრძნობენ!...

გაბრიელ ბერს აქვს ასეთი გამონათქვამი: "არ ვილოცე, არ ვიმარხულე, თავი დავიმდაბლე და ვცხონდიო". ხედავ, რაში ყოფილა საქმე?! შენ რომ თავმდაბალი იყო, ოჯახში კონფლიქტი აღარ გექნება და თუ კონფლიქტური ხარ, რაღა სარგებელია შენთვის მარხვა!... მაგი მარხვა არაა, ბაბუა!...
თუ ხედავ, რომ ოჯახის სხვა წევრებს აღიზიანებს შენი ლოცვა, "ეშმაკეულებად" ნუ კი მონათლავ მათ და ნუ დაუდგები ლოცვანით ხელში ცხვირწინ. ან კიდევ საათობით ნუ ჩაიკეტები ხატების ოთახში მოღვაწე ბერივით!...

ის, რომ ოჯახში დაძაბულობაა, ამაში ღვთის ხელი უნდა დაინახო! ეს თქვენი ღვთისმიერი დამუშავებაა!... ისინი დროში ინანებენ, რომ გვავიწროვებდნენ, ხოლო შენ კი დიდი წარმოდგენა არ გექნება შენს "ეკლესიურობაზე!.." ღმერთი სიყვარულია და თუ შენი ეკლესიურობა სიძულვილის მიზეზი ხდება, ეს არ არის ღმერთთან მიახლოება. ბევრი რამ უნდა დათმო დრომდე, ბევრი კი არ უნდა დაუთმო!.. ეს არ არის ძნელი მოსაგვარებელი. ოღონდ გონება და თავმდაბლობა გვმართებს. შე დალოცვილო, შენ შენს სისხლ-ხორცთან გიჭირს ქრისტეს მცნებების აღსრულება, იმ ხალხმა რაღა თქვას, ვისაც მუსლიმებისა და სხვადასხვა რჯულის ექსტრემისტების გარემოცვაში უწევს ცხოვრება!

წიგნიდან: ქართველობა ძნელია მაგრამ აუცილებელი! მამა გიორგი(ბასილაძე)