მოგესალმებით. მადლობა უფალს, რომ გვაქვს ჟურნალი "კარიბჭე", მრავალი მოძღვარი გაგვაცანით და მრავალ საინტერესო კითხვაზე გვიპასუხეთ. მადლობა, რომ თითქმის ყველა ჩემი წერილი დაიბეჭდა. მჯერა, რომ ჟურნალი ნებისმიერი მკითხველის აზრს აშუქებს - ეს არის უფლისმიერი სიყვარული მოყვასის მიმართ.

როცა ჟურნალ "კარიბჭეში" ჩემი წერილი იბეჭდება, ვყიდულობ რამდენიმე ცალს, ვჩუქნი მოძღვარს, სულიერ მეგობრებს და ვუგზავნი საზღვარგარეთ ახლობლებს. მინდა დავიჯერო, რომ წერილის ყველა გამომგზავნი ასე იქცევა.

გარკვეული წლების შემდეგ მინდა აკინძული ჟურნალი საჩუქრად გადავცე სასულიერო სასწავლებელს.

იქნებ გამოჩნდეს მეცენატი, რომელიც ჟურნალიდან ამოკრებილ კითხვა-პასუხებს ცალკე წიგნად გამოსცემს.


ელია წინასწარმეტყველს ანაღვლებდა თავისი ერის უსჯულოება და აღთქმაც დადო, თუ სინანულით ცოდვებისაგან არ განიწმინდებოდნენ, დაისჯებოდნენ. უფალს არ სურდა წინასწარმეტყველის აღთქმის გამტყუნება და ხალხში სინანულის გრძნობის აღსაძრავად ერთი კეთილი დედაკაცის შვილიც კი აღასრულა. როცა უფალმა იგრძნო წინასწარმეტყველის კაცთმოყვარება, წვიმაც მოუვლინა ქვეყანას და ერთადერთი ძეც გაუცოცხლა დედას.

სწორედ იმ კეთილი დედაკაცის შვილი გაგზავნა შემდეგ ნინევიაში - ეს იონა წინასწარმეტყველი იყო.

ხოლო შემდეგ: "მუცლად-იღო იონაი ვეშაპმან და არა განჰხნა მან იგი, რამეთუ მით მოასწავა სახე სამ-დღე დაფლვისა შენისა, რომელმანცა დაფლვა თავს იდევ ჩვენთვის, სახიერ".

- დიდება შენდა, ღმერთო ჩვენო, დიდება შენდა - სწორედ უფლის განგების ძალამ მიმიყვანა მოძღვართან, რომელსაც მღვდლად კურთხევის დროს იონა წინასწარმეტყველის სახელი მიეკუთვნა.

ჩემო მოძღვარო, ლოცვით, რჩევებითა და დარიგებებით იბრძვით, ცდილობთ გამიყვანოთ სულიერების გზაზე სულის დაუზიანებლად და უმტკივნეულოდ.

ღვთის ნებით, სპეციალობით ექიმმა მოყვასთა ხორციელ კურნებას სულის განკურნების გზა არჩიეთ.

უფლის მადლი არ მოაკლდება იმ ეკლესიას, იმ სახლს, სადაც თქვენ შეაბიჯებთ. დიდი ღვთიური მადლი გარდამოვიდა თქვენზე, როცა იმ წინასწარმეტყველის სახელი გერგოთ, რომლის ხსენების დღე 5 ოქტომბერია.

გილოცავთ, მამაო, ამ დღეს!


უღრმესი მადლობა მინდა მოგახსენოთ თქვენი მოღვაწეობისთვის. თქვენს ჟურნალში დაბეჭდილი მასალების წაკითხვის შემდეგ, ვინ იცის, რამდენ ადამიანს გაუჩნდა სულიერი ცხოვრების დაწყების სურვილი.

უფლის მადლი და შემწეობა არ მოჰკლებოდეს თქვენს რედაქციას და თითოეულ მის თანამშრომელს.

მინდა მოგიყვეთ ჩემი ცხოვრების ბოლო ათი თვის განმავლობაში მომხდარ სასწაულებრივ ცვლილებებზე. მოვხვდი ჯვართამაღლების ტაძარში, რომლის წინამძღვარია განათლებული და უაღრესად კეთილი მოძღვარი, დეკანოზი თეოდორე გიგნაძე. სწორედ მასთან მივედი, ის გახდა ჩემი მოძღვარი. მან დამაყენა უფლისაკენ მიმავალ ჭეშმარიტ გზაზე. ამ მოკლე პერიოდში უსაზღვროდ დიდი სიხარული, სიყვარული, სათნოება, ღვთის უსაზღვროდ დიდი მადლი და შეწევნა შევიგრძენი. მაგრამ ამავე დროს დიდი დაბრკოლებებიც მხვდება, რომელთაც იზიარებს და გვერდში მიდგას ჩემი სულიერი მოძღვარი. მამა თეოდორე ყოველთვის ძალიან დიდი მოთმინებით და ყურადღებით მისმენს ხოლმე და სასიკეთო რჩევა-დარიგებებს მაძლევს, მამშვიდებს, მიადვილებს ცხოვრებას. მისი მადლიანი ლოცვით ბევრი დაბრკოლება გადავლახე.

ძვირფასო რედაქციავ! თქვენი ჟურნალის მეშვეობით მინდა უღრმესი მადლობა გადავუხადო ჩემს სულიერ მოძღვარს, მამა თეოდორეს. ვუსურვო ჯანმრთელობა, ბედნიერება პირად ცხოვრებაში და ღვთისა და ერის მსახურებაში. უფლის შემწეობა და მფარველობა არ მოჰკლებოდეს.

უფალი იყოს თქვენი შემწე და მფარველი.

ღმერთის არსებობის მწამდა, ზოგჯერ ეკლესიაში მივდიოდი, სანთლებს ვანთებდი, მაგრამ გაუცნობიერებლად.

ერთხელ ტაძრიდან შინ მიმავალმა საეკლესიო მაღაზიაში შევიარე. განსაკუთრებით მომეწონა ბატონ აკაკი მინდიაშვილის წიგნის "რატომ ვისჯებით, რა გადაგვარჩენს" სათაური. შევიძინე. მისი წაკითხვის შემდეგ ძირეულად შეიცვალა ჩემი შეხედულებები და მოსაზრებები. მივხვდი, რომ აუცილებელი იყო სულიერი მოძღვრის ყოლა და მისი ხელმძღვანელობით ცხოვრების წარმართვა.

ახლა ღვთის წყალობით მყავს მოძღვარი და ვცდილობ ეკლესიურად ვიცხოვრო.

ღმერთმა დალოცოს და გაახაროს ბატონი აკაკი მინდიაშვილი და მისი ოჯახი.