ბოლო დროს ფეისბუქში ვრცელდება ე.წ. "სიცოცხლის სიტყვის" ნეოორმოცდაათიანული სექტის ლიდერის - მამუკა ძებისაშვილის ვიდეო მიმართვა.
"გწამს ღმერთის? ვიცით, რომ გწამს! და რამეში გეხმარება ეს რწმენა?
უყურე ამ ვიდეოს და დააჭირე ღილაკს ვიდეოს ქვემოთ, თუ გჭირდება მხარდაჭერა და გსურს რომ მოგვწერო.

თუ არ იცი რა მოგვწერო, უბრალოდ დაწერე "მჭირდება მხარდაჭერა" - ვკითხულობთ სარეკლამო ტექსტში.

ვიდეომიმართვაში ამ პროტესტანტული სექტის ლიდერი მაყურებელს იესოს რწმენას უქადაგებს კონფესიის დასახელების გარეშე, ქრისტიანობის სახელით მოუწოდებს მსმენელს გაიმეორონ და არ გაუშვან შანსი, რათა მასთან ერთად წარმოსთქვან ლოცვა, რის შემდეგაც ადამიანებს ამ ფეისბუქის გვერდთან დამეგობრობას და საჭიროების შემთხვევაში მათი გულისთვის ლოცვას სთავაზობს, კითხვების გაჩენის შემთხვევაში კი პასუხებს. ვიდეოს რეკლამირებას ამ სექტის რუსულენოვანი ფეისბუქის გვერდი ახდენს (ამასთან ვიდეოში სექტის ლიდერი სპეციალურად არ ასახელებს იმ კონფესიას (სექტას), სადაც მაყურებლებს ეპატიჟება... ეს, ცხადია, გაუთვითცნობიერებელი მართლმადიდებელი ქრისტიანების და სხვა აღმსარებლობის ადამიანების მიმართ პროზელიტიზმის და სექტაში გადაბირების მცდელობაა). სხვადასხვა დროს საქართველოს მართლმადიდებელმა ეკლესიამ არაერთხელ გააფრთხილა საქართველოს მოსახლეობა, რომ არ ენდონ ანონიმურ, გაურკვეველ ქადაგებებსა თუ სარეკლამო მოსაწვევებს, რომლებსაც სექტანტები ქრისტიანობის სახელით ქუჩებში თუ სოციალურ ქსელებში ავრცელებენ. რამდენიმე წლის წინ საქართველოს საპატრიარქოს პრესცენტრმა ზემოაღნიშნული სექტის აქტიურობის შესახებაც გააფრთხილა ქართული საზოგადოება.

ყოველმა მართლმადიდებელმა ქრისტიანმა უნდა იცოდეს , რომ ქუჩაში გავრცელებული, ერთი შეხედვით გაურკვეველი წარმოშობის ფურცლებისა თუ ბროშურების უკან, როგორც წესი, საქართველოს მართლმადიდებელი სამოციქულო ეკლესიის მოწინააღმდეგე სექტა დგას. სექტანტმა მისიონერებმა შესანიშნავად იციან, თუ პირველივე შეხვედრისას გაუმხელენ თავიანთ კონფესიურ კუთვნილებას, შესაძლოა პოტენციურმა "მოსაქცევმა" ახლობლებისგან თუ ლიტერატურიდან ამ მიმდინარეობის შესახებ ინფორმაცია მოიძიოს და სრულიად გაუქრეს რწმენა იმ ილუზორული დაპირებებისადმი, სექტაში გაწევრების შემთხვევაში რომ სთავაზობენ. ამიტომ მსგავსი "შემოთავაზებების" დროს საჭიროა გამოვიჩინოთ სიფრთხილე და მუდამ გვახსოვდეს წმინდა იოანე ღვთისმეტყველის დარიგება: "საყვარელნო, ყველა სულს ნუკი ენდობით, არამედ გამოსცადეთ, ღმერთისგან არიან თუ არა სულნი, იმიტომ, რომ მომრავლდნენ ცრუწინასწარმეტყველნი ქვეყნად" (1 იოანე 4,1).