შესაქმის არსი სამ აღთქმაში მდგომარეობს, რომელთაც მუნი "განვითარების პერიოდის სამ თანმიმდევრულ ეტაპზე გაცხადებულ კურთხევებად" იხსენიებს...

აი, ის მუხლიც, რომელსაც მათი დებულება ეფუძნება: - "და აკურთხნა იგინი ღმერთმან მეტყუელმან: აღორძინდით და განმრავლდით და აღავსეთ ქუეყანაი და ეუფლენით მას"(1:28).

ხსენებული მუხლის ძალზე მიკერძოებული განმარტების შედეგად მუნი ღვთისაგან კაცობრიობისათვის მიცემულ სამ კურთხევას ახმოვანებს:

პირველი კურთხევა - "აღორძინდით" ამ სიტყვის ზოგად მნიშვნელობას სულაც არ გულისხმობს და ხორცისა და სულის ერთობასა და მასთან დაკავშირებულ ერთიან დამოკიდებულებას ნიშნავს.

პირველი კურთხევის შედეგი არაპიროვნული სრულყოფილების კურთხევაა, რომელიც მეორე კურთხევას უდევს წინაპირობად: - "განმრავლდით და აღავსეთ ქუეყანაი", რაც მუნიტთა ენაზე სრულყოფილი ქალისა და სრულყოფილი მამაკაცის ერთობას ნიშნავს უფლის მიმართ ერთიანი დამოკიდებულების მეშვეობით...

მეორე კურთხევის შედეგი - ჭეშმარიტი ოჯახის, ჭეშმარიტი გვარის, ჭეშმარიტი მოდგმის, ჭეშმარიტი ერის, ჭეშმარიტი მსოფლიო ოჯახის კურთხევაა, და აი, მესამე კურთხევაც: - "და აღავსეთ ქუეყანაი და ეუფლენით მას", რაც სრულყოფილი ადამიანის ერთობას გულისხმობს ბუნებასთან...

სწორედ მესამე კურთხევის შედეგია ჭეშმარიტი მეუფების და ცათა სასუფევლის კურთხევა, რაც სხვა არაფერია, თუ არა "გაერთიანების რელიგია".

მუნიტთა აზრით, ღმერთი თავის ქმნილებაში გამოიხატა, მისი განკაცება არასოდეს მომხდარა და ვერც მოხდებოდა, თუმცა, ღვთის სასუფეველში გაერთიანდება სულიერი და ფიზიკური სამყაროები და სწორედ ამაში მდგომარეობს კაცობრიობის მიზანიც და დანიშნულებაც.

ამასთან, თურმე ადამიანის სხეული (ფიზიკური "მე") "ფიზიკური სხეულისა" და "სხეულის სულისგან" შედგება, თუმცა, სულიც, თავის მხრივ, "სულის სამშვინველსა" და "სულის სხეულს" მოიცავს, გამოდის, სულიც, გარკვეულწილად, მატერიალურია, რაც მუნიტთა გარკვეულ დებულებებს ნათელს ჰფენს.

უფალმა ადამიანს სამი კურთხევა აუწყა, თუმცა, ადამიანმა ეს კურთხევანი ვერ შეინარჩუნა... მთავარანგელოზ ლუციფერს, ანუ სატანას შეუყვარდა ევა, შეაცდინა და მასთან კავშირის შედეგად გაჩნდა კაენი... შემდეგ ადამმაც დაარღვია კურთხევა, დროზე ადრე დაამყარა ევასთან კავშირი და ასე მოევლინა სამყაროს აბელი, რომელიც საკუთარმა ძმამ მოაკვდინა, ასე რომ, ჩვენ ყველანი კაენის მოდგმა ვყოფილვართ (რაც შეეხება სეითს, რატომღაც ამოვარდა მუნიტური სქემიდან), ჩვენში სანახევროდ სატანური სისხლი ჩქეფს და სანახევროდ - ადამიანური...

საინტერესოა ამბავი, თუ რა გზით შეაღწია მუნმა სულთა სამეფოში და ძალისმიერად როგორ გაარკვია, თუ რა მოხდა იქ. თურმე იგი სატანას დასაკითხად ეძებდა, საბოლოოდ კი "ღვთაებრივი პრინციპის" ზოგი ელემენტი მუნს თვით უფლისგან ეუწყა, ნაშრომის დიდი ნაწილი კი სულთა სამყაროში ბრძოლით მოიპოვა...

ასე რომ, თურმე ჩვენ სატანის შთამომავალნი ვყოფილვართ, ხოლო ცხონება ოდენ მაშინ არის შესაძლებელი, თუ "სრულყოფილი ადამიანი" "სრულყოფილ ქალს" ასწავლის, თუ როგორ იქცეს "სრულყოფილ ევად"... მხოლოდ ამ შემთხვევაში შეძლებს სრულქმნილი შთამომავლობის, "უცოდველი ბავშვების" ჩასახვას და სრულქმნილ ოჯახს შექმნის, რომელსაც სატანასთან საერთო აღარაფერი ექნება..

თუმცა, ამგვარი "სრულქმნილი" ადამიანის გამოჩენას გარკვეული წინაპირობები სჭირდება, კონკრეტულად კი - ღვთის მიერ დროდადრო მოვლენილი "ცენტრალური პიროვნებების" უპირობო მორჩილება, რომ მესიის მოსასვლელად მოემზადონ... იგი სრულყოფილ ოჯახს შექმნის და კაცობრიობის "ჭეშმარიტ მამად" იქცევა...

მუნი აბელს, ნოეს, აბრაამს, მოსეს, იაკობს და ისუ ნავეს ძეს შეუმცდარ "ცენტრალურ პიროვნებებად" მიიჩნევს.

უკანასკნელი "ცენტრალური პიროვნება" იოანე ნათლისმცემელი ყოფილა, რომლის უმცროსმა ძმამ, იესომ, რომელიც მღვდელმთავარ ზაქარიასა და მარიამის უკანონო კავშირის შედეგად იშვა (შეგვინდოს უფალმა ამდენი მკრეხელობის განმეორება! - მ. ტ.), "უბრალო ადამიანმა", ცოდვით დაცემისაგან თავისუფალმა და არა ღმერთმა, შეძლო თავისი მესიანური ღირსების გაცხადება.

თურმე ღმერთმა იესო სწორედ ოჯახის შესაქმნელად წარმოგზავნა, რაც ვერ შეძლო... მას ჯერ იოანე ნათლისმცემელმა უღალატა, შემდეგ კი - ხალხმაც, მაგრამ პირველი კურთხევა მაინც აღასრულა, - პიროვნულ სრულქმნილებას მიაღწია, თუმცა, ჭეშმარიტი ოჯახის შექმნის ნაცვლად ჯვარცმა დაუშვა, თუმც კი შეეძლო, დახმარებისთვის ანგელოსთა დასებისთვის ეხმო...

მუნიტთა აზრით, რისი აღსრულებაც იესომ მოახერხა, თორმეტი მოწაფისაგან შემდგარი სულიერი ოჯახი იყო...

1971 წლის 3 იანვარს მუნმა ქრისტე და ხანდაზმული კორეელი ქალბატონი "აკურთხა", რის შემდეგაც მას თურმე იესო გამოეცხადა, აუწყა, რომ მისი თაყვანისმცემელი გახდა და თავმდაბლად ჰმადლობდა მეუღლის პოვნისთვის...

მომდევნო კურთხევა თურმე მუნში განხორციელდა, რომელმაც, ქრისტესაგან განსხვავებით, ღმერთს უერთგულა და სრულქმნილებას პირად დონეზეც მიაღწია და ოჯახურზეც, თუმცა, არავინ ახსენებს მის "უცოდველ შვილთა" მძიმე პრობლემს...

მუნიტთა სწავლებით, წმინდა სამება არცთუ ისე სრულქმნილია, რამდენადაც ოდენ სულიერია. თურმე, იგი ღმერთის, იდეალური ადამისა და ევასაგან უნდა შემდგარიყო, მაგრამ იმის გამო, რომ ეს ერთობა "ცრუ სატანისტურ სამებად" იქცა, ახალი ჯგუფის შექმნა გახდა საჭირო...

ჭეშმარიტი სამება კი, სულიერიც და მატერიალურიც, თურმე ახლა უნდა შექმნან ღმერთმა, მეორე მესიამ და მისმა მეუღლემ...