ღვთისადმი თქვენი მადლიერება ყველა სიტყვას აღემატა
ღვთისადმი თქვენი მადლიერება ყველა სიტყვას აღემატა
ერთ მღვდელს გარეგნულ "წვრილმანებზე": თქვენ, პატიოსანო მამაო, თვლით, რომ სამღვდელო სამოსი, წვერი და თმა "წვრილმანებია" და გიკვირთ, რომ მღვდელმთავრები მათზე წუხან. მერე თქვენ საუბრობთ რეფორმების მნიშვნელობაზე, რომელიც ეხება მღვდლის გარეგნობასა და საქციელს. როგორ უთანხმებთ "წვრილმანებს" რეფორმის მნიშვნელობას? ეკლესიის ყოველმა მეგობარმა უნდა ჰკითხოს საკუთარ თავს: რატომ არ აპროტესტებენ თავიანთ უნიფორმას მიწიერი მეფის ოფიცრები, მებაჟეები, პოლიციელები, რკინიგზელები? მათ ის აცვიათ, რაც ხელმძღვანელობამ დააწესა, უდრტვინველად იქცევიან ისე, როგორც წესი მოითხოვს. აბა, როგორ შეიძლება, რომ მხოლოდ "ზეციური მეუფის" ოფიცრები აღუდგნენ წინ თავიანთ "უნიფორმას" და ქცევის წესს? თუ ხალხს უნდა, რომ მოძღვარს ანაფორა ეცვას, გრძელი თმა-წვერი ჰქონდეს, სხვა მიზეზები აღარ განიხილება. თუ ხალხს არ მოსწონს მოვაჭრის სამოსით მოსილი, შეკრეჭილი და უწვერო მღვდელი, ასეთი "რეფორმა" ყველაფრის ფასად უნდა შეწყდეს, როგორც ხალხის ღვთისმოშიშების შეურაცხმყოფელი. ასეთ შემთხვევაში, შესაბამისად, კრიტერიუმად ითვლება ხალხის რელიგიური გრძნობა, მისი მსჯავრი და არა ცალკეული მღვდლის გემოვნება. ამასთან, თუ წვერი და გრძელი თმა ხელს არ უშლის პოეტებს, მხატვრებს, თვით პარტიულ ბელადებსაც კი, რატომ უნდა შეუშალოს ქრისტეს მღვდლებს, მოძღვრებსა და ხალხის მწყემსებს?

ნეტარი იერონიმე ირონიულად წერდა თავის თანამედროვე მღვდლებზე, რომელთაც გარეგნული გამშვენება უყვარდათ: "მრცხვენია ამის თქმა, მაგრამ არიან ადამიანები, რომლებიც მღვდლის ან დიაკვნის ხარისხს იღებენ იმ მიზნით, რომ თავისუფალი ურთიერთობა ჰქონდეთ ქალებთან. ისინი მხოლოდ და მხოლოდ თავიანთ კოსტიუმსა და გრძელ წვერზე ფიქრობენ, ატარებენ უძვირფასეს ბრილიანტისთვლიან ბეჭედს, დადიან ისე, რომ ოდნავ ეხებიან მიწას, რომ არ დაისვარონ. შეიძლება იფიქრო, რომ ესენი ახალდაქორწინებულნი არიან და არა მღვდლები!"

ანტიკურ დროში ფილოსოფოსებს წვერი გამოარჩევდათ. ერთხელ, შარლატან-ფილოსოფოსთა გამრავლების გამო, იმპერატორმა ბრძანება გამოსცა ყველა ფილოსოფოსისთვის. იმ დროის უდიდესმა ფილოსოფოსმა ეპიქტეტემ ამაზე თქვა: "კეისარს შეუძლია თავი მომაცილოს და არა წვერიო!" აი, რამხელა მნიშვნელობას ანიჭებდა იგი თავისი წოდების გარეგნულ განსხვავებას.

ყველაფერი ეს წვრილმანიაო, იტყვით. დიახ, უდავოდ წვრილმანია. ქრისტიანის სულთან შედარებით წვერი და სამოსი უმნიშვნელო საგნებია, მაგრამ მთელი ცხოვრება უმნიშვნელო და მნიშვნელოვან საგანთაგან შედგება. ჩვენი რწმენა იმდენად მყიფეა და გაწვრილებული, რომ წვრილმანებს შეუძლიათ ავნონ ან დაეხმარონ მას. თუ სიტყვიერ ცხოვარს სურს, რომ მათი მღვდლები გარეგნულადაც გამოირჩეოდნენ მათგან, ჰქონდეთ განსაზღვრული და განსხვავებულობის ჩვეული ნიშნები, რატომ უნდა შევეწინააღმდეგოთ ამას? კათოლიკე მისიონერები ჩინეთში ითვალისწინებენ იმ ხალხის ფსიქოლოგიას, სადაც ქადაგებენ, არ რცხვენიათ, ატარონ შეკრული თმა, გრძელი ჟილეტი და შარვალი. ქრისტესმოყვარე მღვდლები რატომ უნდა შეეწინააღმდეგონ ხალხს "უმნიშვნელო" რამის გამო და კითხვის ნიშნის ქვეშ დააყენონ მნიშვნელოვანი რამ სულიერი ცხოვრებისა?

მშვიდობა თქვენ უფლისა მიერ.

წერილი ღარიბ დედაკაცს ძლიერ ლოცვაზე. თქვენ ქმართან და უმცროს ვაჟთან ერთად დიდ სიღატაკეში ცხოვრობთ. თქვენმა უფროსმა ვაჟმა, მოხელემ, დიდი ხანია მიგატოვათ. წლები გავიდა, რაც წერილი არ მოუწერია და საჩუქრები არ გამოუგზავნია თავისი მზრუნველი და ღარიბი მშობლებისთვის. მამას მისი სახელის გაგონებაც არ უნდა. თქვენ სცადეთ შვილის დაცვა და თქვენდამი უყურადღებობის გამო მობოდიშება მოინდომეთ. ამაოდ ტიროდით და ევედრებოდით ღმერთს ძე შეცდომილისთვის. ასე გაგრძელდა რამდენიმე წელი. თქვენი დედობრივი სული შიშითა და სირცხვილით აივსო: შიშით, რომ მამა დაწყევლიდა ვაჟს და სირცხვილით, რომ იგი საჯაროდ უარყოფდა მას. ამიტომაც უფრო ხშირად და გულმოდგინედ აღუვლენდით ლოცვას იმ ერთადერთს, ვისაც დახმარება შეუძლია. ლოცულობდით, მარხულობდით, ანთებდით სანთლებს, გასცემდით მოწყალებას და აკეთებდით ყველაფერს, რაც უნდა გააკეთოს მორწმუნე დედამ, ასე იქცეოდით მთელი შვიდი წელი, დაუეჭვებლად.

შვიდი წლის მერე მიიღეთ ის, რასაც ღმერთს სთხოვდით. თქვენი ვაჟის გული მშობლებისკენ მოიქცა. გასულ აღდგომას მონანიების წერილი და გარკვეული თანხა გამოგიგზავნათ. შენდობას გთხოვდათ. არ იცის, ასე დიდხანს და ასეთი სასტიკი რატომ უნდა ყოფილიყო მშობლების მიმართ, თითქოს მკვრივი ნიჟარა ფარავდა მის გულს. დაგპირდით, წერილსა და ფულს ხშირად გამოგიგზავნითო. ყოველ კვირას მისგან წერილი მოგდით, ყოველ თვეში კი ფული. დედის სიხარულს ბოლო არ უჩანს. ღვთისადმი თქვენი მადლიერება ყველა სიტყვას აღემატა და ცრემლებად გადმოიღვარა.

პატივცემულო ქალბატონო, მახარებს თქვენი სიხარული და ვმადლობ ღმერთს. თქვენი მეუფება დაფუძნებული არ არის დიდკაცურ სისხლსა და სულზე. თქვენ სულით აღიწიეთ მეფეთა მეუფემდე და უფალთა უფლამდე. გონებით მასთან ურთიერთობთ და ლოცვით მას ესაუბრებით. ის ჰაერი და სინათლეა თქვენი სულისა და ყოველთვის თქვენი სულიერი თვალთახედვის წინაშე იმყოფება. ვისაც არ უნდა ესაუბროთ, თითქოს მესამეს ესაუბრებით, რადგან უფალი მეორეა თქვენსა და თითოეულ თქვენს მოსაუბრეს შორის, თქვენ ვიდრე იტყვით, ღმერთში ფიქრობთ, თქვენ მონა ხართ ღვთისა და ამიტომაც შვილი ხართ ღვთისა. აქედან მოდის თქვენი მეუფება და კეთილშობილება, ეს ერთადერთი მეუფებაა, რომელიც არასოდეს განქარდება და ერთადერთი საუკუნო კეთილშობილება. იგი რწმენით შეიძინება და ცრემლითა და ლოცვით შეინახება.

უფალმა იდუმალ უპასუხა თქვენი გულის ლოცვებს, ისე როგორც ქანანელს: დედაკაცო, დიდ არს სარწმუნოება შენი, იყავნ ნებისაებრ შენისა. და მოხდა ის, რაც ყველას სურდა. უფალმა ძე შეცთომილი სწორ გზას დაუბრუნა, დაიხსნა იგი მამის წყევლისაგან, რომელსაც საუკუნო წარწყმედისკენ მიჰყავს კაცი, ხოლო მამა - სასოწარკვეთილებისგან. თქვენ კი ზენაარი თქვენი რწმენის გამო იმით დაგაჯილდოებთ, რომ უფრო განგამტკიცებთ სულიერ კეთილშობილებასა და მეუფებაში, ვიდრე არ გადახვალთ მის საუკუნო სასუფეველში, სადაც მეუფებს უფალი იესო ქრისტე. მშვიდობა და კურთხევა ქრისტესი თქვენზედა.
ბეჭდვაელფოსტა
კომენტარი არ გაკეთებულა
სხვა სიახლეები
31.12.2019
თეოლოგი გიორგი თოდუა, პროექტის - "ბიბლია განმარტებებით" კონსულტანტი:
"ფს. 22.6-ის ("წყალობაი შენი, უფალო,
19.12.2019
თა­მარ მა­მა­ცაშ­ვი­ლი - "ბიბ­ლი­ის გან­მარ­ტე­ბე­ბის" პრო­ექ­ტის ავ­ტო­რი და მთა­ვა­რი რე­დაქ­ტო­რია და ჩვენ მას ვთხო­ვეთ ნა­წყვე­ტე­ბის შე­სა­ხებ ესა­უბ­რა.
31.07.2019
გამარჯობა, ჩვენო მამაო. მთელი ფერეიდნელ ქართველებისგან მოგესალმებით და გიკითხავთ.
12.04.2019
დედა იოანა (სამანიშვილი) მეუფე ანტონის ყოფილი მეუღლეა. გთავაზობთ წერილს, რომელიც მან რუსთავი 2-ის ცილსმწამებლური სიუჟეტის საპასუხოდ დაწერა:
25.02.2019
ბერი ერმოლაოსი (ჭეჟია):

ათონზე ბერული ცხოვრების ორი ფორმაა, ბერთა ნაწილი მონასტრებში ცხოვრობს,
06.06.2018
მე მამას ვგავარ. ზუსტად მისნაირი თვალები მაქვს.
ერთხელ ვსეირნობდით. ქუჩაში ნაცნობი შეხვდა, მომეფერა და თქვა, - წვერები რომ ჰქონდეს, შენ იქნებოდიო.
18.05.2018
მოდიან, მოედინებიან უწყვეტ ნაკადად, მოაქვთ ჩემი ქვეყნის დიდება, პატივი, სიწმინდე და სიყვარული! მოდიან ამაყად უფლის ერთგული ჯარისკაცები, სამშობლოს დამცველი რაინდები!
27.04.2018
ამ წერილის ავტორი პოლკოვნიკი შალვა ჩუბინიძეა:

მეოცე საუკუნის ოთხმოციანი წლების ბოლოს საქართველოში
26.02.2018
დაუფარავად გაუხსენი გული მოძღვარს, ნურაფრის შეგრცხვება, ღმერთმა ისედაც იცის შენი ნებისმიერი გულისთქმა და საქციელი
მუდმივი კალენდარი
წელი
დღესასწაული:
ყველა დღესასწაული
გამოთვლა
განულება
საეკლესიო კალენდარი
ძველი სტილით
ახალი სტილით
ორ სა ოთ ხუ პა შა კვ
1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29
ჟურნალი
ჟურნალის ბოლო ნომრები:
"მივდერკ ჭენებით დაცემად და უფალმა ხელი აღმიპყრა მე"
მხოლოდ ამ განსაცდელთა გავლით მოვა სინანულში ქართველი და ჩვენც გამოგვიჩენს უფალი ახალ მოშურნე ილიას!
არ არსებობს სული, რომელმაც სცოდა, სინანული განიცადა და საკუთარ თავში უძღები შვილი ვერ ამოიცნო.