სოფელ წილკანში, არჩილ ტატუნაშვილის ოჯახში, საქართველოს კათოლიკოს - პატრიარქი, უწმინდესი და უნეტარესი ილია მეორე მივიდა. უწმინდესმა ტატუნაშვილის ოჯახსა და ნათესავებს სამძიმარი გამოუცხადა. უწმინდესთან ერთად ტატუნაშვილების ოჯახში მივიდნენ სასულიერო პირებიც. ილია მეორე სასულიერო პირებთან ერთად არჩილ ტატუნაშვილის სულის მოსახსენებელ პანაშვიდს აღავლენს.

ტატუნაშვილის სახლთან იმყოფება ეროვნული გვარდიის საპატიო ყარაული. სახლთან ასევე აღმართულია საქართველოს დროშა.

შეგახსენებთ, რომ 22 თებერვალს, საოკუპაციო რეჟიმმა საქართველოს 3 მოქალაქე - არჩილ ტატუნაშვილი, ლევან ქუტაშვილი და იოსებ პავლიაშვილი, ახალგორში უკანონოდ დააკავა. 23 თებერვალს კი ცნობილი გახდა, რომ არჩილ ტატუნაშვილი გაურკვეველ ვითარებაში გარდაიცვალა.

ტატუნაშვილის ცხედარი 26 დღიანი მოლოდინის შემდეგ, 21

მარტს გამთენიისას საკუთარ ოჯახში გადაასვენეს. ცხედრის გადმოსვენების საკითხში წითელი ჯვრის კომიტეტი იყო ჩართული.

არჩილ ტატუნაშვილს 24 მარტს, მუხათგვერდის ძმათა სასაფლაოზე დაკრძალავენ.