მესტიისა და ზემო სვანეთის ეპარქიის, უშგულის ლამარიას მონასტრის წინამძღვრის, არქიმანდრიტ იონას მიმართვა მრევლისადმი:
"სახელითა მამისათა და ძისათა და სულისა წმინდისათა, ამინ!
ჩვენთან არს ღმერთი!
მადლობა ღმერთს ყველაფრისთვის, რაც მე უშგულში მივიღე, ამ წლების განმავლობაში, მადლობა ჩვენს უწმინდესს, მადლობა მეუფე ილარიონს, რომ ჩემი თხოვნა დააკმაყოფილა და 2011 წლის 4 დეკემბერს უშგულში, ლამარიაზე წინამძღვრად დამნიშნა.
და ახლაც, ჩემი პირადი თხოვნით, მეუფემ დააკმაყოფილა ჩემი თხოვნა და მე და მამა ილია ეპარქიას ვტოვებთ.
ყველას მოგიწოდებთ სიმშვიდისკენ, ეს არის აუცილებელი, ვილოცოთ, ლოცვას ყველაფერი შეუძლია, ლოცვით შევხვდეთ ამ პრობლემებს.
მოგეხსენებათ, რომ არის მარხვის პერიოდი, განსაცდელით დაიწყო ეს მარხვა ჩემთვის და ამ სოფლისთვის, მაგრამ სულიერად უნდა შევხედოთ ამ ყველაფერს.
მე უღრმეს მადლობას მოგახსენებთ ყველას, თანადგომისთვის, დაფასებისთვის, იმ სიყვარულისა და პატივისცემისთვის, რასაც მოსვლის დღიდან გვაგრძნობინებდით.
მართალია, იყო ბევრი წინააღმდეგობაც, მაგრამ უფლის ძალით და მადლით გავუმკლავდით ყველა სირთულეს.
შენდობას ვითხოვ აბსოლუტურად ყველა უშგულელისგან, თავდაპირველად რომ მოვედი აქ პირობა მოგეცით, რომ ბოლომდე თქვენს გვერდით ვიქნებოდი, მაგრამ ასე არ ხდება, ჩემს შემთხვევაში ასე არ მოხდა.
ყველამ კარგად იცის მოსვლის დღიდან რაც გვიკეთებია, ამას ღმერთი შეაფასებს, სოფელი შეაფასებს და ეპარქია შეაფასებს.
მადლობას ვუხდი ღმერთს, პატრიარქს და მეუფე ილარიონს, რომ საშუალება მოგვეცა და ჩემთვის ყველაზე უწმინდეს ტაძარში, ლამარიაზე მომიწია მსახურება და ექვსი წელი ვწირავდი აქ.
მადლობას გიხდით კიდევ ერთხელ თითოეულ თქვენგანს, დალოცვილები იყავით და გახარებულები. კიდევ ერთხელ გთხოვთ, რომ მშვიდად შევხვდეთ ამ ყველაფერს.
ვილოცოთ, ლოცვა მეტ ნაყოფს გამოიღებს ყოველთვის, დედა ღვთისმშობელს ესაუბრეთ, არ აყვეთ ბოროტ ენებს და ჭორებს. არავისკენ თითი არ გაიშვიროთ, არავის არაფერი არ დავაბრალოთ. პირადად მე ვიღებ ჩემს თავზე ყველა ბრალეულობას.
ღმერთმა დაგლოცოთ და წყალობა მოგცეთ!
ჩვენთან არს ღმერთი!!!"
05.12.2017
