ვარძიის მონასტრიდან გვამცნობენ:
-ვარძიის ტაძარში გაჩენილი ხანძრის შემდეგ, უკვე დაიწყო სპეციალისტების მიერ ფრესკების გაწმენდა და საბედნიეროდ, როგორც მათ აღნიშნეს, დროულად მოქმედების შემთხვევაში, ფრესკები დაუბრუნდება თავის პირვანდელ სახეს. რა თქმა უნდა, ეს ჩვენ არ გვათავისუფლებს პასუხისმგებლობისა და ტკივილისაგან, რომელსაც განვიცდით ამ ძალიან ცუდი შემთხვევის გამო. მადლობას მოვახსენებთ ყველას, ვინც გულთან მიიტანა მონასტრისა და მთლიანად ჩვენი ქვეყნის ეს დიდი სატკივარი და განსაკუთრებული მხარდაჭერა და თანადგომა გამოხატა ამ მძიმე დღეებში. სამწუხაროდ, ზოგიერთებისაგან იყო მცდელობა, რომ ეს შემთხვევა გამოეყენებინათ მონასტრის და ზოგადად ქართული ეკლესიის წინააღმდეგ. გვრჩება შთაბეჭდილება, რომ მიზანმიმართულად ხდება ამ უბედური შემთხვევის უფრო მუქ ფერებში დანახვა. ზოგიერთმა ისიც კი ბრძანა, რომ ვარძიაში და ასეთი მნიშვნელობის ძეგლებში არ უნდა აღესრულებოდეს წირვა-ლოცვა და არ უნდა იყოს მოქმედი მონასტრები, რომ ამ ადგილებში არ უნდა ცხოვრობდნენ"გაუნათლებლები და ბნელები". როცა ერთი ხელის მოსმით, უცხო ადამიანს, ვუწოდებთ გაუნათლებელსა და ბნელს, ძალიან დიდი კითხვის ნიშანი ჩნდება ასეთი განმცხადებლის სწავლულობისა და ალბათ-ზნეობისაც. უბედური შემთხვევა სამწუხაროდ შესაძლოა მოხდეს არა მარტო საპატრიარქოს კუთვნილ მონასტერში, არამედ ღმერთმა გვაშოროს, სახელმწიფო მუზეუმშიც.
ერთი საუკუნეც არ არის გასული იმ ტრაგიკული მოვლენებიდან, როდესაც ეკლესია-მონასტრებიდან გაყარეს სასულიერო პირები. ნუ დავემსგავსებით შეფარულად მათ მემკვიდრეებს!
დაახლოებით 20 წელია, რაც ვარძიაში მოქმედი მონასტერია და ამ ხნის განმავლობაში, ბევრი სასიხარულო და ბევრი სამწუხარო ამბავი შეგვმთხვევია. ხშირად ყოფილა შემთხვევები, როდესაც ზოგიერთ, ჩვენს, არაკეთილმოსურნე მეზობლებს, პირდაპირ უთქვმთ მონასტრის ძმობისთვის:რატომ ცხოვრობთ ვარძიაში, წადით და თქვენს საქართველოში იცხოვრეთო. ამას იმიტომ ვამბობთ ასე ხმამაღლა, რომ დღესაც ამ აზრს ატარებენ(ცოტა განსხვავებულად)ზოგიერთი ადამიანები.
ვარძიაში, ზოგადად, ძალიან ბევრი პრობლემაა, რომლებიც შორიდან მაყურებელმა ადამიანებმა არ იციან. ჩვენთვის მტკივნეულია ის, რომ ვარძიის მთავარ ტაძარს იატაკიც კი არ გააჩნია. არის ასევე, მართლაც სამარცხვინო"ფანერკის"კანკელი. აქ მოღვაწეობის 20 წლის მანძილზე, ვითხოვთ ამ პრობლემის მოგვარებას, მაგრამ. . .
ასევე გვინდა შევეხოთ გამოქვაბულიდან, (სატრაპეზო)გამოყოფილ "ფეჩის ტრუბას", რომელიც რა გასაკვირია და არ მოსწონთ ადამიანებს დ არ მოგვწონს -არც ჩვენ. ამიტომ 4-5 წელია ვითხოვთ, შესაბამისი სტრუქტურებისაგან, გამოინახოს ადგილი ვარძიაშივე და გაკეთდეს პტოექტი მონასტრის სატრაპეზოსა და სენაკებისათვის. რისი განხორციელების შემთხვევაშიც, გამოქვაბულები ნაწილობრივ განიტვირთება მაცხოვრებლებისაგან.
მოგეხსენებათ, რომ ვარძია არის საზღვრისპირა რეგიონი, თურქეთიდან-15კილომეტრში. უწმიდესსა და უნეტარესს, სრულიად საქართველოს კათოლიკოს-პატრიარქს, ილია მეორეს, ხშირად გაუსვამს ხაზი, თავის ქადაგებებში, საზღვრისპირა რეგიონებში მონასტრების დაარსება -გაძლიერებისათვის. ვფიქრობთ, ასეთი მონასტრების გაძლიერებაზე უნდა იფიქროს არა მარტო ეკლესიამ, არამედ-სახელმწიფომ და ყველა სახელმწიფოებრივად და ეროვნულად მოაზროვნე საზოგადოების წარმომადგენლებმა.
დარწმუნებულები ვართ, სათანადო სულიერებისა და ხელშეწყობის პირობებში, მონასტრებში ისევ შეიქმნება ისეთი საგანძური, როგორებიც იქმნებოდა საუკუნეების წინ და რომლითაც ამაყები ვართ ჩვენ დღეს.
ეკლესიის წიაღში, დღესაც ქმნიან დიდი სულიერი და კულტურული ღირებულების მქონე ნიმუშებს და ღვთის შეწევნით კვლავ შეიქმნება მშვენიერი ნაქარგობები, რუდუნებითა და ღამისთევებით გადაწერილი ოთხთავი და ფსალმუნნი, დაიწერება და მოიჭედება უმშვენიერესი ხატები, ღვთის სადიდებლად და ჩვენი ერის გასახარად!
შენდობას ვითხოვთ გაგრძელებული სიტყვისთვის.
შენდობას ვითხოვთ ჩვენი დაუდევრობისათვის.
ღმერთმა დაგლოცოთ და გაგახაროთ. გეწეოდეთ ვარძიის ღვთისმშობლის მადლი!
აქვე გთავაზობთ დაზიანებული ფრესკების ფოტოებს, რომელიც უმრავლეს ფოტოებისგან საგრძნობლად განსხვავდება. წარმოდგენილი ფოტოები უფრო ნათელია და ობიექტურად გადაღებული:
