დედა ეკლესია ყველას მანუგეშებელია, თავად თუ ყოფილა განსაცდელის წინაშე? -ამ შეკითხვით მივმართეთ დიდი დიღმის ასი ათასი მოწამის სახელობის ტაძრის მოძღვარს, მამა ირაკლი დუმბაძეს:

-გახსოვთ სახარებაში რას გვასწავლის მაცხოვარი. თუ მე მდევნეს, თქვენც გდევნიან, თუ მე შემიწყანრებ, თქვენც შეგიწყნარებენო, თუკი ეკლესიის ისტორიას გადავავლებთ თვალს, ვნახავთ, რომ მისი ისტორიის უმეტესობა ამ სამყაროს მხრიდან მისი დევნის, გაქრობის მცდელობაა. გავიხსენოთ ყველაზე უკანასკნელი, მასშტაბური დევნა დედა ეკლესიისა, რომელიც კომუნისტური რეჟიმის დროს მოხდა. როგორ ჟლიტეს, ხვრიტეს სასულიერო პირები უბრალო მორწმუნეები და შედეგი, ვითომ დამონებული, განადგურებული ეკლესია კვლავ წამოიმრთა და ბრწყინავს. ბრწყინავს, რადგან ქრისტეს სიტყვები ჭეშმარიტია: "ამას კლდესა ზედა აღვაშენო მე ეკლესიაი ჩემი და ბჭენი ჯოჯოხეთისანი ვერ ერეოდიან მას" (მათე. 16. 18), მაგრამ ეს არ გვაძლევს მოდუნების საშუალებას. ვიცით, რომ უდიდესი განსაცდელი კიდევ წინ გვაქვს. ეს იქნება ანტიქრისტეს მიერ წარმოებული დევნა, რომელიც როგორც მაცხოვარი ამბობს, ყველაზე მძიმე განსაცდელი იქნება კაცობრიობის ისტორიაში.