გვესაუბრება ბათუმის წმინდა ბარბარეს სახელობის ტაძრის წინამძღვარი, დეკანოზი შიო პაიჭაძე:
- მამაო, როდის უნდა შეიღებოს კვერცხები, უფრო დღისით თუ ღამით?
- წითელ პარასკევს მწუხრამდე, რადგანაც მწუხრის შემდგომ მეორე დღე იწყება.
- ბოლო დროს ძალიან მიღებული გახდა კვერცხების ჭრელა-ჭრულა ფერებში შეღებვა. ეს ეკლესიურად გამართლებულია?
- კვერცხი უნდა იყოს წითელი! ეს უკავშირდება მაგდალინელის სასწაულს, სადაც კვერცხი წითლად შეიღება, ნიშნად ქრისტეს სისხლის დაღვრისა და გამოსყიდვისა. ეს სიმბოლო დასაცავია ნამდვილად!
-ზოგჯერ ოჯახში ძალიან ბევრი კვერცხი იღებება და რჩება კიდეც აღდგომის დღესასწაულის შემდეგ. რა უნდა ვუყოთ ამ კვერცხებს, რომლებიც არ მიირთვეს.
-კვერცხი ამაღლებამდე უნდა იყოს და მიირთმევდნენ ქრისტიანები. ადრეულ საუკუნეებში ასეც იყო. დღეს ეს მონასტრებშია შემორჩენილი და როცა თავდება წითელი კვერცხი, პარასკევობით ღებავენ და მიირთმევენ მოსახსენებელად აღდგომისა. მსგავსად არის ათონის წმინდა მთაზე.
- ბევრი ფიქრობს, რომ აღდგომის კვერცხი არ ფუჭდება და ამიტომ მაცივარში საერთოდ არ ინახავს. ეს სწორი საქციელია?
- სწორი არ არის, რადგან აღდგიმის კვერცხი მაცივარში უნდა დაიდოს: "არა გამოსცადო უფალი ღმერთი შენი"!
- რა დატვირთვა აქვს აღდგომასთან პასკას?
- პასკა სიმბოლოა გოლგოთისა! განახლებისა!
- სააღდგომოდ ხორბალსაც თესავენ. ამოსულ ჯეჯილში კვერცს და პასკას დებენ, ეს რას ნიშნავს?
- ჯეჯილი არის საყოველთაო აღდგომოს სიმბოლი: "დაეთესვის, ხორცი ფშვინვიერი და აღდგების ხორცი სულიერი"! - ამბობს პავლე მოციქული.
- აღდგომის დღესასწაულზე მრევლს ტაძარში საკურთხებლად მიაქვს წითელი კვერცხი და პასკა...
- ეს სწორი ქმედებაა. წითელ პარასკევსაც მიაქვთ და აწყობენ ლუსკუმაზე, სადაც დაბრძანებულია ქრისტეს გარდამოხსნა!
- აღდგომის დღესასწაულს ვინც ვერ შეხვდება ღამისთევით ისინი როგორ უნდა მოიქცნენ?
- უძლურებისა ან დევნის გამო, ქრისტიანები ვერ ესწრებიან აღდგომას, მაგრამ გავამხნევებ მათ: ქრისტე თქვენს ოჯახებში თავისი დიდებით შემოდის! ალბანეთში, როცა მუსლიმებმა დაიწყეს დევნა ქრისტიანობისა, ერთმა სერბმა ქალბატონმა რადიომიმღებით დაიჭირა წირვის ტრანსლაცია. ამას ყოველ კვირა დღეს აკეთებდა. როცა მღვდელი იტყოდა: "მიიღეთ და სჭამეთ, რამეთუ ესე არს ხორცი ჩემი, თქვენთვის განტეხილი..." დედა დგებოდა, ღვინოში აწობდა პურს და შვილებს ურიგებდა. აი, ეს არის ქრისტიანობის ნამდვილი გაგება... უფალმა დაგლოცოთ და გაგახაროთ!
