გვესაუბრება წმინდა იოანე ღვთისმეტყველის სახელობის ტაძრის მოძღვარი, დეკანოზი კონსტანტინე გიორგაძე:

-მამაო, ვნება ყველა ადამაინს ებრძვის?

-ყველა ადამიანს თავისი მტერი ყავს მიჩენილი, ზოგს მეტი ზოგს ნაკლები. ბოროტი ადამიანში ეძებს სუსტ და უფრო დაუცველ ადგილებს და პირდაპირ იქ ურტყამს. ბოროტი ცდილობს ადამიანი ისე დასცეს ცოდვით, რომ მას მონანიების საშუალებაც არ ჰქონდეს.

- რომელი ვნება ებრძვის დღეს ადამიანს?

-რომელი აღარ ებრძის. მტერს დიდი ჯაფაც აღარ სჭირდება, ახლა ისეთ მდგომარეობაში ვართ, ბრძოლასაც ვერ დაარქმევ. როცა უფალი მოვა თავად გამოარჩევს ცოდვილებს მართლებისგან, ვითარც მწყემსი ცხვრებს თხებისგან. ცხვრებს მარჯვნივ დაიყენებს თხებს კი მარცხნივ. დღევანდელი ადამიანების დიდი ნაწილი აღარ ელოდება უფლის ამ გამორჩევას და თავისი არჩევანით აყენებს თავს მარცხენა მხარეს.

-ზოგჯერ ვერ ერკვევი ეს ცოდვა არის თუ არა, შეიძლება ვერცკი მიხვდე ეს თუ ცოდვაა...

- რომ არ ვიცით ესეც ცოდვაა. ჩვენ გვაქვს საშუალება ეკლესიაში მივიდეთ, გავიგოთ ყველაფერი, მითუმეტეს დღეს უამრავი ლიტერატურა არსებობს. ადამიანი მუდმივად მზად უნდა იყოს ვნებებთან ბრძოლისთვის. დღეს გარეთ გასვლა არც არის საჭირო, რომ ვნება "იშოვო" და მასში ჩავარდე. ეს უკვე სახლშია შემოვარდნილი. ინტერნეტით და ტელევიზიით. დღეს შეიძლება მართლაც უფრო რთული იყოს გადარჩენა რამეთუ ძალიან ბევრი ხაფანგებია დაგებული, მაგრამ შედარებით ადვილი შსეიძლება იყოს იმიტომ, რომ იმდენ ღვაწლს არ მოგვეთხოვოს როგორიც ჩვენს მამებს და წინეპრებს. უფალი ისეთი მოწყალეა რომ გადარჩენის სურვილსაც იწირავს თუ ეს გულწრფელია. მართლმადიდებელ ქრისტიანს ძალიან დიდი სიფრთხილე სჭირდება რათა გაარჩიოს შენიღბული ცოდა სინამდვილისაგან.

- როგორ უნდა მიიღოს ადამიანმა გონიერება რომ გაარჩიოს კარგი და ცუდი?

-ეს ეკლესიური ცხოვრებით მიიღწევა, რაც არა მხოლოდ სანთლის დანთებით გამოიხატება, არამედ ეკლესიურ ცხოვრებაში ჩართულობით, წმინდა წერილის ქადაგებების და მამათა ცხოვრების გაცნობით. არ შეიძლება ადამიანმა კვირა დღე და დიდი დღესასწაულები გააცდინოს, ხშირად უნდა თქვას აღსარება და როცა აკურთხებენ უნდა ეზიაროს. ეკლესია არის ის ორგანო, რომელიც ორიენტირებულია ადამაინის გადარჩენაზე. ყველაფერს აკეთებს იმისათვის, რომ გადავრჩეთ.. ადამიანს აქვს თავისუფალი ნება, ამ ნებას უფალი არ ეხება, წინააღმდეგ შემთხვევაში სამართლიანობა დაირღვეოდა. ადამიანი შექმნილია ღვთის ხატად და მსგავსად, როგორც თვითონ, ისე შექმნა ადამიანი, მხოლოდ მიმადლებულად და არა ბუნებითად. ღმერთი ხომ იმიტომ განკაცდა, რომ ადამიანი გაეღმერთებინა.

-თითქოს ეკლესიურად ვცხოვრობთ, დავდივართ ტაძარში, მაგრამ მაინც ვვარდებით ცოდვებში, ათასგავრი ვნებებით ვართ შეპყრობილი..

-ვვარდებით, იმიტომ რომ ჩვენ ლოცვა და ღვაწლი არ ვიცით. მახსენდება პატერიკებიდან, როცა ერთ წმინდა მამას უფალმა წირვაზე მყოფი ადამიანების გულთა ნადები გაუხსნა, არც ერთი მათგანი შინაგანად არ ლოცულობდა და მათი გონება მხოლოდ მიწიურით იყო დაკავებული, მხოლოდ გარეგნულად იწერდნენ პირჯვარს... უფლის მსგავსება არის ის რომ ჩვენც ისე მოვიქცეთ როგორი მაგალითიც მან მოგვცა და რაზეც გვაკურთხა. ნამდვილი ეკლესიურობა არის ის რომ ეკლესიაშიც სათანადოდ ვიდგედ და გარეთაც ეკლესიურად მოვიქცეთ.

-როგორ შეგვიძლია ვებრძოლოთ ვნებებს და ცოდვებს?

-უფალმა ნათლად მიანიშნა თავის მოწაფეებს სიტყვებით: "ესე ნათესავი არარაით განვალს, გარნა ლოცვითა და მარხვითა"
ღმერთმა დალოცოს სრულიად საქართველო, ვუსურვოთ მარხვა სინანულისა და აღდგომა სიხარულისა.