წმინდა თეოდორე დაიბადა კილიკიის ტარსუში 602 წელს. სწავლობდა ანტიოქიაში, სადაც ფილოსოფოსის მეტსახელი მიიღო, შემდგომში გადავიდა კონსტანტინოპოლში. სამოცი წლისა ჩავიდა რომში სამეცნიერო საქმიანობისთვის და ბერძნულ მონასტერში დასახლდა. 668 წელს პაპმა ვიტალიანემ ის კენტერბერიის ეკლესიის მთავარეპისკოპოსად აკურთხა. წმინდა თეოდორე მაშინ დანიშნეს ინგლისის ეკლესიის წინამძღვარად, როცა იქ სასტიკი მტრობა და დაპირისპირება იყო ირლანდიული ჩვეულებების რომაულით შეცვლის გამო. წმინდა თეოდორემ შემოიარა თავისი ეპარქიის ყველა ოლქი. დანიშნა ეპისკოპოსები დაცარიელებულ კათედრებზე. მოიწვია კრება, სადაც დაამტკიცა, რომ ინგლისის ეკლესია რომაული ტრადიციის მიხედვით იდღესასწაულებდა აღდგომას. შეწყვიტა ეპისკოპოსებს შორის დავა იურისდიქციების გამო, განამტკიცა საეკლესიო დისციპლინა მონასტრებში და ხალხის რელიგიური ცხოვრება. დააარსა კენტერბერიის ცნობილი სკოლა, სადაც ლათინურთან ერთად ბერძნულსაც ასწავლიდნენ.

მრავალნაღვაწი წმინდა თეოდორე მშვიდობით აღესრულა 88 წლის ასაკში, 690 წლის 19 სექტემბერს. მისი წმინდა ნაწილები 1091 წელს უხრწნელი მოიპოვეს.

წმინდა თეოდორე ჭეშმარიტად დამაარსებელია ინგლისის ერთიანი ეკლესიისა, მან შეარიგა ერთმანეთს წაკიდებული სამეფოები, რომლის გამოც დაყოფილი იყო ინგლისი (თუმცა ქვეყნის საბოლოო გაერთიანება X საუკუნეში მოხდა). მან გააერთიანა რომაული და კელტური ტრადიციები, გამოიყენა რა რომაული მეცნიერება და ორგანიზაცია კელტ სამღვდელოებასა და სულიერებასთან ერთად. მან მისცა ეკლესიას ყველაფერი, რაც მას ყოველთვის ყველაზე მეტად სჭირდებოდა: ერთიანობა, ორგანიზაცია, მეცნიერება, რწმენის მტკიცე აღსარება, ნამდვილი მწყემსობა და რაც ყველაზე მთავარია - ლოცვა.