"კარიბჭის" ვებ გვერდზე ცოტა ხნის წინ გატყობინებდით, ჩვენს ქვეყანაში მომხდარი სტიქიური მოვლენები სოფელ წყლულეთსაც რომ შეეხო - უხვად მოვარდნილმა ნალექმა წყლულეთამდე მისასვლელი გზა მთლიანად როგორ გაანადგურა. ადიდებული წყლის ნაკადი წყლულეთისკენ რომ წამოვიდა და ივერიის ღვთისმშობლის ტაძრის შუაგულში გაიარა. ტაძარი უვნებელი გადარჩა. სოფლად შემორჩენილი თითო ოროლა მოსახლე და იქ არსებული მამათა მონასტრის წევრებიც მედგრად უმკლავდებოდნენ მომხდარს. წყლულეთი დახმარების მოლოდინში იყო. მადლობა ღმერთს, ჩვენი ნათქვმი არ დარჩა "ხმად მღაღადებლისა უდაბნოსა შინა" და ქვემო წყლულეთის მამათა მონასტრის თხოვნა ყურად იღეს.
გვესაუბრება ქვემო წყლულეთის ივერიის ღვთისმშობლის სახელობის მამათა მონასტრის წინამძღვარი, სქემიღუმენი ნიკოლოზი (ცაბაძე):


-მადლობელი ვართ პირველ რიგში ღვთისა, რომ ყურად იღო ჩვენმა ხელისუფლებამ მონასტრის თხოვნა და სტიქიის შედეგად დაზიანებული სოფლის გზის შეკეთება დაიწყო. თქვენი ჟურნალის და სხვა საინფორმაციო საშუალებების დახმარებით მთავრობის ყურამდეც მივიდა ჩვენი თხოვნა და დახმარება აღმოგვიჩინეს. მადლობელი ვართ მათი. რაც ადრე იყო, იმაზე უკეთესი გზა გაკეთდა, სანიაღვრეებიც კეთდება. რაც მთავარი მიზეზი იყო ამ გზის დაზიანებისა. მადლობა უფალს, ყველას და დედა ღვთისმშობელს რომ უყურადღებოდ არ დაგვტოვა.
მართლაც რომ გულით და სულით იმუშავეს გზის გასაკეთებლად. დაახლოებით ხუთი დღეა მიმდინარეობს სამუშაოები. სანიაღვრეებისთვის ჩამოიტანეს დიდი მილები.
გვახარებს ის, რომ ერის და ბერი ერთიანია. წყლულეთში ძირითადად მონასტერზე იყო ყურადღება გამახვილებული, მოგეხსენებათ, რომ ქვემო წყლულეთში მოსახლეობა არ ცხოვრობს, მუდმივად მხოლოდ ორი ადამიანია აქ. მადლობას ვუხდით ჩვენს ხელისუფლებას. დროულად აღმოგვიჩინეს დახმარება.

ღმერთმა დაგლოცოთ, ღმერთმა დალოცოს ჩვენი ერი და ბერი და კეთილმორწმუნე მთავრობა და მხედრობა მისი. ერთობით მოგვცეს სულის ცხონება. დიდი მადლობა ჟურნალ "კარიბჭეს" ყურადღებისთვის.