ეს ამბავი ვერა ბარიშევამ მოგვითხრო:

"ჩემი მეგობარი, ეკატერინე, ჯერ კიდევ ლავრიდან იცნობდა მამა სერაფიმეს. ის მეუღლესთან ერთად ლიგოვოში ცხოვრობდა. ოქტომბრის რევოლუციამდე ბეწვის ქუდების პატარა სამკერვალო და მაღაზია ჰქონდათ. სამი შვილი ჰყავდათ. ახალი ხელისუფლების ხელში ძალიან გაუჭირდათ თავის რჩენა. ნეპ-ის პერიოდში ოჯახმა განაახლა საქმიანობა, მაგრამ მალე ეკატერინეს მეუღლე დააპატიმრეს. ქალი სასოწარკვეთილებაში ჩავარდა, მეოთხე შვილს ელოდებოდა. ახლობლები ნაყოფის მოცილებას ურჩევდნენ. ეკატერინემ რჩევისა და ლოცვისათვის მამა სერაფიმეს მიმართა. ბერმა ძალიან თბილად მიიღო, აკურთხა და ყურადღებით მოუსმინა. შემდეგ უთხრა: "მოდი, ვილოცოთ: თქვენ აქ, მე კი საკურთხეველში". ცოტა ხნის შემდეგ ბერი ქალს მიუახლოვდა და აუწყა: - აი რა, დედიკო! არაფერი გააკეთო, ყველაფერი ღვთის ნებას მივანდოთ. შენს ქმარს გაამართლებენ და ორმოცი დღის შემდეგ დაბრუნდება. შენ კი ისეთი ბიჭი შეგეძინება, ყველას ეყვარება. ნიკოლოზი დაარქვით უფლის წმინდანის პატივსაცემად. ლოცვა არ მიატოვო, ყოვლადწმინდა ღვთისმშობელს და წმინდა ნიკოლოზს სთხოვე დახმარება. ღმერთი ყველაფერს მოაწესრიგებს.

მცირე დუმილის შემდეგ ჩუმად დასძინა: - იცით, რა ძნელია, როცა ჩვიდმეტი წლის ქალიშვილი ტუბერკულოზით იღუპება?! ეკატერინე დაფიქრდა: - რატომ ამბობს ამასო.

შინ დაბრუნებულმა ეკატერინემ ახლობლებს მამა სერაფიმესთან შეხვედრის შესახებ უამბო. მათ ეჭვით შეხედეს ქალს, ქარაფშუტა უწოდეს, - როგორ უნდა დაუჯერო ვიღაცა ბერსო. ეკატერინეს ხმა არ ამოუღია. ღვთისმშობლის დაუჯდომელი აიღო და ბავშვებთან ერთად ყოველდღიურ ლოცვას შეუდგა. ევედრებოდა წმინდა ნიკოლოზსაც და გულმოდგინედ ასრულებდა ბერის დარიგებას. ათი დღის შემდეგ მეუღლისგან ცნობა მიიღო, ერთ თვეში გამათავისუფლებენო. ოჯახი ლოცვას განაგრძობდა, ელოდა მამასა და მეუღლეს.

და აი, ასრულდა მამა სერაფიმეს წინასწარმეტყველება - გაათავისუფლეს ეკატერინეს მეუღლე. გათავისუფლების მოწმობა ეკატერინეს მეუღლისთვის ქალის ლავრაში სტუმრობიდან ზუსტად მეორმოცე დღეს გადაუციათ.

ოჯახში მეოთხე შვილიც დაიბადა - ნიკოლოზი.

ეკატერინეს უფროსი ქალიშვილი, ნინა, ძალიან ნიჭიერი, გულწრფელი გოგონა გახლდათ: შესანიშნავად ხატავდა, ფორტეპიანოზე უკრავდა, არაჩვეულებრივად სწავლობდა. ერთხელ, ციგურებით სრიალის დროს, ძალიან დასცხა, ზედმეტი ტანსაცმელი გაიხადა და გაცივდა. დაემართა ფილტვის ანთება, დაავადება ძალიან გართულდა და საბოლოოდ ტუბერკულოზად იქცა. მკურნალობამ ვერ უშველა. ექიმებმა ავადმყოფის ყირიმში წაყვანა ურჩიეს, მაგრამ მამა სერაფიმემ ამაზე კურთხევა არ გასცა. მშობლები არ დაემორჩილნენ მოძღვარს და მაინც იშოვეს სანატორიუმის საგზური. ნინა გზაში გარდაიცვალა...