წმინდა მიწის მიმზიდველობა ჩვენი უფლის მიწიერ ცხოვრებასთან ასოცირებულ წმინდა ადგილებს უკავშირდება. ერთ-ერთი ასეთი ადგილი არის გეთსემანიის ბაღი, სადაც მახარობლების თხრობის თანახმად, მაცხოვარმა ჯვარცმის წინანდელი ღამე გაატარა. ეხლა ეს ბაღი იერუსალიმის ფარგლებშია მოქცეული. იგი ეგრეთ წოდებული ქედრონის ღელეს გაღმა, ზეთის ხილის ძირას მდებარეობს. ამ ბაღში დამთვალიერებელი ეხლაც ნახულობს მრავალსაუკუნოვანი ზეთისხილის ხეებს, თანამედროვე ტექნოლოგიების გამოყენებით მეცნიერული გამოკვლევების თანახმად ამ ზეთისხილის ხეთაგან ზოგიერთი უფლის გეთსემანიის ბაღში გატარებული ბრძოლით აღსავსე ღამის მოწმეა. მახრობლების თანახმად მაცხოვარი მოციქულებთან ერთად ხშირად დადიოდა აქ. მაგალითად ლუკა მახარობელი ამას ასე ამოწმებს: “და გამოვიდა მიერ და წარვიდა, ვითარცა ჩვეულებაი აქუნდა, მთასა მას ზეთისხილთასა და მიზდევდნენ მას მოცაფენიცა მისნი” (ლუკა 22,39).

გეთსემანიის ბაღშია ქვა, რომელზეც უფალი ლოცულობდა და მახარობლის სიტყვით "ოფლი მისი ვითარცა ცვარი სისხლისაი" დაეწვეთა ეხლაც არის შემორჩენილი. ამ ადგილზე ელენე დედოფალმა მეოთხე საუკუნეში დიდებული ბაზილიკა ააგო, როლისგანაც დღეისათვის მხოლოდ ნანგრევებია შემორჩენილი.

უშუალოდ ამ ნანგრევების ძალიან ახლოს 1924 წელს აგებულია უზარმაზარი კათოლიკური ეკლესია. იგი გეთსემანიის ბაღში უფლის მტანჯველ განცდებსა და შეპყრობას უკავშირდება. ტურისტულ ბროშურებში ეს ეკლესია ,,ერების ეკლესიად” მოიხსენიება, რადგან მის მშენებლობაში მსოფლიოს თითქმის ყველა ქრისტიანმა ერმა მიიღო მონაწილეობა. გეთსემანიის ბაღის ერთ-ერთი ყველაზე უმნიშვნელოვანესი და მომლოცველთათვის ყველაზე საყვარელი ადგილია ღვთისმშობლის საფლავზე აგებული ბაზილიკა. ღვთისმშობლის საფლავთან არ მისული არის ღვთისმშობლის მშობლების იოაკიმესა და ანას საფლავები, იქვეა დამწინდეველის მართალი იოსების საფლავი.

ამ ტაძარშია დაბრძანებული სასწაულთმოქმედი ღვთისმშობლის ხატი “იერუსალიმის ან გეთსემანიის ღვთისმშობლისა”, როლისგანაც მრავალი სასწაული აღესრულება. გეთსემანიის ბაღშივეა რუსული დედათა მონასტერი, რომელიც მარიამ მაგდალინელის სახელზე აგებული, რომელიც იმპერატორმა ალექსანდრე ააგო დედის მარიას სულის საოხებლად.

ტაძარში დაბრძანებულია ახალმოწამე დიდი მთავრინას ელისაბედისა და მისი მორჩილის ბარბარეს უხრწნელი ნაწილები. მონასტრის ტერიტორიაზე შემორჩენილია ნიში. ამ ადგილას დატოვა მაცხოვარმა სამი მოციქული პეტრე, იოანე და იაკობი და განეშორა მათ ქვის სროლის მანძილზე და ადამიანური ბუნებით შეძრწუნებული ლოცულობდა ჯვარცმამდე.

სწორედ ეს სამი გამორჩეული მოციქული, რომელთაც თაბორის მთაზე იხილეს მაცხოვრის ღვთაებრივი დიდება, ეხლა მოწმე ხდებოდნენ მაცხოვრის ადამიანური ბუნების. ქართველთა დაუდევრობისა თუ ჟამთა სიავის გამო, გეთსემანიის ბაღშიც, როგორც ბევრ წმინდა ადგილას გამქრალია ქართველთა მოღვაწეობის კვალი.

808 წლით დათარიღებული ერთ-ერთი ისტორიული წყაროს ცნობით, “ზეთისხილის მთაზე ოთხი ქართველი ბერი ცხოვრობს. გეთსემანიაში განცალკებვებულ კლდესთან სამი განდეგილი ცხოვრობს: ბერძენი, სირიელი და ქართველი”. აქ მოღვაწე ქართველ ბერს იხენებს იოანე ფოკა 1185 წლით დათარირებულ თავის ერთ-ერთ წერილში. პილიგრიმთა ცნობით, “ღვთისმშობლის ეკლესიაში, წმინდა საფლავის მარჯვნივ დგას იბერიელთა საკურთხეველი (არქიმანდრიტი აგრეთენიოსი, 1370 წ). ქართველი ადამიანი დიდი სიყვარულით ატარებს წმინდა მიწის ხსოვნას. სწორედ ამიტომაც საქართველოს ტერიტორიაზე გვხვდება გეოგრაფიული ადგილების დასახელებები: “გეთსემანია”, “ბეთანია”, “თაბორის მთა”...