ამ წმინდანის შესახებ არ მოგვითხრობს ბიზანტიური სვინაქსარი, მაგრამ მისი ხსენება შეტანილია რაბანა სლიბას (XVIII) "სირიულ მარტიროლოგიაში", ასევე სხვადასხვა არაბულ სვინაქსარში. არაბულ ტექსტებში, რომლიდანაც აქ მოგითხრობთ, წმინდა ასია წარმოგვიდგება მოსაგრედ, ხოლო სირიული ტრადიციის მიხედვით, მას პატივს მიაგებენ, როგორც მოწამეს.

წმინდა ასია სირიაში დაიბადა, სავარაუდოდ IV საუკუნის II ნახევარში. იგი დიდებულ ქრისტიანთა ოჯახიდან წარმოსდგებოდა. მრავალი წლის უშვილობის შემდეგ დედამისი დალოცვისთვის წმინდა ულიანე სპარსთან წავიდა (18 ოქტ.) და მან უწინასწარმეტყველა, რომ მალე ვაჟი შეეძინებოდა. გახარებულმა ქალმა თავისი ქონების დიდი ნაწილი მოწყალებაში უხვად მისცა გლახაკებს. ბავშვის დაბადებიდან მალევე დედას უფლის ანგელოზი გამოეცხადა და ღვთის ნება გაუმხილა, რომ ვაჟისთვის სახელად ასია დაერქმია, რაც ასურულად "ექიმს" ნიშნავს, და რომ უფალი მის მიერ მრავალ ადამიანს განკურნებდა. ასიას კარგად შეასწავლეს საღმრთო წერილი. თხუთმეტი წლისა მშობლების დაჟინებული მოთხოვნით დაქორწინდა ქალიშვილზე, რომელსაც სახელად ურანია ერქვა. მაგრამ მალე ჭაბუკმა თავისი ტანსაცმელი ერთ გლახაკს გაუცვალა და ღვთის საძიებლად შინიდან გაიქცა. შვიდი წელი წმინდა მონაზონ თომას სულიერი მორჩილების ქვეშ იყო, შემდეგ სინაზე ჩავიდა, მოსაგრე დომეტიანეს დაემოწაფა. ასია განდეგილურ ცხოვრებას ეწეოდა და მას გარეული მხეცნი ემსახურებოდნენ. ბერდიდის სიკვდილიდან სამი წლის შემდეგ მან უფლის ანგელოზისგან ბრძანება მიიღო, რომ კელია დაეტოვებინა, რამეთუ უფალს სურდა, მის მიერ წყალობა მოეღო გატანჯულ ადამიანებზე. ღვთის განგებულებით ის ანტიოქიის სიახლოვეს დაბა ტანისში მივიდა, და მისმა სიწმინდემ მრავალი განსაცდელით აღსავსე ადამიანი მიიზიდა. წმინდანის ლოცვით ბრმებს თვალები ეხილებოდათ და განრღვეულები ფეხზე დგებოდნენ, უშვილო ქალები ბავშვებს აჩენდნენ, ეშმაკეულები განიკურნებოდნენ და მან უფლის შეწევნით ერთი კაცი მკვდრეთითაც კი აღადგინა. სპარსეთის მეფემ თავისი ავადმყოფი ვაჟი წმინდანს გაუგზავნა და მისი ლოცვით ყმაწვილი განიკურნა. სიკვდილის წინ წმინდანმა ბევრი ილოცა მთელ სამყაროზე, ეკლესიაზე, ყველა შეჭირვებულზე. წმინდა ასია 15 ივლისს (V ს) გარდაიცვალა. მისი წმინდა ნაწილები ტანისში დარჩა, სადაც მრავალი კურნება აღასრულა.