საბერძნეთის ეკლესია იხსენიებს ღირს მამა ანტონი ახალს. წმინდა ანტონის დაბადების თარიღი უცნობია. ბოლო დროის არქეოლოგიური აღმოჩენები გვიჩვენებენ, რომ წმინდა ანტონი XII საუკუნეში ცხოვრობდა, და არა XIV-XV საუკუნეებში, როგორც ადრე ფიქრობდნენ. იგი მაკედონიის ქალაქ ვერიაში დაიბადა, მდიდარ და ღვთისმოსავ ოჯახში შემონაზვნების და მოსაგრეობის სურვილით ანთებულმა, სიყმაწვილეშივე დატოვა ამსოფლიური ამაოება და ბერად შედგა წმინდა იოანე ნათლისმცემლის სახელობის პიერიას მონასტერში, რომელსაც ცენტრალური ადგილი ეკავა მონასტრების ჯგუფში, რომელთაც შემდგომში ბერიის სკიტი ეწოდა. აქ გაბრწყინდნენ წმინდა გრიგოლ პალამა, ღირსი ათანასე მეტეორელი, ღირსი ნიკანორი და ღირსი დიონისე ოლიმპიელი. თავისი მონაზვნური სათნოებებით ღირსი ანტონი მალევე სამაგალითო გახდა მთელი საძმოსთვის.

განდეგილი ცხოვრების მოსურნემ წინამძღვრისაგან კურთხევა აიღო და მდინარე ალიაკმონის ნაპირას, ძნელადმისადგომ მღვიმეში განმარტოვდა. აქ მან ორმოცდაათი წელი იცხოვრა, ყველასგან დაფარულად და მხოლოდ ირგვლივ ამოსული ბალახით იკვებებოდა. მოსაგრის შესახებ მხოლოდ ერთმა მღვდელმა იცოდა, რომელსაც დროდადრო მისთვის წმინდა ზიარება მიჰქონდა. თავისი დიდი სეხნია წმინდანის გარდა, წმინდა ანტონიც მრავალი წელი იტანჯებოდა ეშმაკის თავდასხმისაგან. ეშმაკები ათასნაირი სახით ეჩვენებოდნენ და ზოგჯერაც ჩააგონებდნენ, თითქოს მდინარე ადიდდა და სადაცაა მის მღვიმეს წაიღებდა, წმინდანი მათ შემოტევებს მოუკლებელი ლოცვით იგერიებდა და არ დაუტევებდა თავის მღვიმეს. ასე მიაღწია ოთხმოცდაათწლამდე და უფალთან აღფრინდა მისი წმინდა სული.

რამდენიმე წლის შემდეგ, მის მღვიმესთან მონადირეებმა ჩაიარეს. მათმა ძაღლებმა ყეფა ატეხეს, მწყემსებმა დაინახეს ხის ფოთლებიდან გამოყოფილი ხელი, რომელიც მათ თავისთან იხმობდა. მწყემსები მივიდნენ, გამოთხარეს მღვიმის შესასვლელი და იქ წმინდა ანტონის უხრწნელი სხეული აღმოაჩინეს. ამის შესახებ შეატყობინეს ვერიის ეპისკოპოსს, რომელიც მორწმუნე ერთან ერთად წმინდანის თაყვანისაცემად მღვიმესთან მოვიდა.

იმ ხანებში ერთი დავა-კამათი ატყდა პიერიელებსა და ვერიელებს შორის, თუ ვის უნდა მიჰკუთვნოდა წმინდა ნაწილები, ეპისკოპოსის ბრძანებით ორი ხარი შეუბეს ურემს, ზედ წმინდანის სხეული დაასვენეს და გაუშვეს. ხარები უყოყმანოდ ვერიისკენ წავიდნენ და წმინდანის მშობლიურ სახლთან შეჩერდნენ, შემდგომში ამ ადგილას დიდი ტაძარი აშენდა წმინდა ანტონ ახალის სახელზე.