წმინდა ნაუმი  წმინდა კირილესა და მეთოდეს მოწაფე და წმინდა მღვდელმთავარ კლიმენტი ოქრიდელის თანამოღვაწე გახლდათ. სწორედ წმინდა კლიმენტსა და წმინდა ნაუმს უწოდეს "ახალი მოსე და აარონი". ისინი გერმანიაში შეიპყრეს და ციხეში ჩაამწყვდიეს. მაგრამ ღვთის ხელმა საპყრობილე შეარყია და ტყვეებს ჯაჭვები დასცვივდათ და მათ თავისუფლად დატოვეს იქაურობა. წმინდა კლიმენტის მღვდელმთავრობისას წმინდა ნაუმმა ოქრიდის ტბის სამხრეთ ნაპირზე მთავარანგელოზის სახელობის მონასტერი ააშენა. იგი გახლდათ ბრძენი დამრიგებელი, მკაცრი მოსაგრე, სასწაულმოქმედი და მლოცველი. ის დაუღალავად იღვწოდა წმინდა წერილის სლავურ ენაზე გადასათარგმნად. წმინდა ნაუმი 910 წლის 23 დეკემბერს გარდაიცვალა და დაკრძალეს თავის აშენებულ მონასტერში. ღირსი ნაუმის წმინდა ნაწილთაგან დღემდე მრავალი სასწაული აღესრულება.