ღირსი ბერი სტილიანე პაფლაგონიელი ცხოვრობდა VI საუკუნეში. ის უფალმა ჯერ კიდევ დედის მუცელში გამოარჩია. სტილიანე ღვთისმოშიში ბავშვი იყო. სრულწლოვანი რომ გახდა, გაყიდა ქონება, გლახაკებს დაურიგა, უარი თქვა საერო ცხოვრებაზე და ბერად შედგა. რამდენიმე წელი ცხოვრობდა მონასტერში, რათა შეესწავლა ასკეტური ცხოვრება და მიეღო სულიერი გამოცდილება. შემდეგ განმარტოვდა და ერთ მღვიმეში დაეყუდა. ღირსმა სტილიანემ ისეთ სულიერ სიმაღლეს მიაღწია, რომ ყოველდღიურ საკვებს უფლის ანგელოზისგან იღებდა. მას ლოცვით სნეულებათა განკურნების ნიჭი მიემადლა უფლისგან. განსაკუთრებული წარმატებით ბავშვებს კურნავდა ღირსი ბერის მხურვალე ლოცვა. მას უშვილო ქალებიც მიმართავდნენ და ღირსი სტილიანეს ლოცვით დედობის ღირსნი ხდებოდნენ. ამიტომ ღირსი ბერი ჩვილთა მფარველად ითვლება.