ამ წმინდანის ცხოვრების დრო უცნობია, გადმოცემის თანახმად, თვრამეტი წელი რომ შეუსრულდა, იორდანიის უდაბნოს ერთ მღვიმეს შეეფარა.

ერთხელ მისი სამყოფელის სიახლოვეს მოღვაწე, სახელგანთქმულმა ანანიამ განსამრთელებლად ერთი შეპყრობილი გაუგზავნა.

ღვთის შეწევნით, კინდეამ ეშმაკეული გაათავისუფლა, ეს უკანასკნელი კი შემდგომ მღვდელი გახდა.

რადგან იმ დროს ქრისტეს მტერნი ღირს მამას ფრიად ავიწროებდნენ, იგი იმ მონაზონთა ჯგუფს შეუერთდა, რომელნიც კვიპროსს აპირებდნენ გამგზავრებას, იქ პათოსის სიახლოვეს, უფსკრულისპირა სენაკში დასახლდა და მძიმე ღვაწლს მიეცა.

ერთხელ ღვთის ანგელოზმა მასთან სხვა ასკეტი, - იონა (ხსენება 11 ოქტომბერს) მიიყვანა, რომ სულიერ საკითხებზე ემსჯელათ.

ღირსი მამა სნეულთ კურნავდა, შეპყრობილთ - განხსნიდა და ლოცვით წვიმები მოჰყავდა.

მის სახელზე კვიპროსზე ორი ტაძარი აღაშენეს, რომელთაც დღემდე მოილოცავენ მორწმუნენი.