"წმიდა ჰყო საყოფელი თვისი მაღალმან და ღმერთმან დააფუძნა იგი უკუნისამდე" (ფსალმ.45,5; 47,9).
იტყვის უფალი ყოვლისმპყრობელი: "მე ვარ ანი და ჵე, პირუელი და უკანასკნელი" (გამოცხ.22,13).
ხოლო ქრისტეანეთა ზედა შენ ხარ ანი და ჵე ღმრთისმშობელო ქალწულო მარიამ, თავი და მიზეზი განათლებისა ჩუენისა და დასასრულსა ღუთივშუენიერი ბეჭედი ცხოვრებისა ჩუენისა.
1. გიხაროდენ, პირუელითგანვე ღუთისა მიერ გამორჩეულო და უკანასკნელ მეოხად კაცთათვის განჩინებულო.
2. გიხაროდენ, დაუსაბამოსა ღუთისა მიერ პატივცემულო და დაუსრულებლად ანგელოსთაგან საგალობელო.
3. გიხაროდენ, დასაბამითგანვე შეყუარებულო და ვიდრე დასასრულამდე სავედრებელო და უკუნისამდე სადიდებელო.
ღუთივსულიერნო შვილნო ეკკლესიისანო, ამაღლდა რა უფალი ჩუენი და ღმერთი იესო ქრისტე, მოავლინა ღმრთისმშობელმან მარიამ ანდრია მოციქული განათლებად ივერიელთა ერისა და ამაღლდა რა ქალწული მარიამ მოავლინა სათნო თვისი ქალწული ნინო მოციქული განსაბრწყინუებელად სულისა ჩუენისა.
I. ვითარცა ღმერთმან პირველ აბრაჰამის გამო, ისრაილ უწოდა ერსა თვისსა, ეგრეთვე ქალწულმან მარიამ ანდრიას გამო ქრისტეანე გვიწოდა სამწყსოსა თვისსა.
II. ვითარცა ღმერთმან მოსე გამოირჩია ისრაილთა წინამძღურად, ეგრეთვე დედოფალმან მარიამ ქალწული ნინა გამოირჩია ახლისა ისრაილისა წინამძღურად.
III. ვითარცა ღმერთმან მოსეს მისცა ათნი მცნებანი ღმრ
თივწერილნი, ეგრეთვე ქალწულსა ნინოს მოეცნეს ათნი სიტყუანი საღმთო წერილნი.
IV. ვითარცა ღმერთმან მოსეს მისცა კუერთხი ჯუარისა სახისა მომასწავებელად, ეგრეთვე ქალწულმან მისცა ნინას ვენახი ჯუარისა სახედ შეკრული, ეშმაკთა განსადევნელად.
V. ვითარცა ღმერთმან მოსეს მიანიჭა სასწაულნი, კუერთხისა გუელად შეცუალებითა, ეგრეთვე ღმრთისა დედამან შესჭურა ნინა, ჴელმწიფებითა დათრგუნვად გუელთა და ღრიანკალთა.
VI. ვითარცა მოსემ იხსნა ისრაილნი ფარაოსაგან, ეგრეთვე ქალწულმან ნინამ იხსნა ქართუელნი არმაზ-ზადენისაგან, და მათ შინა დამკვიდრებულისა ლეგეონ-ბელზებულისაგან.
VII. ვითარცა შემდგომად მოსესა იესო ქრისტემან გამოირჩივნა ათორმეტნი მოციქულნი და მიერ განანათლა ყოველი ქუეყანა, ეგრეთვე ღმრთისმშობელმან მარიამ შემდგომად ნინასა, გამოაჩინა ათორმეტნი მამანი და მათ მიერ განაბრწინუა ივერიისა ქუეყანა.
ესრეთ ყოვლითა კეთილობითა ყოვლად სახიერსა ძესა თვისსა ემსგავსა ყოვლად უბიწო ქალწული მარიამ, ამისთვის ჰშუენის ჩუენდა საყუარელნო, რათა ყოვლადვე გვიყუარდეს ყოვლად საყუარელი, ფრიად სასურუელი და ღმრთივსანატრელი ღუთისმშობელი მარიამ და მარადღე დაუცხრომელად სულითა და გულით მსგავსად სიყუარულისა და სიტკბოებისა მისისა უგალობდეთ გიხაროდენსა და ვევედრებოდეთ ღმრთივშეწყობილითა პარაკლისითა.
რამეთუ იყო ვინმე ბერი ღირსი და პატიოსანი, რომელსა დიდის სურვილით უყვარდა ღუთისმშობელი ქალწული მარიამ და სიყუარულითა მისითა განეშორა სოფლისა ამბოხებათა, შევიდა და დაემკვიდრა პირსა იორდანისასა მარტოებით და მარადის უღაღადებდა დედოფალსა ჩუენსა მარიამს გიხაროდენსა და ევედრებოდა პარაკლისითა და ადიდებდა მისგან შობილსა იესო ქრისტესა. ხოლო საზრდელად მისა იყო მწვანვილთაგან ველისათა და ოდეს მოიწია ზამთარი, და განხმა მწუანვილი, სულმოკლე-იქმნა ბერი იგი და იწყო ურვად ვითარმედ: "რაჲღა იყოს საზრდელად ჩემდა".
და აჰა, მოვიდა მისა ანგელოსი უფლისა და ჰრქუა: "ბერო, აღმოიღე ქუაჲ ერთი წყლისა მაგისაგან და განსტეხე იგი". ხოლო მან შთაჰყო ჴელი იორდანესა შინა და აღმოიღო მცირე ქვაჲ და განსტეხა იგი და იხილა მას შინა ჭიაჲ და პირსა მისა ეპყრა მდელოჲ. მაშინ ჰრქუა მას ანგელოსმან: "იხილე სახიერება ღმრთისა, უკეთუ ქუასა შინა ცხოველი დაჰბადა და მასცა საზრდელი განუჩინა, ხოლო შენ რომელი ადიდებ ღმერთსა და უგალობ დედასა მისსა, არა სათნო იყოსაა გამოზრდა შენი?". ესე რა ესმა ანგელოსისაგან, გულსავსე იქმნა, ბერი იგი და მადლობით ადიდებდა კაცთმოყუარებასა ღმრთისასა და დაუცხრომელად უგალობდა ყოვლადსაგალობელსა ქალწულსა მარიამს.
აწ ჩუენცა საყუარელნო, ღმრთივბრწყინუალითა ჴმითა უგალობდეთ ღმრთისმშობელსა დედოფალსა ჩუენსა მარიამს და ვიტყოდეთ:
4. გიხაროდენ არსისა ღმრთისა შემყუარებელო.
5. გიხაროდენ ბუნებით ერთისა თაყვანისმცემელო.
6. გიხაროდენ გუამით სამისა აღმსაარებელო.
7. გიხაროდენ დიდებისა მისისა შესაკუთრებულო.
8. გიხაროდენ ელუებრ კამკამებითა გაბრწყინუებულო.
9. გიხაროდენ ვარსკულავებრ ჰაეროვან განათლებულო.
10. გიხაროდენ ზეცისა უმაღლესო.
11. გიხაროდენ ჱეთერისა უნათლესო.
12. გიხაროდენ თუალთშეუდგამო მცხინუარებითა.
13. გიხაროდენ იესოს მშობელო ქალწულებითა.
14. გიხაროდენ კრავისა ღმრთისა დედაო, ზესთა ბუნებისა სიწმიდითა.
15. გიხაროდენ ლმობიერად სავედრებელო.
16. გიხაროდენ მომნიჭებელო წყალობისაო.
17. გიხაროდენ ნათელო ყოვლად შუენიერო.
18. გიხაროდენ ჰინდოისა განმდევნელო.
19. გიხაროდენ ოსანნასა მღაღადებელო.
20. გიხაროდენ პირო დაუდუმებელო.
21. გიხაროდენ ჟამ ყოველ საგალობელო.
22. გიხაროდენ, რომელსა გადიდებენ ანგელოსნი.
23. გიხაროდენ საყუარელო სულითა.
24. გიხაროდენ ტრედო უმანკოებითა.
25. გიხაროდენ უზადაოო თუალითა.
26. გიხაროდენ ფრთოვანო გონებითა.
27. გიხაროდენ ქალწულო სიწმიდითა.
28. გიხაროდენ ღირსო დიდებითა.
29. გიხაროდენ ყოველთა უმეტესო გვირგვინითა.
30. გიხაროდენ შუჱნიერო სიკეთითა.
31. გიხაროდენ ჩუენდა მოწყალეო სიტკბოებითა.
32. გიხაროდენ ცათა უვრცელოესო სახიერებითა.
33. გიხაროდენ წმიდათა უწმიდესო პატივითა.
34. გიხაროდენ ჭეშმარიტებით სადიდებელო.
36. გიხაროდენ ხერუვიმთა უბრწყინუალესო.
37. გიხაროდენ ჴელაპყრობით საგალობელო.
38. გიხაროდენ ჯეროვნად სავედრებელო.
39. გიხაროდენ ჰჴმითა სიღრმით გულისათ სახმობელო.
40. გიხაროდენ ჵ, ყოვლად ყოვლითურთ წმიდაო, შეგვიწყალენ ჩუენ.
იხილეთ სარჩევი»»
