2021 წლის 2 აგვისტოს თბილისის ქვაშვეთის წმინდა გიორგის ტაძრის დეკანოზ ელიზბარ (ერისკაცობაში ელგუჯა) ოდიშვილს მღვდლად კურთხევიდან საიუბილეო 40 წელი სრულდება. იგი თავად მისმა უწმინდესობამ და უნეტარესობამ აკურთხა მღვდლად ილიაობის დღესასწაულზე 1980 წლის 2 აგვისტოს. ამ 4 ათეული წლის განმავლობაში დეკანოზმა ელიზბარმა ათასობით ადამიანს შეაცნობინა უფლის ძალა და მადლი. მის მრავალრიცხოვან მრევლში ათწლეულების მანძილზე არაერთი მომავალი სასულიერო პირი (მათ შორის მღვდელმთავრებიც) და ღირსეული ქართველი ახალგაზრდა (მათ შორის ამჟამად სხვადასხვა სფეროში მოღვაწე არაერთი საზოგადოებისთვის კარგად ცნობილი ადამიანი) აღიზარდა, რომლებიც მამა ელიზბარმა აზიარა სულიერებას და მათ ცხოვრებაში გარდამტეხი როლი შეასრულა.


იმდროინდელ მცირერიცხოვან ქართველ სასულიერო პირებს შორის გამორჩეული იყო ქვაშვეთის მოძღვარის - მამა ელიზბარის ღვაწლიც, რომელმაც მის უწმინდესობასთან, მღვდელმთავრებთან, სხვა სულიერ მოძღვრებთან და მრევლთან ერთად არაერთი ის მძიმე განსაცდელი თუ ქარტეხილი გამოიარა, რაც ეროვნული მოძრაობის დაწყებიდან საქართველომ და ქართულმა საზოგადოებამ გადაიტანა...


იგი დღესაც ღირსეულად ატარებს იმ მძიმე ჯვარს, რაც მას უფალმა და მისმა უწმინდესობამ დააკისრა... კათოლოკოს პატრიარქის ლოცვა-კურთხევით, მამა ელიზბარის ხელმძღვანელობითა და თაოსნობით აშენდა ქვაშვეთის წმინდა გიორგის ტაძრის სამრეკლო, რესტავრაცია ჩაუტარდა თავად ქვაშვეთის ეკლესიას და სხვა ტაძრებს, აიგო არაერთი ტაძარი (მათ შორისაა გლდანის ლომისის წმინდა გიორგის ეკლესია, რომელიც ათეისტური რეჟიმის ბატონობის დასრულების ერთ-ერთ სიმბოლოდ იქცა).

გილოცავთ მამაო ამ საიუბილეო თარიღს და გისურვებთ ჯანმრთელობას, მრავალჟამიერ სიცოცხლესა და სულიერ მხნეობას მრევლისა და დედა ეკლესიის საკეთილდღეოდ!

ღრმა პატივისცემითა და სიყვარულით,