ქარმელი ძამის ხეობაში, რუისისა და ურბნისის ეპარქიაში, სოფელ ციხისგვერდის ნასოფლარზე, მდინარე ძამის დასავლეთით და თრიალეთის ქედის ჩრდილოეთ კალთაზე მდებარეობს. იქვე ახლოს უძველესი ციხე-კოშკია, რის გამოც დარქმევია სოფელს სახელი - "ციხისგვერდი". გასულ საუკუნეებში ამ საკმაოდ მაღალიMმთების შუაგულში დასახლებაც ყოფილა. სოფელ ციხისგვერდიდან მოსახლეობა აყრილა და ახლომდებარე ბარის სოფლებში დასახლებულა. მოსახლეობის უმრავლესობა წიქარაშვილების გვარისა იყო. 2007 წლიდან კი ამ მადლიან ადგილას სამონასტრო კომპლექსი აშენდა.
ნასოფლარ ერთ-ერთი მოლოცვის დროს ურბნისისა და რუისის ეპარქიის მღვდელმთავარმა მიტროპოლიტმა იობმა მიაკვლია და გადაწყვიტა მონასტრის აშენება.Mმეუფის ლოცვა-კურთხევით მონასტრის წინამძღვრობა არქიმანდრიტ ზაბულონს (გელაშვილი) დაევალა.
ქარმელის მამათა მონასტერში სამი ტაძარია: წმინდა ილია წინასწარმეტყველის, ღვთისმშობლის საფარველის სახელობის ღია ტრაპეზი და წმინდა ზაბულონისა და სოსანას სახელობის ტაძრები. აქვეა ბერების სენაკები.
მონასტერს საკუთარი მეურნეობა და სათბური აქვს. მამები ამუშავებენ მიწის ნაკვეთს. მომავალშიMსაკალმახე მეურნეობის გაკეთებაც სურთ და ტაძრების გალავნის აშენებაც.
სადღესასწაულო მსახურების ბოლოს მეუფე იობმა მრევლს უქადაგა, რასაც ვთავაზობთ "კარიბჭის" მკითხველს.
- სახელითა მამისათა და ძისათა და სულისა წმიდისათა, ჩვენთან არს ღმერთი!
ყველას მოგილოცავთ დღევანდელ დღეს, დღეს არის საეკლესიო ახალი წელი და ყოვლადწმინდა ღვთისმშობლის კრების დღესასწაული. ღვთისმშობელთან დაკავშირებული ყველა დღესასწაული სწორედ დღევანდელ დღეს გვახსენებს თავს. დღეს კიდევ არის ძველი და ახალი აღთქმის წმინდანთა და წმინდა ღირსი მამის სვიმეონ მესვეტის ხსენება. სვიმეონ მესვეტე ჯერ კიდევ ახალგაზრდა იყო, როცა ტაძარში ესწრებოდა მსახურებას და მოისმინა ცხრა ნეტარება, რომელმაც აღძრა მისი სული და ერთ-ერთ სულიერ ბერთან მივიდა. მას ჰკითხა, განმიმარტე ცხრა ნეტარების მნიშვნელობაო. ბერი განუმარტავს და სვიმეონ მესვეტე დარწმუნდება, რომ საკუთარი თავი უნდა შესწიროს უფალს. ამის შემდეგ სიზმრისეულ ჩვენებაში ასეთ ხილვას ნახავს - მიწას თხრიდა და გვერდზე ედგა ჭაღარა თმაწვერიანი მოხუცი. ორმოს თხრისას ჩასძახოდა, - არ არის საკმარისიო. გარკვეულ ზღვარს რომ მიაღწია - კმარაო. ამითGგულისხმაყოფს წმინდა სვიმეონ მესვეტე, რომ საჭიროა ღვაწლი მისი განწმენდისათვის და წავა ერთ-ერთ მონასტერში, სადაც შვიდი დღე სთხოვდა იღუმენს, შეეშვა მონასტერში. დღეს ვინ გაჩერდება შვიდი დღე მონასტერთან!Bმეშვიდე დღეს მიიღო იღუმენმა და იმდენად გაძლიერდა მოღვაწეობაში, რომ სამაგალითო გახდა. თითქმის 18 წლის ასაკში ბერად აღიკვეცა. მკაცრად რომ მარხულობდა, შეეშინდა იღუმენს, არ მოკვდესო და მონასტრიდან გაუშვა. წმინდა მამა მშრალ ჭაში ჩავა და იქაც გააგრძელებს მოღვაწეობას. იღუმენს გამოეცხადება ანგელოზი - დააბრუნე უკანო. უკან დაბრუნების შემდეგ მონასტერში 3-4 წელი იცხოვრა. მერე ისევ წავიდა თავისი ნებით მონასტრიდან, ავიდა ერთ მთაზე და იმდენად გაითქვა სახელი თავისი წმინდა ცხოვრებით, რომ მასთან ძალიან ბევრი ხალხი მიდიოდა. კურნავდა ხალხს და ლოცულობდა, სიცოცხლეშივე სასწაულებს აღასრულებდა. როდესაც ხალხმა შეაწუხა, მაღალ მთაზე კოშკი ააგო და დაფუძნდა. ოცი დღე ფეხზე მდგომი განადიდებდა უფალს, ოცი დღე მჯდომარე იყო და ისე ლოცულობდა. შემდეგ თანდათანობით გაადიდა სვეტის სიმაღლე. ასეთი მოღვაწეობა პირველი იყო იმ პერიოდში. გაუკვირდა პატრიარქს, ბერები გაგზავნა და დააბარა, - ადით და დაუძახეთ, თუ არ გაგიგონათ და დაბლა არ ჩამოვიდა, ესე იგი, ეშმაკისგან არის, ხოლო თუკი შეისმენს, გაუშვით, მოღვაწეობა გააგრძელოსო. მართლაც, ბერების ძახილზე სვიმეონი ჩამოვიდა დაბლა. ბერებმა - გააგრძელე მოღვაწეობა, ეს ღვთისგან არისო. ასე მოღვაწეობდა წმინდა სვიმეონ მესვეტე. მას ძალიან ბევრი ბრძოლა ჰქონდა ეშმაკისგან. ეშმაკი, რა თქმა უნდა, პირველ რიგში ასეთ მოღვაწე ბერებს ებრძვის სხვადასხვა სახით, მაგრამ მან თავისი თავმდაბლობით, სულიერებით გადაიტანა. ერთხელLცეცხლოვანი სვეტი ჩამოვიდა სვეტთან და ეშმაკმა ანგელოზის სახით მიმართა - შენ ილიას სიწმინდეს მიაღწიე, დაჯექი ცეცხლოვან ეტლში და აგიყვან ზეცადო. ადამიანურად შეცდა, მაგრამ ჩვევად ჰქონდა, ვიდრე ნაბიჯს გადადგამდა, ჯვარს სახავდა ყველაფერს. როდესაც ნაბიჯი გადადგა ცეცხლოვანი ეტლისკენ, ჯვარი გადასახა და ის განქარდა. ამით მიხვდა, რომ ეშმაკისგან იყო.
***
14 სექტემბერს დავაწესეთ ყოველთა ქართველთა ერთობის დღე. შევთხოვთ ყოვლადწმინდა ღვთისმშობელ დედას, ძველი აღთქმის წმინდანს ისუ ნავეს, ახალი აღთქმის წმინდანს სვიმეონ მესვეტეს, რომ მათი ლოცვით ღმერთმა მოიღოს მადლი, წყალობა სრულიად საქართველოზე, ქართველებზე და ყველა მართლმადიდებელ ქრისტიანზე. ერთობა და ერთსულოვნება ყოფილიყოს საქართველოში. დედა ღვთისმშობელი მუდმივად იცავდა საქართველოს. შევთხოვთ ყოვლადწმინდა სამებას, რომ ერთსულოვანი გახადოს ქართველი ერი დედა სამშობლოსათვის დიდი სიყვარულით, ერთგულებით, თავდადებით და მტკიცე მართლმადიდებლური რწმენით. ღმერთმა დაგლოცოთ, ღმერთმა დალოცოს სრულიად საქართველო.
