ახალდაქორწინებულები 1941 წელს დაწყებულმა ომმა დააშორა. დედა ტყვედ პოლონეთში მოხვდა, მამა - გერმანიაში. მათი სიყვარულის ნაყოფი, ქალბატონი ტაისა, უცხო ქვეყანაში დაიბადა. მომვლელმა ქალბატონმა პატარა თავისი აღმსარებლობით მონათლა. ასე გახდა იგი კათოლიკე. ტაისა დედამ 1946 წელს ჩამოიყვანა მშობლიურ ქუთაისში, მამა 1947 წელს დაბრუნდა. შემდეგ ორი ძმა გაუჩნდა...
ქალბატონ ტაისას შვილი ჰყავს გარდაცვლილი... ერთი ძმა ავარიაში დაეღუპა. სულ აწუხებდა იმაზე ფიქრი, რომ საიქიოს შვილს და ძმას ვერ შეხვდებოდა, რადგან ისინი მართლმადიდებლური წესით იყვნენ ნათელღებულნი. ქალბატონი ტაისა ხშირად ფიქრობდა მართლმადიდებლურად მონათვლაზე. ნაფიქრის აღსრულება განაპირობა ჟურნალისტ ნანა კუხალაშვილის ოჯახში სტუმრობამ. ამ ოჯახში ხშირად საუბრობენ მართლმადიდებლობასა და ჩვენი ეპარქიის მღვდელმთავრის საოცარ მადლზე. ის დღეც არ ყოფილა გამონაკლისი. ქალბატონმა ტაისამ დაუყოვნებლივ მონათვლა გადაწყვიტა. რამდენიმე დღეში ნათლისღების საიდუმლო მამა ექვთიმემ (წულუკიძემ) აღასრულა, ნათელღებულის სულიერი ცხოვრების სწორად წარმართვა კი მიმრქმელებს გელა სვანიძეს, ცირა შალაშვილს და ზაურ ნემსაძეს დაეკისრათ. ტაისა დვალს კი, როგორც მოძღვარმა აღნიშნა, ყველა ცოდვა მიეტევა, იგი სულიერად იშვა. მისი სულიერი დაბადების დღე 11 მაისია.
მოამზადა
ხათუნა გედენიძემ
ხათუნა გედენიძემ